ຄາດກັນວ່າ ຈະມີຫຼາຍພັນຄົນ ໄປຮ່ວມພິທີສົ່ງສະການສົບຂອງ
ທ້າວ Michael Brown ໃນວັນຈັນມື້ນີ້ ຢູ່ Saint Louis ເມືອງ
ຫລວງ ຂອງລັດ Missouri ທາງພາກກາງຂອງສະຫະລັດ ຊຶ່ງຜູ້
ກ່ຽວເປັນໄວລຸ້ນຜິວດຳບໍ່ມີອາວຸດ ທີ່ຖືກເຈົ້າໜ້າທີ່ຕຳຫລວດຜິວ
ຂາວ ຍິງຕາຍ ເມື່ອຕົ້ນເດືອນນີ້.
ທ້າວ Brown ໄວ 18 ປີ ຖືກນາຍຕຳຫລວດ Darren Wilson
ຍິງຕາຍ ໃນການປະເຊີນໜ້າກັນເມື່ອວັນທີ 9 ສິງຫາ ຢູ່ເມືອງ
Ferguson ເຂດຊານເມືອງ St. Louis.
ພິທີສົ່ງສະການໃນວັນຈັນມື້ນີ້ ຈະມີຂຶ້ນ ພາຍໃຕ້ການຕິດຕາມເບິ່ງຂອງເຈົ້າໜ້າທີ່ຕຳຫລວດ ຢ່າງໜັກ ເພື່ອປ້ອງກັນບໍ່ໃຫ້ເກີດຄວາມຮຸນແຮງ ຂຶ້ນມາໃໝ່ອີກ. ເມືອງ Ferguson ໂດຍສ່ວນໃຫຍ່ ແມ່ນຢູ່ໃນສະພາບ ທີ່ສະຫງົບງຽບ ໃນ 2-3 ມື້ທີ່ຜ່ານມານີ້ ລຸນຫຼັງໄລຍະເວລາເກືອບ 2 ອາທິດ ທີ່ມີການກໍ່ຄວາມວຸ້ນວາຍ.
ຄາດກັນວ່າ ຈະມີຜູ້ນຳສິດທິພົນລະເມືອງລະດັບຊາດ ຈຳນວນນຶ່ງ ໄປຮ່ວມພິທີ ລວມທັງ
ຄຸນພໍ່ Reverend Al Sharpton ທີ່ຈະເປັນຜູ້ກ່າວຄຳສະດຸດີ.
ເຈົ້າໜ້າທີ່ທຳນຽບຂາວ 3 ທ່ານ ກໍຈະເຂົ້າຮ່ວມດ້ວຍ ລວມທັງ ທ່ານ Broderick Johnson
ຫົວໜ້າໜ່ວຍສະເພາະກິດ My Brother’s Keeper ແລະ ທ່ານ Marlon Marshall ກັບ
ທ່ານນາງ Heather Foster ຈາກຫ້ອງວ່າການພົວພັນກັບມວນຊົນຂອງທຳນຽບຂາວ.
ຄຳບອກເລົ່າກ່ຽວກັບເຫດການຍິງທ້າວ Brown ທີ່ເກີດຂຶ້ນເມື່ອວັນທີ 9 ສິງຫານັ້ນ ແມ່ນ
ແຕກຕ່າງກັນ. ຝ່າຍຕຳຫລວດ ກ່າວຫາວ່າ ທ້າວ Brown ເປັນຜູ້ຮຸກຮານ ໃນລະຫວ່າງມີ
ການຕໍ່ສູ້ກັນ ກັບຕຳຫລວດ Wilson ແຕ່ພວກເຫັນເຫດການ ກ່າວວ່າ ຕຳຫລວດໄດ້ຍິງ
ທ້າວ Brown ໂດຍບໍ່ໄດ້ມີເກາະຜິດ ແລະວ່າ ລາວກຳລັງພະຍາຍາມທີ່ຈະ ມອບຕົວ.
ຫຼາຍກວ່າ 150 ຄົນ ໄດ້ຖືກຈັບກຸມ ຢູ່ໃນເມືອງ Ferguson ຕັ້ງແຕ່ ມີການປະທ້ວງເລີ້ມຂຶ້ນ
ໂດຍສ່ວນຫຼາຍແມ່ນຖືກຈັບ ເພາະບໍ່ປະຕິບັດຕາມ ຄຳຮຽກຮ້ອງ ຂອງເຈົ້າໜ້າທີ່ຕຳຫລວດ
ທີ່ໃຫ້ສະຫຼາຍຕົວ.
