ລິ້ງ ສຳຫລັບເຂົ້າຫາ

logo-print

​ເຈົ້າ​ໜ້າ​ທີ່​ລາວເວົ້າ​ວ່າ ​ການ​ລະ​ບາດ​ ຂອງເຊື້ອ​ໄວ​ຣັ​ສ​ໂຄ​ໂຣ​ນາ ມີ​ຜົນ​ກະ​ທົບຕໍ່​ ການ​ສ້າງ​ທາງ​ລົດ​ໄຟ ໃນລາວ ພຽງ​ເລັກ​ນ້ອຍ


​ການກໍ່​ສ້າງ​ທາງ​ລົດ​ໄຟຄວາມ​ໄວ​ສູງ ທີ່​ກຳ​ລັງ​ດຳ​ເນ​ີນ​ໄປ​ຢູ່​ໃນເຂດ​ເມືອງ​ນາ​ຊາຍ​ທອງ, ນະ​ຄອນ​ຫລວງວຽງ​ຈັ​ນ​ຂອງ ສ​ປ​ປ ລາວ

ການເກືອດຫ້າມບໍ່ໃຫ້ຄົນເດີນທາງຢູ່​ໃນ​ບາງ​ແຂວງແລະ​ເມືອງ​ຂອງ​ຈີນ ເພື່ອປ້ອງກັນ​
ການ​ແຜ່​ຜາຍເຊື້ອໄວຣັສໂຄໂຣນາ ຫລື ໂຄວິດ 19 ນັ້ນ ໄດ້​ເລີ້ມເຮັດໃຫ້ໂຄງການໃຫຍ່ໆ
ຂອງຈີນ ທີ່ຮ່ວມລົງ​ທຶນ​ກັບຕ່າງປະເທດ ເຊັ່ນ ໂຄງການ ນຶ່ງ ແລວ ນຶ່ງເສັ້ນທາງໄດ້ຮັບ
ຜົນກະທົບ ເມື່ອກໍາມະກອນຈີນຈໍານວນຫລາຍບໍ່ສາມາດເດີນທາງກັບຄືນເຮັດວຽກຕາມ​
ກຳ​ນົດຫລັງ​ຈາກ​ພັກ​ປີ​ໃໝ່​ຈີນ​ແລ້ວ ​ແລະການສະໜອງວັດຖຸກໍ່ສ້າງບາງຢ່າງບໍ່ທ່ວງທັນ
ເວລາຍ້ອນໂຮງງານຫລາຍແຫ່ງຂອງ​ຈີນຖືກຕັດຂາດ ຈາກວັດຖຸນຳ​ເຂົ້າທີ່ ໃຊ້ປ້ອນໃຫ້
ໂຮງງານຜະ​ລິດ​ວັດ​ສະ​ດຸກໍ່​ສ້າງຕ່າງໆ. ສ່ວນການກໍ່ສ້າງທາງລົດໄຟຄວາມໄວສູງ ທີ່ມີ
ການໃຊ້ແຮງງານຂອງຈີນຫລາຍກວ່າ 32 ພັນຄົນນັ້ນໄດ້​ຮັບ​ຜົນກະທົບຢູ່ແຕ່ກໍຢູ່ໃນລະ
ດັບຕໍ່າ, ອີງຕາມການສໍາພາດຂອງພະນັກງານຂັ້ນສູງທ່ານນຶ່ງຂອງລາວ. ດ້ວຍເຫດໃດ
ຈຶ່ງເປັນເຊັ່ນນັ້ນ ກິ່ງ​ສະ​ຫວັນມີ​ລາຍ​ລະ​ອຽດມາ​ສະ​ເໜີ​ທ່ານໃນ​ອັນ​ດັບ​ຕໍ່​ໄປ.

ໂຮງງານຫລາຍແຫ່ງຢູ່ໃນຈີນຍັງຖືກປິດໄວ້ຢູ່ ຫລືບໍ່ ກໍເປີດໃຫ້ຄົນໄປເຮັດວຽກ ແຕ່ກໍບໍ່
ເຕັມກໍາລັງການຜະລິດເໝືອນກັນ​ກັບເມື່ອກ່ອນ ຍ້ອນ​ການ​ລະ​ບາດ​ຂອງ​ເຊື້ອ​ໄວ​ຣັ​ສໂຄ​
ໂຣ​ນາ ຫລືໂຄວິດ-19, ອີງຕາມລາຍງານຢູ່ໃນເວັບໄຊທ໌ ຂອງອົງການຂ່າວຣອຍເຕີ ໃນ
ວັນທີ 18 ກຸມພາ 2020 ຜ່ານ​ມາ. ສະພາບການນີ້ ໄດ້ເຮັດໃຫ້ໂຄງການ ກໍ່ສ້າງພື້ນຖານ
ໂຄງລ່າງຂອງ​ຈີນຮ່ວມ​ກັບ​ຕ່າງ​ປະ​ເທດ ເຊັ່ນໂຄງການນຶ່ງແລວ ນຶ່ງເສັ້ນທາງທີ່ເປັນໂຄງ
ການລິເລີ້ມຂຶ້ນໂດຍປະທານ ປະເທດສີ ຈິ້ນຜິງຂອງຈີນນັ້ນ ຊັກຊ້າລົງ. ທັງນີ້ກໍເປັນຍ້ອນ
ວ່າ ໂຄງການທີ່​ວ່ານີ້ ໃຊ້ວິຊາການ, ແຮງງານ ຕະຫລອດເຖິງວັດຖຸ, ອຸປະກອນ ແລະ
ເຄື່ອງຈັກສ່ວນໃຫຍ່ຈາກຈີນ. ພ້ອມ​ກັນ​ນັ້ນການເກືອດຫ້າມບໍ່ໃຫ້ຄົນເດີນທາງຢູ່​ໃນ​
ບາງ​ແຂວງ ເຊັ່ນ​ແຂວ​ງຫູ​ເບ ບ່ອນ​ທີ່​ມີ​ລາຍ​ງານ​ວ່າເຊື້ອ​ໄວ​ຣັ​ສໂຄ​ໂຣ​ນາເກີດ​ຂຶ້ນ​ທຳ​ອິດ
ນັ້ນໄວ້ ເພື່ອສະກັດກັ້ນການແຜ່ລະບາດຂອງເຊື້ອພະ​ຍາດທີ່ໄດ້ເຮັດໃຫ້ຫລາຍກວ່າ
2,200 ຄົນເສຍຊີວິດແລ້ວຢູ່ໃນປະເທດດັ່ງກ່າວນັ້ນ ກໍໄດ້ເຮັດໃຫ້ ຊາວຈີນລວມທັງ
ນັກວິຊາການ ແລະກໍາມະກອນກໍ່ສ້າງຫລາຍ​ຄົນ ໃນໂຄງ ການນີ້ ບໍ່ສາມາດກັບຄືນ
ໄປເຮັດວຽກຢູ່ຕ່າງປະເທດໄດ້ໃນ​ເວ​ລານີ້.

