ວາລະສານ Time Magazine ໄດ້ເປີດເຜີຍລາຍຊື່ບຸກຄົນທີ່ມີຊື່ສຽງ ພວກຜູ້ນຳ ແລະນັກເຄື່ອນໄຫວ ຂອງຕົນໃຫ້ຮູ້ ທີ່ຖືວ່າເປັນພວກທີ່ມີ“ອິດທິພົນທີ່ສຸດຂອງໂລກ” ໃນປີ 2015 ນີ້.
Time Magazine ໄດ້ບົ່ງຊື່ ປະທານາທິບໍດີ ບາຣັກ ໂອບາມາ ແຫ່ງສະຫະລັດ ແລະປະທານາທິບໍດີ Raul Castro ແຫ່ງຄິວບາ ແລະສັນຕະປາປາ Francis ພ້ອມກັບບຸກຄົນອື່ນໆອີກ 97 ຄົນ ທີ່ຮວມທັງພວກຜູ້ນຳ ບຸກຄົນທີ່ມີຊື່ສຽງແລະມີຄວາມສຳຄັນເປັນພິເສດ ບຸກຄົນທີ່ ໜ້ານັບຖື ນັກສິນລະປິນ ແລະພວກບຸກເບີກ ຢູ່ໃນສະບັບປີ 2015 ຂອງພວກຜູ້ຄົນທີ່ມີອິດທິພົນຫລາຍທີ່ສຸດ 100 ຄົນໃນໂລກ. ທ່ານນາງ Nancy Gibbs ຊຶ່ງເປັນຫົວໜ້າບັນນາທິການ ກ່າວວ່າ ມີຄວາມແຕກຕ່າງກັນທີ່ສຳຄັນ ທີ່ຈະຕ້ອງໄດ້ເຮັດລະຫວ່າງອຳນາດ ແລະອິດທິພົນ ແລະກ່າວຕື່ມວ່າ “ການບັນລຸອຳນາດແມ່ນຈຳກັດຕໍ່ພວກທີ່ເຮົາສາມາດຄວບຄຸມໄດ້. ການບັນລຸອິດທິພົນແມ່ນບໍ່ມີຂອບເຂດຈຳກັດ ເວລາມີແນວຄິດທີ່ຍິ່ງໃຫຍ່ ຕໍ່ສາເຫດໃດໆ ວິທີການຮັກສາໃຫ້ຫາຍ ຫຼືການປະດິດຄິດສ້າງທີ່ສາມາດແບ່ງປັນໄດ້ຢ່າງກະທັນຫັນ ແລະຢູ່ທົ່ວໂລກຈາກອົ້ງມືຂອງເຈົ້າເອງ.”
ທ່ານນາງກ່າວຕື່ມວ່າ “ໃນຂະນະທີ່ລາຍຊື່ສະແດງໃຫ້ເຫັນໜ້າຕາຂອງ ພວກທີ່ມີ
ຊື່ສຽງໃນໂລກຮວມທັງນັກຮ້ອງ rapper Kanye West ຫຼາຍຄົນທີ່ມີການຮັບ
ຮູ້ໜ້ອຍກວ່າ ໄດ້ຍ່າງຢູ່ເທິງແຜ່ນຜ້າພົມສີແດງ ເພື່ອເຮັດໃຫ້ເລື້ອງຂອງພວກເຂົາເຈົ້າຄືບໜ້າໄປໃນເວທີຂອງໂລກນັ້ນ.”
ນັກເຄື່ອນໄຫວ ໄນຈີເຣຍ ນາງ Obiageli Ezekwesili ຜູ້ນຳຂະບວນການ “Bring Back Our Girls” ຖືໂອກາດນີ້ເພື່ອເຜີຍແຜ່ພາລະກິດຂອງນາງໃຫ້ຄືບໜ້າໄປ ໃນການຊອກຫາພວກນັກຮຽນຍິງຈຳນວນຫຼາຍກວ່າ 200 ຄົນທີ່ໄດ້ຖືກກຸ່ມກໍ່ການຮ້າຍ Boko Haram ລັກພາໂຕໄປໃນປີ 2014 ນັ້ນ.
