ນັກບິນອະວະກາດ 3 ຄົນ ຈາກສະຖານີອະວະກາດນາໆຊາດ
ໄດ້ກັບຄືນລົງມາສູ່ໂລກ ຫຼັງຈາກການທີ່ ໄດ້ໄປປະຈຳຢູ່ເທິງ
ອະວະກາດເກືອບ 200 ມື້.
ຍານອະວະກາດ Soyuz ທີ່ບັນຈຸນັກບິນອະວະກາດ Terry Virts
ຂອງອົງການອະວະກາດສະຫະລັດຫຼື NASA, ທ່ານນາງ
Samantha Cristoferetti ຈາກອົງການອະວະກາດ ຢູໂຣບ
ແລະ ນັກບິນອະວະກາດຣັດເຊຍ ທ່ານ Anton Shkalerov
ໄດ້ກັບລົງມາຮອດໂລກຢ່າງປອດໄພ ໃນວັນພະຫັດວານນີ້ ຢູ່ທົ່ງ
ຫຍ້າອັນກວ້າງໃຫຍ່ ຂອງປະເທດ Kazakhstan.
ທັງສາມຄົນໄດ້ຂຶ້ນໄປຮອດສະຖານີອະວະກາດນາໆຊາດ ເມື່ອວັນທີ 24 ເດືອນພະຈິກ
ປີ 2014 ແລະ ໄດ້ໃຊ້ເວລາຫຼາຍກວ່າ 6 ເດືອນ ເພື່ອທຳການຄົ້ນຄວ້າ ແລະ ທົດລອງ
ເທັກໂນໂລຈີຕ່າງໆ.
ອົງການ NASA ເວົ້າວ່າ ພວກເຂົາໄດ້ໃຊ້ເວລາຢູ່ເທິງສະຖານີອະວະກາດ 199 ມື້ ແລະ
ບັນທຶກໄລຍະທາງຂອງການໂຄຈອນອ້ອມໂລກ ຫຼາຍກວ່າ 135 ລ້ານກິໂລແມັດ ຫຼື 84
ລ້ານໄມ.
ນັກບິນທີ່ຍັງເຫຼືອຢູ່ເທິງສະຖານີອະວະກາດ ແມ່ນຜູ້ບັນຊາການ ຄະນະ ສຳຫຼວດ 44 ຫຼື
Expedition 44 ທ່ານ Gennady Padalka ຂອງອົງການອະວະກາດສະຫະພັນຣັດເຊຍ
ນັກວິສະວະກອນ ການບິນ ທ່ານ Scott Kelly ຈາກອົງການ NASA ແລະ ທ່ານ Mikhail Kornienko ຈາກ Roscosmos.
ທ່ານ Kelly ແລະ ທ່ານ Kornienko ຢູ່ເທິງສະຖານີອະວະກາດໄດ້ເກືອບ 3 ເດືອນ
ໃນການປະຈຳການເປັນເວລາ 1 ປີ ຢູ່ເທິງສະຖານີແລ້ວ ເຊິ່ງອົງການ NASA ກ່າວວ່າ
"ພວກເຂົາຈະເກັບກຳຂໍ້ມູນ ທີ່ມີຄ່າ ເພື່ອວາງແຜນການອອກອະວະກາດເລິກ
ພາລະກິດໄລຍະຍາວ ໃນອະນາຄົດ."
ອົງການ NASA ເວົ້າວ່າ ພະນັກງານທີ່ຍັງເຫລືອ ຂອງຄະນະສຳຫຼວດ Expedition 44
ຊຶ່ງໄດ້ແກ່ນັກບິນອະວະກາດຂອງອົງການ NASA ທ່ານ Kjell Lindgen, ນັກອະວະກາດ
ຂອງຣັດເຊຍ ທ່ານ Oleg Kononenko ແລະ ທ່ານ Kimiya Yui ຈາກອົງການສຳຫລວດ
ອະວະກາດຍີ່ປຸ່ນ ແມ່ນມີແຜນທີ່ຈະຖືກສົ່ງຂຶ້ນ ຈາກຖານສົ່ງຍານອະວະກາດ Baikonur
ໃນປະເທດ Kazakhstan ໃນທ້າຍເດືອນ ກໍລະກົດນີ້.
