ອີງຕາມບົດລາຍງານຂອງຕໍາຫລວດໃນວັນອັງຄານວານນີ້ ທ່ານ Tiger Woods ທີ່
ຄັ້ງນຶ່ງເຄີຍເປັນນັກຕີກັອຟທີ່ມີຊື່ສຽງດັງສຸດໃນໂລກ ນອນລັບຢູ່ຄາລົດ ແລະກໍບໍ່ຮູ້ວ່າ
ຕົນເອງຢູ່ໃສ ກ່ອນໜ້າທີ່ທ່ານຈະຖືກກ່າວຫາວ່າ ໄດ້ຂີ່ລົດ ໃນເວລາມືນເມົາໃນຕົ້ນໆ
ອາທິດນີ້.
ຕໍາຫລວດໃນເມືອງ Jupiter, ຊຶ່ງເປັນເມືອງແຄມທະເລຢູ່ລັດ Florida ທີ່ທ່ານ Woods
ອາໄສຢູ່ນັ້ນເວົ້າວ່າ ທ່ານ Woods "ມີສຽງເວົ້າທີ່ປ່ອຍອອກມາຊ້າໆ ແລະເວົ້າແບບເລິ
ເລືອນບໍ່ຮູ້ເລື່ອງຫຍັງເລີຍ" ໃນຕອນທີ່ເຂົາເຈົ້າປຸກທ່ານໃຫ້ຕື່ນຂຶ້ນມາ ເມື່ອເຫັນວ່າ ທ່ານ
ນັ່ງຢູ່ໃນລົດ ທີ່ຈອດຢູ່ເລນຂວາຂອງຖະໜົນ ແລະຕິດຈັກໄວ້ຢູ່ນັ້ນ. ຕໍາຫລວດເວົ້າວ່າ
ທ່ານບໍ່ສາມາດປະຕິບັດຕາມຫນ້າທີ່ ໃນການຂັບຂີ່ລົດຫລາຍອັນ ເມື່ອເຂົາເຈົ້າບອກ
ໃຫ້ທ່ານເຮັດ.
ບົດລາຍງານຂອງຕໍາຫລວດ ໄດ້ຂຽນລາຍການຢາ ຕາມໃບສັ່ງຂອງໝໍ 4 ຢ່າງ ທີ່ທ່ານ
Woods ເວົ້າວ່າ ທ່ານໄດ້ກິນໃນຂະນະທີ່ທ່ານພັກຟື້ນຈາກການຜ່າຕັດຫລັງຄັ້ງຫລ້າສຸດ
ຊຶ່ງເປັນຄັ້ງທີ 4 ແລ້ວນັບແຕ່ປີ 2014 ເປັນຕົ້ນມາ.
ການກວດສອງຄັ້ງເພື່ອວັດແທກປະລິມານຂອງເຫລົ້າ ດ້ວຍການຫາຍໃຈສະແດງໃຫ້
ເຫັນວ່າລະດັບເຫຼົ້າໃນເລືອດຂອງທ່ານ Woods ແມ່ນສູນ, ຊຶ່ງເປັນການຊ່ວຍຕໍ່ການ
ກ່າວອ້າງຂອງທ່ານວ່າ ເຫດການນັ້ນເກີດຂຶ້ນ ຍ້ອນມີ "ອາການຕອບໂຕ້ຂອງການກິນ
ຢາແບບບໍ່ຄາດຄິດມາກ່ອນ" ແລະບໍ່ແມ່ນຍ້ອນການກິນເຫລົ້າ.
