ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ແມ່ຍິງຫຼາຍພັນຄົນ ໄດ້ພາກັນເດີນຂະບວນ ຢູ່ໃນຝຣັ່ງ ເພື່ອຕ້ານພັກຝ່າຍຂວາຈັດ


ບັນດາແມ່ຍິງ ເດີນຂະບວນປະທ້ວງ ພັກຮ່ວມຊາດຂວາຈັດຂອງຝຣັ່ງ, ກ່ອນການເລື້ອງຕັ້ງລັດຖະສະພາທີ່ກຳລັງຈະມາເຖິງ,​ ໃນນະຄອນຫຼວງປາຣີ, ວັນທີ 23 ມິຖຸນາ 2024.
ບັນດາແມ່ຍິງ ເດີນຂະບວນປະທ້ວງ ພັກຮ່ວມຊາດຂວາຈັດຂອງຝຣັ່ງ, ກ່ອນການເລື້ອງຕັ້ງລັດຖະສະພາທີ່ກຳລັງຈະມາເຖິງ,​ ໃນນະຄອນຫຼວງປາຣີ, ວັນທີ 23 ມິຖຸນາ 2024.

ບັນດາແມ່ຍິງຫຼາຍພັນຄົນ ໄດ້ພາກັນອອກມາເດີນຂະບວນຢູ່ຕາມຖະໜົນຫົນທາງໃນເມືອງຕ່າງໆທົ່ວປະເທດຝຣັ່ງໃນວັນອາທິດວານນີ້ ເພື່ອປະທ້ວງພັກໂຮມຊາດຂວາຈັດ ຂອງ ທ່ານນາງ ມາຣິນ ເລີ ເພັນ (Marine Le Pen), ເນື່ອງຈາກຜົນໄດ້ຮັບຂອງການສຳຫຼວດຄວາມຄິດເຫັນສະແດງໃຫ້ເຫັນວ່າ ພັກດັ່ງກ່າວ ອາດຈະຊະນະການເລືອກຕັ້ງລັດຖະສະພາທີ່ກຳລັງຈະມາເຖິງນີ້, ອີງຕາມອົງການຂ່າວ Reuters.

ກຸ່ມ​ສິດທິ​ແມ່ຍິງ ແລະ​ສະ​ຫະ​ພັນແຮງງານປະມານ 200 ຄົນ ​ ໄດ້​ຈັດ​ການ​ເດີນ​ຂະ​ບວນ​ໃນເມືອງຕ່າງໆຫຼາຍສິບເມືອງ ຮວມ​ທັງ​ໃນ ປາຣີ ​ໂດຍ​ກ່າວ​ວ່າ ສິດທິ​ຂອງ​ແມ່ຍິງ​ຖືກ​ໂຈມ​ຕີ​ເມື່ອ​ປະ​ເທດ​ຕ່າງໆ​ ຖືກ​ຄວບ​ຄຸມ​ໂດຍ​ພັກ​ຝ່າຍ​ຂວາ​ຈັດ. ໃນປາຣີ, ແມ່ຍິງຫຼາຍກວ່າ 10,000 ຄົນໄດ້ປະທ້ວງຢ່າງສະຫງົບ, ຜູ້ຈັດຕັ້ງການປະທ້ວງ ກ່າວ.

ໃນເດືອນມີນາທີ່ຜ່ານມາ, ປະເທດຝຣັ່ງ ໄດ້ກໍານົດສິດທິໃນການເອົາລູກອອກ ໄວ້ຢູ່ໃນລັດຖະທໍາມະນູນຂອງຕົນ, ເຊິ່ງເປັນຄັ້ງທໍາອິດຂອງໂລກ, ແຕ່ສະມາຊິກສະພານິຕິບັນຍັດຂອງພັກ ຮ່ວມຊາດ ຫຼື RN ບາງຄົນ ໄດ້ຄັດຄ້ານກົດຫມາຍດັ່ງກ່າວ, ສົ່ງຜົນເຮັດໃຫ້ປະຊາຊົນບາງຄົນ ມີຄວາມເປັນຫ່ວງກ່ຽວກັບທັດສະນະຄະຕິຂອງພັກດັ່ງກ່າວ ຕໍ່ສິດທິຂອງແມ່ຍິງ.

“ໃນລະຫວ່າງການໂຕ້ວາທີກ່ຽວກັບການເຮັດໃຫ້ການແທ້ງລູກເປັນສິດຕາມລັດຖະທໍາມະນູນ, ພວກເຮົາສາມາດສັງເກດເຫັນໄດ້ຢ່າງຈະແຈ້ງວ່າ ບັນດາຜູ້ແທນຝ່າຍຂວາບໍ່ຮູ້ສຶກສະບາຍໃຈກ່ຽວກັບເລື້ອງນີ້ຫຼາຍ, ພວກເຂົາໄດ້ຮຽກຮ້ອງໃຫ້ມີເດັກນ້ອຍຊາວຝຣັ່ງເຕັມອູ່ເດັກນ້ອຍ,” ທ່ານ ນາງເຊຍລີ ເວີເດັນ (Shirley Wirden), ເຈົ້າຫນ້າທີ່ຜູ້ຮັບຜິດຊອບສິດທິແມ່ຍິງຂອງພັກ​ຄອມມູນິສຝຣັ່ງ ກ່າວ​ໃນ​ຂະນະ​ທີ່​ທ່ານ​ນາງ​ໄດ້​ເຂົ້າ​ຮ່ວມ​ການ​ປະ​ທ້ວງຢູ່​ນະຄອນຫຼວງ​ປາຣີໃນວັນອາທິດວານນີ້.

ພັກໂຮມຊາດ ຫຼື RN ແລະພັນທະມິດ ໄດ້ຖືກພົບວ່າ ມີຄະແນນນຳໃນການເລືອກຕັ້ງລັດຖະສະພາຝຣັ່ງຮອບທຳອິດ ໂດຍມີກຳນົດຈະຈັດຂຶ້ນໃນວັນທີ 30 ມິຖຸນານີ້, ດ້ວຍຄະແນນສຽງ 35.5 ເປີເຊັນ, ອີງຕາມຜົນຂອງການຢັ່ງຫາງສຽງໃນວັນອາທິດວານນີ້.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

ສົດ ລາຍການວິທະຍຸ-ໂທລະພາບ ພາກພາສາລາວ

XS
SM
MD
LG