ສິງກະໂປ ພວມສືບຕໍ່ໄວ້ອາໄລ ເປັນເວລານຶ່ງອາທິດ ໃນທົ່ວ
ປະເທດໃຫ້ແກ່ມື້ລາງຜູ້ກໍ່ຕັ້ງປະເທດ ທ່ານ Lee Kuan Yew
ຊຶ່ງສົບຂອງທ່ານ ກຳລັງຖືກນຳໄປດອຍໄວ້ເພື່ອໃຫ້ປະຊາຊົນ
ໄປຢ້ຽມຄຳນັບໃນວັນພຸດມື້ນີ້.
ພວກໄວ້ທຸກຫລາຍພັນຄົນ ພາກັນຢືນແອອັດຢູ່ຕາມຖະໜົນ
ຫົນທາງ ຂອງສິງກະໂປ ເພື່ອຄຳນັບສົບ ທ່ານ Lee Kuan
Yew ທີ່ຜ່ານໄປ ຢູ່ໃນອູບແກ້ວຢອງໄວ້ຢູ່ເທິງລໍ້ແກ່ປືນໃຫຍ່
ຈາກບ້ານພັກປະທານາທິບໍດີ ໄປຫາຕຶກສະພາ.
ສົບຂອງທ່ານຈະຖືກນຳໄປດອຍໄວ້ ເພື່ອໃຫ້ປະຊາຊົນໄປຢ້ຽມ
ຄຳນັບ ຈົນກວ່າວັນສົ່ງສະການໃນວັນອາທິດຈະມາເຖິງນີ້ ຊຶ່ງຄາດວ່າຈະມີບັນດາແຂກ
ຜູ້ມີກຽດ ຕ່າງປະເທດຈາກທົ່ວໂລກເຂົ້າຮ່ວມ.
ຊາວສິງກະໂປ ເບິ່ງພິທີແຫ່ສົບ ທ່ານ Lee Kuan Yew
ທ່ານ Lee ທີ່ໄດ້ປົກຄອງປະເທດເກາະດອນແຫ່ງນີ້ ແຕ່ປີ 1959 ຫາ 1990 ໄດ້ເຖິງແກ່
ອະສັນຍະກຳໃນວັນຈັນທີ່ຜ່າມມາ ຮວມອາຍຸໄດ້ 91 ປີ ຫລັງຈາກໄດ້ຕໍ່ສູ້ກັບໂຣກປອດ
ບວມມາລະຍະນຶ່ງ.
ທ່ານໄດ້ເປັນ ນາຍົກລັດຖະມົນຕີ ສິງກະໂປ ຄົນທຳອິດ ຫລັງຈາກປະເທດດັ່ງກ່າວໄດ້ຮັບ
ສິດໃນການປົກຄອງຕົນເອງຢ່າງເຕັມທີ່ ຈາກການເປັນຫົວເມືອງຂື້ນຂອງອັງກິດ. ທ່ານ
ຍັງສືບຕໍ່ເປັນແຮງຊຸກຍູ້ແກ່ປະເທດຊາດ ຫລັງຈາກໄດ້ອອກກິນເບ້ຍບຳນານແລ້ວເມື່ອ
ສາມທົດສະວັດຕໍ່ມາ.
ທ່ານ Lee ໄດ້ຖືກຍ້ອງຍໍສັນລະເສີນ ໃນການວາງພື້ນຖານແກ່ສິງກະໂປ ໃຫ້ເຕີບໃຫຍ່
ຂະຫຍາຍໂຕຢ່າງຫລວງຫຼາຍ ແລະຈະເລີນຮັ່ງມີ ແຕ່ກໍໄດ້ຖືກຕິຕຽນຈາກຫລາຍໆຄົນ
ຊຶ່ງບໍ່ເຫັນພ້ອມກັບການປົກຄອງແບບຜະເດັດການຂອງທ່ານ.
ເຮົາຍັງມີລາຍງານກ່ຽວກັບການເຖິງແແກ່ອະສັນຍະກຳຂອງທ່ານ Lee Kuan Yew ມາ
ສະເໜີທ່ານ ຫລັງພາກຂ່າວ ກະລຸນາຕິດຕາມຮັບຟັງ.
