ລິ້ງ ສຳຫລັບເຂົ້າຫາ

ວັນຈັນ, ໒໔ ມິຖຸນາ ໒໐໒໔

ພະທິເບດອົງນຶ່ງ ເຜົາຕົວເອງຕາຍ ໃນແຂວງຊີສວນ ຂອງຈີນ


ພະ Lobsang Gyatso ແຫ່ງທິເບດ ເອົາໄຟເຜົາຕົວເອງຕາຍ ໃນວັນຈັນວານນີ້ໃນແຂວງຊີສວນໃນພາກຕາ ເວັນຕົກສຽງໃຕ້ຂອງຈີນ.
ວັນທີ 13 ກຸມພາ 2012.
ພະ Lobsang Gyatso ແຫ່ງທິເບດ ເອົາໄຟເຜົາຕົວເອງຕາຍ ໃນວັນຈັນວານນີ້ໃນແຂວງຊີສວນໃນພາກຕາ ເວັນຕົກສຽງໃຕ້ຂອງຈີນ. ວັນທີ 13 ກຸມພາ 2012.

ພະ​ສາສະໜາ​ພຸດ​ທິ​ເບ​ດອົງ​ນຶ່ງ​ໄວ 19 ປີ​ໄດ້​ເອົາ​ໄຟ​ເຜົາ​ຕົວ​ເອງ​ຕາຍ​ໃນ​ວັນຈັນ​ວານ​ນີ້​ໃນ​ແຂວງ​ຊີ​ສວນ​ໃນ​ພາກ​ຕາ​ເວັນ​ຕົກ​ສຽງ​ໃຕ້​ຂອງ​ຈີນ​ທີ່ປະ​ເຊີນ​ກັບ​ຄວາມ​ວຸ້ນວາຍ​ນັ້ນ.

ພວກ​ຊາວ​ທິ​ເບ​ດທີ່​ລີ້​ໄພ​ໃນ​ຕ່າງປະ​ເທດ​ກ່າວ​ວ່າ ພະ Lobsang Gyatso ​ໄດ້​ຮ້ອງ​ຄໍາ​ຂັວນປະ​ທ້ວງ​ຕ່າງໆ​ຕໍ່ຕ້ານ​ລັດຖະບານຈີນ​ກ່ອນ​ເອົາ​ໄຟ​ເຜົາ​ຕົວ​ເອງ​ຕາຍ ​ໃນ​ເວລາ​ປະມານ​ບ່າຍ 2:00 ໂມງ​ຕາມ​ເວລາ​ໃນ​ທ້ອງ​ຖິ່ນ.

ລາຍ​ງານ​ເວົ້າ​ວ່າ ກໍາລັງ​ຮັກສາ​ຄວາມ​ປອດ​ໄພ​ຈີນ​ໄດ້​ເຄື່ອນ​ເຂົ້າໄປ​ຫາ​ພະອົງ​ນີ້​ຢ່າງ​ໄວ​ເພື່ອ​ໄປ​ມອດ​ໄຟ ​ແລະພາ​ໂຕ​ພະໄວ​ຮຸ່ນອົງ​ນີ້​ໄປ ​ແລະ ​ຍັງບໍ່​ຮູ້ຈັກ​ກ່ຽວ​ກັບ​ອາການ​ຂອງ​ຜູ້ກ່ຽວ​ແລະ​ກໍ​ບໍ່​ຮູ້ວ່າ​ດຽວ​ນີ້​ຢູ່​ໃສ.

ພະ​ອົງ​ນີ້ ​ເປັນ​ໄວ​ຮຸ່ນ​ຄົນທີ​ສອງ​ທີ່​ໄດ້​ເອົາ​ໄຟ​ເຜົາ​ຕົວ​ເອງຕາຍ ຢູ່ໃກ້ໆ​ກັບ​ເມືອງ Ngaba ທີ່​ຖືກ​ປິດ​ລ້ອມ​ນັ້ນ. ​ໃນ​ວັ​ນ​ເສົາ​ຜ່ານ​ມາ​ນີ້ແມ່​ຊີທິ ​ເບ​ດ Tenzin Choedon ​ໄວ 18 ປີ ​ໄດ້​ເອົາ​ໄຟ​ເຜົາ​ຕົວເອງ ​ແລະ​ຜູ້ກ່ຽວ​ໄດ້​ເສຍ​ຊີວິດ​ໃນ​ເວລາ​ຕໍ່​ມາ.

ການ​ເອົາ​ໄຟ​ເຜົນ​ຕົນ​ເອງ​ຂອງ​ພະ Gyatso ນີ້ເຮັດ​ໃຫ້ຈໍານວນ​ຂອງ​ພວກ​ຊາວ​ທິ​ເບ​ດທີ່​ເອົາ​ໄຟ​ເຜົາ​ຕົວ​ເອງ​ເພີ່ມ​ຂຶ້ນ​ເປັນ​ຢ່າງ​ໜ້ອຍ 21 ຄົນ​ໃນ​ຊ່ວງ​ປີຜ່ານມາ​ນີ້. ບັນດາ​ນັກ​ເຄື່ອນ​ໄຫວ​ກ່າວ​ວ່າ ​ເຊື່ອ​ກັນວ່າ​ມີ​ຊາວ​ທິ​ເບ​ດຢ່າງ​ໜ້ອຍ 12 ຄົນ​ແລ້ວໄດ້​ເສຍ​ຊີວິດ​ຈາກ​ບາດ​ແຜ​ທີ່ ໄດ້​ຮັບ​ຈາກ​ໄຟ​ໄໝ້ນັ້ນ.

ໃນ​ຫວ່າງ​ບໍ່​ເທົ່າ​ໃດ​ເດືອນ​ຜ່ານ​ມາ​ນີ້ ​ໄດ້​ເຫັນ​ການ​ປະ​ທ້ວງ​ຕໍ່ຕ້ານ​ຈີນ ເພີ່ມ​ຂຶ້ນ​ໃນ​ຂົງ​ເຂດ​ຕ່າງໆ​ທີ່​ມີ​ຊາວ​ທິ​ເບ​ດອາ​ໄສຢູ່​ໃນ​ຈີນ ອັນ​ເປັນ​ເຫດການຮ້າຍ​ແຮງ​ທີ່​ສຸດ​ນັບ​ແຕ່​ປີ 2008 ​ເປັນ​ຕົ້ນ​ມາ.

ລັດຖະບານ​ຈີນ​ກ່າວ​ຫາ​ອົງ​ດາ​ໄລ ລາ​ມະ ຜູ້​ນໍາ​ດ້ານ​ຈິດ​ໃຈ​ຂອງ​ຊາວ​ທິ​ເບ​ດທີ່​ລີ້​ໄພ​ໃນ​ຕ່າງປະ​ເທດ ​ແລະ​ພວກ​ອົງການ​ຈັດ​ຕັ້ງ​ຕ່າງໆ​ໃນ​ຕ່າງປະ​ເທດ​ເຊ່ນ ຂະ​ບວນການ​ເສລີ​ທີ​ເບ​ດ ທີ່​ມີ​ຫ້ອງການ​ປະຕິບັດ​ງານໃນ​ກຸງ​ລອນ​ດອນ ​ເປັນ​ຜູ້​ຍຸຍົງ​ໃຫ້​ເກີດ​ຄວາມວຸ້ນວາຍ​ນີ້.

XS
SM
MD
LG