ພາຍຸຫົວກຸດຮ້າຍແຮງ ຖະຫລົ່ມພາກກາງ ສະຫະລັດ ເຮັດໃຫ້ ອີກຢ່າງໜ້ອຍ 12 ຄົນເສຍຊີວິດ (ວີດີໂອ)

ລະ​ບົບ​ພາຍຸ​ທີ່​ຮ້າຍ​ແຮງ​ອີກ​ລະບົບ​ນຶ່ງ ​ໄດ້​ນໍາ​ເອົາ​ລົມຫົວກຸດ​ ​
ແລະ​ນໍ້າ​ຖ້ວມ​ມາສູ່ ຫລາຍໆ​ເຂດ​ໃນພາກ​ກາງຂອງ​ສະຫະລັດ
ທີ່​ເຮັດ​ໃຫ້ ຢ່າງ​ນ້ອຍ 12 ຄົນ ​ເສຍ​ຊີວິດ​ໄປ​ແລ້ວ.

ພາຍຸ​ຫົວກຸດ 5 ​ຫົວ​ໄດ້​ຖະຫລົ່ມ​ເຂດນະຄອນ Oklahoma
City ຂອງ​ລັດ Oklahoma ​ໃນ​ຕອນ​ແລງ​ຂອງ​ວັນ​ສຸ​ກທີ່​ຜ່ານ
​ມາ ​ເຮັດ​ໃຫ້​ມີ​ຜູ້​ເສຍ​ຊີວິດ 9 ຄົນ ​ແລະ​ໄດ້​ຮັບ​ບາດ​ເຈັບ 100
ກວ່າຄົນ​.

ຮວມ​ຢູ່​ໃນ​ຜູ້​ໄດ້​ຮັບ​ເຄາະ​ຮ້າຍ​ນັ້ນ​ ມີ​ແມ່ຄົນນຶ່ງ​ພ້ວມດ້ວຍ​ລູກນ້ອຍ​ຂອງ​ລາວ ທີ່​ຖືກ​ລົມພາຍຸ​ ດູດອອກ​ໄປ​ຈາກ​ລົດ ​ໃນ​ຂະນະ​ທີ່​ຂີ່​ລົດ​ໄປ​ຢູ່​ໃນ​ຖະໜົນຮາ​ຍ​ເວ.

ບ່ອນທີ່​ຖືກ​ເສຍ​ຫາຍ​ ​ແລະມີ​ຜູ້​ໄດ້​ຮັບ​ບາດ​ເຈັບ ຫລາຍ​ທີ່​ສຸດ ​ແມ່ນ​ຢູ່ໄກ ​ພຽງ​ປະມານ 18 ຫລັກຈາກເມືອງ​ທີ່ພາຍຸ​ຫົວກຸດ ​ໄດ້​ເຮັດ​ໃຫ້ 24 ຄົນ​ເສຍ​ຊີວິດ ພຽງເມື່ອ 11 ​ມື້​ຜ່ານ​ມານັ້ນ.

ລະບົບພາຍຸຊຸດ​ນີ້ ​ຍັງໄດ້ເຮັດ​ໃຫ້​ເກີດ​ມີລົມ​ແຮງ ​ແລະ​ຝົນຕົກ​ໜັກ ຢູ່​ທີ່​ລັດ Missouri ​ແລະ ລັດ Arkansas ບ່ອນ​ທີ່​ໄພ​ນໍ້າ​ຖ້ວມ​ຢ່າງ​ໄວ ​ເຮັດ​ໃຫ້​ຢ່າງ​ໜ້ອຍ​ສາມ​ຄົນ​ເສຍ​ຊີວິດ.

ຢູ່​ທີ່​ແຫ່ງ​ອຶ່ນໆ​ໃນ​ປະ​ເທດ ບັນດາ​ພວກ​ມອດ​ໄຟ ຍັງ​ສືບ​ຕໍ່​ປະຕິບັດ​ງານ​ເພື່ອ​ລະຫງັບໄຟ​ໄໝ້​ທີ່​ເກີດ​ຂຶ້ນຕາມ​ລະດູ​ການ ທີ່​ຂົ່ມຂູ່​ບ້ານ​ເຮືອນແລະ​ເຜົາໄໝ້​ພື້ນ​ທີ່​ຢ່າງ​ໜ້ອຍ 80 ຕາຕະລາງ ​ກິ​ໂລ​ແມດ ​ຢູ່ໃນ​ລັດ California. ຫລາຍກວ່າ 1,000 ຫລັງຄາ​ເຮືອນ ​ແລະ​ຫ້າງ​ຮ້ານ ທຸລະ​ກິດ​ ​ໄດ້​ພາກັນ​ຍົກຍ້າຍ ​ໃນ​ຂະນະ​ທີ່​ລົມ​ໄດ້​ພັດຍູ້​ເອົາ​ໄຟ​ ​ໄປ​ສູ່ບໍລິ​ເວນ
ຕີນ​ພູ​ຂອງນ​ະ ຄອນ Los Angeles.

ເບິ່ງວີດິໂອ ກ່ຽວກັບສາມຄົນທີ່ຕາມໄປ ຖ່າຍຮູບເອົາພາຍຸລົມຫົວກຸດ ແລ້ວເສຍຊີວິດ: