ຫົວໜ້າບໍລິຫານໃຫຍ່ຂອງຕິກຕ໊ອກ (TikTok) ໄດ້ຖືກຄະນະກຳມະການຂອງສະພາຕ່ຳສະຫະ ລັດ ສອບຖາມທ່ານ ເພື່ອໃຫ້ເຫດຜົນວ່າ ເປັນຫຍັງ ແອັຟປລີເຄຊັນແບ່ງປັນວີດີໂດນຳກັນ ທີ່ໄດ້ຮັບຄວາມນິຍົມຊົມຊອບຢ່າງຫຼວງ ຫຼາຍນີ້ ຈຶ່ງບໍ່ຄວນຖືກຫ້າມ, ອີງຕາມລາຍງານຂອງອົງການຂ່າວເອພີ.
ການໃຫ້ການຂອງ ທ່ານຊູ ຊີ ຊູ (Shou Zi Chew) ໃນວັນພະຫັດວານນີ້ ມີຂຶ້ນຢູ່ໃນຊ່ວງເວລາສຳຄັນຍິ່ງ ສຳລັບບໍລິສັດດັ່ງກ່າວ, ຊຶ່ງມີຜູ້ຊົມໃຊ້ຊາວອາເມຣິກັນ 150 ລ້ານຄົນ ແຕ່ກຳລັງຕົກຢູ່ພາຍໃຕ້ການກົດດັນເພີ້ມຂຶ້ນນັບມື້ຈາກບັນດາເຈົ້າໜ້າທີ່ຂອງສະຫະລັດ ທີ່ມີຄວາມເປັນຫ່ວງ ກ່ຽວກັບຄວາມປອດໄພຂອງຂໍ້ມູນ ແລະຄວາມປອດໄພຂອງຜູ້ຊົມໃຊ້. TikTok ແລະບໍລິສັດແມ່ຂອງຕົນ ByteDance ໄດ້ຖືກຜັກດັນໃຫ້ຕົກຢູ່ໃຕ້ການຕໍ່ສູ້ທາງດ້ານພູມສາດການ ເມືອງທີ່ແຜ່ກວ້າງອອກໄປຫຼາຍຂຶ້ນ ລະຫວ່າງປັກກິ່ງ ແລະວໍຊິງຕັນ ກ່ຽວກັບການຄ້າ ແລະເທັກໂນໂລຈີ. ທ່ານຊູ ອາຍຸ 40 ປີ ເກີດຢູ່ສິງກະໂປ ໄດ້ອອກມາປາກົດໂຕຕໍ່ສາທາລະນະ ແບບບໍ່ເຄີຍເຫັນມາກ່ອນ ເພື່ອຕອບໂຕ້ຕໍ່ຂໍ້ກ່າວຫາຕ່າງໆ ທີ່ TikTok ພວມປະເຊີນໜ້າຢູ່ ໃນຂະນະນີ້.
