ສະຫະລັດ ແມ່ນຍັງບໍ່ພ້ອມທີ່ຈະຖອນຕົວອອກຈາກຂໍ້ຕົກລົງຂອງເຂົາເຈົ້າກັບກຸ່ມຕາລີບານໃນ ອັຟການິສຖານ, ແຕ່ນາຍພົນທີ່ຮັບຜິດຊອບກອງທັບ ສະຫະລັດ ໃນພາກພື້ນດັ່ງກ່າວເວົ້າວ່າ ມັນມີສັນຍານທີ່ວ່າ ຂໍ້ຕົກລົງນັ້ນອາດພັງລົງ.
ນາຍພົນ ເຄັນເນັດ ແມັກເຄັນຊີ ຈາກກອງບັນຊາການກຳລັງ ສະຫະລັດ ໃນພາກຕາເວັນອອກກາງ ໄດ້ກ່າວໃນວັນພະຫັດວານນີ້ວ່າ ເຖິງແມ່ນຈະມີຄຳສັນຍາທີ່ຈະຫຼຸດຜ່ອນຄວາມຮຸນແຮງກໍຕາມ, ຄວາມຖີ່ໃນການໂຈມຕີຂອງກຸ່ມ ຕາລີບານ ຢູ່ທົ່ວ ອັຟການິສຖານ ແມ່ນຍັງຄົງໜ້າເປັນຫ່ວງຢູ່.
ທ່ານ ແມັກເຄັນຊີ ໄດ້ກ່າວຕໍ່ບັນດາສະມາຊິກສະພາ ສະຫະລັດ ວ່າ “ຂ້າພະເຈົ້າຈະບໍ່ພິຈາລະນາສິ່ງທີ່ກຸ່ມ ຕາລີບານ ກຳລັງເຮັດວ່າສອດຄ່ອງກັບທຸກເສັ້ນທາງ ສູ່ການສິ້ນສຸດຄັ້ງສຸດທ້າຍຂອງຂໍ້ຕົກລົງກັບ ລັດຖະບານໃນປັດຈຸບັນຂອງ ອັຟການິສຖານ.”
ທ່ານໄດ້ກ່າວວ່າ “ການໂຈມຕີຕ່າງໆ ແມ່ນມີຂຶ້ນສ່ວນຫຼາຍ ຕໍ່ຄ້າຍ, ດ່ານກວດ ແລະ ໜ່ວຍສູ້ລົບທີ່ໂດດດ່ຽວຂອງ ອັຟການິສຖານ. ລະດັບການໂຈມຕີຂອງ ກຸ່ມຕາລີບານ ແມ່ນບໍ່ສອດຄ່ອງກັບຄຳເວົ້າຂອງອົງການຈັດຕັ້ງດັ່ງກ່າວທີ່ມີຈຸດປະສົງຈະຮັກສາຄຳເວົ້າຂອງພວກເຂົາ.”
ຂໍ້ຕົກລົງທີ່ຖືກເຊັນໂດຍ ສະຫະລັດ ແລະ ກຸ່ມຕາລີບານ ໃນອັຟການິສຖານ ທີ່ ນະຄອນຫຼວງ ໂດຮາ ປະເທດ ກາຕ້າ ໃນເດືອນກຸມພາທີ່ຜ່ານມາ ໄດ້ຮຽກຮ້ອງໃຫ້ກອງກຳລັງ ສະຫະລັດ ແລະ ພັນທະມິດທັງໝົດອອກຈາກ ອັຟການິສຖານ ພາຍໃນ 14 ເດືອນຂ້າງໜ້າ.
ບັນດາເຈົ້າໜ້າທີ່ ກອງທັບ ສະຫະລັດ ໄດ້ກ່າວວ່າ ກອງກຳລັງ ອາເມຣິກັນ ກຸ່ມທຳອິດ ໄດ້ເລີ່ມອອກຈາກປະເທດໃນອາທິດນີ້, ເປັນສ່ວນນຶ່ງຂອງຄວາມພະຍາຍາມທີ່ຈະຫຼຸດຜ່ອນຈຳນວນກອງທະຫານທັງໝົດໃນປະເທດ ຈາກປະມານ 13,000 ເປັນ 8,600 ຄົນ ພາຍໃນ 135 ວັນຂ້າງໜ້າ.
ແຕ່ວ່າ, ບັນດາເຈົ້າໜ້າທີ່ກອງທັບ ແລະ ກະຊວງປ້ອງກັນປະເທດ ສະຫະລັດ ໄດ້ອະທິບາຍຢ່າງຊ້ຳແລ້ວຊ້ຳອີກວ່າ ການຖອນກຳລັງໃນເບື້ອງຕົ້ນແມ່ນການພະຍາຍາມທີ່ “ມີເຈຕະນາດີ” ເພື່ອຮັກສາທຸກຝ່າ ຍໃນ ອັຟການິສຖານ ໃຫ້ຢູ່ໃນເສັ້ນທາງໄປສູ່ສັນຕິພາບ, ໂດຍເຕືອນວ່າ ວໍຊິງຕັນ ແມ່ນພ້ອມທີ່ຈະປ່ຽນໃຈຖ້າມີຄວາມຈຳເປັນ.
