ການນັບຄະແນນສຽງໄດ້ເລີ້ມຕົ້ນຂຶ້ນແລ້ວ ຢູ່ໃນປະເທດໂຕໂກ
ຫຼັງຈາກການເລືອກຕັ້ງ ປະທານາທິບໍດີ ໃນວັນເສົາວານນີ້ ຊຶ່ງ
ຄາດກັນວ່າ ປະທານາທິບໍດີ Faure Gnassingbe ຈະໄດ້ຮັບ
ໄຊຊະນະ ແລະ ຍັງຄົງກຳອຳນາດ ຢູ່ອີກຕໍ່ໄປ.
ປະທານາທິບໍດີ Gnassingbe ໄດ້ເຂົ້າຮ່ວມແຂ່ງຂັນ ອີກສະໄໝ
ນຶ່ງເປັນຄັ້ງທີ 3 ທີ່ມີໄລຍະ 5 ປີ ຊຶ່ງຈະເຮັດໃຫ້ຄອບຄົວຂອງທ່ານ
ຄອງອຳນາດມາ ເກືອບ 50 ປີ. ທ່ານ Gnassingbe ໄດ້ເຂົ້າຮັບ
ຕຳແໜ່ງໃນປີ 2005 ພາຍຫຼັງຈາກ ການເຖິງແກ່ອະສັນຍະກຳ
ຂອງບິດາຂອງທ່ານ ຄື ທ່ານ Gnassingbe Eyadema ຜູ້ທີ່ໄດ້
ປົກຄອງ ອະດີດອານານິຄົມຂອງຝຣັ່ງແຫ່ງນີ້ ເປັນເວລາ 38 ປີ.
ຄາດກັນວ່າ ຜູ້ນຳຝ່າຍຄ້ານ ທ່ານ Jean-Pierre Fabre ທີ່ໄດ້ເຂົ້າ ຮ່ວມການແຂ່ງຂັນ
ໃນການເລືອກຕັ້ງຄັ້ງກ່ອນ ຈະໄດ້ຄະແນນທີສອງ ໃນການປ່ອນບັດເອົາປະທານາທິບໍດີ
ທີ່ມີຮອບດຽວນັ້ນ.
ບັນດານັກສັງເກດການ ການເລືອກຕັ້ງ ປະເມີນວ່າ ມີປະຊາຊົນອອກມາໃຊ້ສິດອອກສຽງ
ປະມານ 40 ເປີເຊັນ.
ກຸ່ມປົກປ້ອງສິດທິມະນຸດຕ່າງໆ ໄດ້ຕຳໜິຕິຕຽນ ລັດຖະບານໂຕໂກ ວ່າ ໄດ້ໃຊ້ຄວາມຮຸນແຮງ ຕໍ່ພວກປະທ້ວງ.
ບັນດານັກສັງເກດການເລືອກຕັ້ງ ຫຼາຍຮ້ອຍຄົນ ໄດ້ພາກັນໄປຍັງໂຕໂກ ເພື່ອຕິດຕາມເບິ່ງ
ການເລືອກຕັ້ງດັ່ງກ່າວ. ແລະມີປະມານ 3 ລ້ານ 5 ແສນຄົນ ໄດ້ໄປລົງທະບຽນປ່ອນບັດ ຊຶ່ງປະກອບເປັນພຽງເຄິ່ງນຶ່ງເທົ່ານັ້ນ ຂອງປະຊາກອນໂຕໂກທັງໝົດ.
