ກອງກຳລັງ ອິສຣາແອລ ໄດ້ໂຈມຕີເຂດ ກາຊາ ໃນວັນສຸກມື້ນີ, ໃນຂະນະທີ່ສານສູງສຸດຂອງອົງການສະຫະປະຊາຊາດແມ່ນມີກຳນົດທີ່ຈະຕັດສິນ ກ່ຽວກັບ ການຮຽກຮ້ອງໃຫ້ຢຸດການໂຈມຕີທາງທະຫານ ຍ້ອນການກ່າວຫາ ກ່ຽວກັບ “ການຂ້າລ້າງເຜົ່າພັນ.”
ຢູ່ພື້ນດິນໃນເຂດກາຊາ, ບັນດາຜູ້ເຫັນເຫດການ ແລະ ນັກຂ່າວຂອງອົງການ AFP ໄດ້ລາຍງານ ກ່ຽວກັບ ການໂຈມຕີຂ້າມຄືນທາງອາກາດ ແລະ ທາງນ້ຳໃສ່ເມືອງ ກາຊາ ແລະ ຍິງປືນໃສ່ພາກໃຕ້ຂອງເຂົາເຈົ້າ, ດ້ວຍຜູ້ເສຍຊີວິດຈຳນວນຫຼາຍຖືກລາຍງານໃນການໂຈມຕີສອງຄັ້ງແຕກຕ່າງກັນໃສ່ຕຶກທີ່ພັກອາໄສຂອງປະຊາຊົນໃນພາກເໜືອ ແລະ ພາກກາງຂອງເມືອງ.
ອິສຣາແອລ ໃນຕົ້ນເດືອນພຶດສະພາໄດ້ເປີດການໂຈມຕີໃສ່ເມືອງ ຣາຟາ, ເມືອງສຸດທ້າຍໃນເຂດກາຊາ ທີ່ກອງກຳລັງພາກພື້ນດິນໄດ້ເຂົ້າໄປ, ໂດຍໄດ້ຂັດຂືນການຄັດຄ້ານຈາກທົ່ວໂລກ ແລະ ໄດ້ເຮັດໃຫ້ປະຊາຊົນຫຼາຍກວ່າ 800,000 ຄົນຕ້ອງຫຼົບໜີ, ອີງຕາມຕົວເລກຂອງອົງການສະຫະປະຊາຊາດ.
ໂຄສົກກອງທັບ ອິສຣາແອລ ທ່ານ ແດນຽລ ຮາກາຣີ ໄດ້ກ່າວວ່າ “ພວກເຮົາບໍໄດ້ໂຈມຕີເຂົ້າໃສ່ເມືອງ ຣາຟາ, ພວກເຮົາໄດ້ທຳການປະຕິບັດການຢ່າງລະມັດລະວັງ ແລະ ຢ່າງແນ່ນອນ.”
ໃນຖະແຫຼງການສະບັບນຶ່ງຂອງວັນສຸກມື້ນີ້, ກອງທັບບົກ ອິສຣາແອລ ໄດ້ກ່າວວ່າ “ກອງກຳລັງຂອງເຂົາເຈົ້າແມ່ນກຳລັງສືບຕໍ່ການປະຕິບັດການຕໍ່ຕ້ານເປົ້າໝາຍພວກກໍ່ການຮ້າຍ” ໃນເມືອງທີ່ຕັ້ງຢູ່ພາກໃຕ້ນັ້ນ, ບ່ອນທີ່ເຂົາເຈົ້າໄດ້ “ທຳລາຍສາງເກັບອາວຸດ” ແລະ ເສັ້ນທາງອຸໂມງ.
ແຫຼ່ງຂ່າວໃນທ້ອງຖິ່ນ ປາແລັສໄຕນ ແຫ່ງນຶ່ງໄດ້ກ່າວວ່າລົດທະຫານຈຳນວນ ຫຼາຍໄດ້ເດີນທາງຈາກພາກຕາເວັນອອກຂອງເມືອງ ຣາຟາ ໄປສູ່ໃຈກາງເມືອງ.
ການຕໍ່ສູ້ໃນຕົວເມືອງໄດ້ລະເບີດຂຶ້ນອີກຄັ້ງໃນເຂດພາກເໜືອຂອງດິນແດນ ປາແລັສໄຕນ, ເຊິ່ງກອງກຳລັງ ອິສຣາແອລ ໄດ້ບຸກເຂົ້າໄປໃນຫຼາຍເດືອນທີ່ຜ່ານມາ.
ຟໍຣັມສະແດງຄວາມຄິດເຫັນ