ບັນດາເຈົ້າໜ້າທ່ີນະຄອນນີວຢອກແຈ້ງໃຫ້ຊາບ ໃນຕອນເຊົ້າວັນອາທິດມື້ນີ້ວ່າ ເຂົາເຈົ້າໄດ້ພົບເຫັນລະເບີດທ່ີອາດມີພະລັງແຮງ ໃນລົດຄັນນຶ່ງ ທ່ີຈະຕຸລັດ Times Square ແລະໄດ້ອົບພະຍົບປະຊາຊົນອອກຈາກ ບໍລິເວນດັ່ງກ່າວ ທີ່ເປັນສູນກາງລື່ນເລີງຂອງນະຄອນນີວຢອກນັ້ນ ແຕ່ເວລານີ້ ໄດ້ເປີດຈະຕຸລັດ Times Square ນັ້ນຄືນແລ້ວ ຫລັງຈາກ ຕຳຫລວດໄດ້ຍ້າຍລົດຄັນນັ້ນອອກໄປ. ເຈົ້າຄອງນະຄອນນີວຢອກທ່ານ Michael Bloomberg ກ່າວວ່າ ລົດຄັນດັ່ງກ່າວບັນທຸກລະເບີດ ຂະໜາດທີ່ອາດສາມາດພາໃຫ້ຜູ້ຄົນເສຍຊີວິດ ເປັນຈຳນວນຫລາຍໄດ້.
ໜັງສືພິມ New York Times ອ້າງຄຳເວົ້າຂອງຫົວໜ້າໂຄສົກປະຈຳ ກົມຕຳຫລວດນະຄອນນີວຢອກວ່າ ລະເບີດທ່ີພົບເຫັນໃນລົດດັ່ງກ່າວ ກຳລັງຈະລະເບີດຂຶ້ນ ແຕ່ສາຍຂະນວນຂອງລະເບີດເກີດຕິດຂັດ.
ໄດ້ມີການສົ່ງໜ່ວຍກູ້ລະເບີດຈຸນຶ່ງ ໄປກວດເບິ່ງລົດຄັນນັ້ນ ໃນຄືນວັນເສົາວານນີ້ ຫລັງຈາກມີພົນລະເມືອງດີ ໂທລະສັບໄປແຈ້ງຕຳຫລວດວ່າ ມີຄວັນອອກມາຈາກລົດທີ່ໜ້າສົງໃສນັ້ນ ຊຶ່ງທ່ານ Bloomberg ກ່າວວ່າ ບັນຈຸຖັງແກສ propane ຫລາຍຖັງ ນ້ຳມັນແອສຊັງ ລູກກະໂພກ ແລະເຄື່ອງຕັ້ງເວລາ.
ເຈົ້າຄອງນະຄອນນີວຢອກກ່າວຕື່ມວ່າ ທາງເຈົ້າໜ້າທ່ີບໍ່ຮູ້ຈັກວ່າຜູ້ໃດຢູ່ ເບື້ອງຫລັງການວາງລະເບີດໃນລົດຄັນນີ້ ແຕ່ ເວລານີ້ ເຈົ້າໜ້າທ່ີຈາກ ກົມຕຳຫລວດສັນຕິບານກາງ ຫລື FBI ແລະຈາກອົງການອື່ນໆກຳລັງຕິດຕາມ ຮ່ອງຮອຍຢູ່.
ປະທານາທິບໍດີບາຣັກໂອບາມາ ໄດ້ກ່າວຍ້ອງຍໍການຕອບໂຕ້ຢ່າງໄວ ຂອງກົມຕຳຫລວດ ນະຄອນນີວຢອກ.
ຜູ້ວ່າການລັດນີວຢອກ ທ່ານ David Paterson ໄດ້ອອກຖະແຫລງ ການສະບັບນຶ່ງ ເອີ້ນເຫດການດັ່ງກ່າວວ່າ ເປັນການກໍ່ການຮ້າຍ.
ວັນເສົາ, ໒໗ ກໍລະກົດ ໒໐໒໔