ສ່ວນໂຄງການສ້າງທາງລົດໄຟຄວາມໄວສູງລາວ-ຈີນ ຊຶ່ງເປັນສ່ວນນຶ່ງຂອງໂຄງການ
ນຶ່ງແລວ ນຶ່ງເສັ້ນທາງນີ້ ກໍໄດ້ຮັບຜົນກະທົບເຊັ່ນກັນ ແຕ່ວ່າ ກໍຢູ່ໃນລະດັບຕໍ່າ, ອີງຕາມ
ຄໍາເຫັນຂອງເຈົ້າໜ້າທີ່ຂັ້ນສູງຂອງບໍລິສັດທາງລົດໄຟລາວ-ຈີນ ທີ່ໃຫ້ສໍາພາດຕໍ່ ວີໂອເອ
ໃນອາທິດແລ້ວນີ້ ຊຶ່ງທ່ານກ່າວດັ່ງນີ້:

“ປັດຈຸບັນ ມັນກະດໍາເນີນປົກກະຕິເນາະ ແຕ່ວ່າ ກໍຢາກຂາດໆ ຫລືຊ້າໄປແດ່ຢູ່ໂຊນອຸ
ດົມໄຊ ຫາ
ບໍ່ເຕັນຫັ້ນເນາະ ເຫັນວ່າວຽກ ທີ່ເຂົາເຮັດຢູ່ຫັ້ນກະບໍ່ໄດ້ເຕັມຮ້ອຍ (100),
ມັນອາດບໍ່ດໍາເນີນໄປສະດວກປານໃດ ບໍ່ຄືກັບຊ່ວງທີ່ບໍ່ມີພະຍາດຫັ້ນນາະ ເພາະ ສ່ວນ
ຫຼາຍຈີນເຂົາເມືອຫຼາຍ, ການກັບມາຂອງເຂົາບາງຄົນກໍ່ໄດ້ກັບ ບາງຄົນ ກໍ່ບໍ່ໄດ້ກັບ, ບາງ
ຄົນທີ່ບໍ່ຢູ່ໃນເຂດຊຸ່ມສ່ຽງກໍມີແຕ່ກວດ ຄັນເຫັນວ່າບໍ່ມີແລ້ວ ເຂົາກໍ່ສົ່ງມາບາງສ່ວນ. ສະ​
ນັ້ນ ບາງຊ່ວງ ບາງສັນຍາທີ່ວ່າ ຄົນເຂົາກັບຫລາຍຫັ້ນ ມັນກໍ່ມີການສະລໍຕົວ ຫຼືວ່າຊັກ
ຊ້າ ໜ້ອຍນຶ່ງ. ແຕ່ວ່າ ຢູ່​ໃນ​ບາງ​ຊ່ວງ ເຊັ່ນແຖວວັງວຽງ ແຖວຫຼວງພະບາງ ມາຫານະ
ຄອນຫຼວງວຽງຈັນເຮົານີ້ ຖືວ່າມີການກໍ່ສ້າງປົກກະຕິເນາະ, ພະນັກງານເຂົາ ແຮງງານ
ຄົນຈີນກັບເມືອຢູ່ ແຕ່ວ່າກໍບໍ່ ຫລາຍ. ສະນັ້ນວຽກຊ່ວງນີ້ຖືວ່າ ປົກກະຕິຫັ້ນຫລະ.”

ເມື່ອຖາມວ່າ​ເປັນ​ຫຍັງກໍາມະກອນຈີນໃນ​ໂຄງ​ການ​ສ້າງ​ທາງ​ລົດ​ໄຟ​ນີ້ ໂດຍ​ສະ​ເພາະຢູ່
​ໃນເຂດ​ແຕ່​ຫລວງ​ພະ​ບາງ​ຫາ​ວຽງ​ຈັນ​ນັ້ນ ຈຶ່ງບໍ່​ໄດ້​ກັບ​ໄປ​ບ້ານ​ຫລາຍໃນຊ່ວງປີໃໝ່ ຫລື ກຸດຈີນນັ້ນທ່ານຕອບວ່າ:
“ໃນຊ່ວງນີ້ແມ່ນໃນຊ່ວງທີ່ເຂົາຂຸ້ນຂ້ຽວຫັ້ນແຫຼະ ວ່າຊັ້ນຊາເນາະ. ສະນັ້ນ ບັນດາແຮງ
ງານຈີນຜູ້ໃດທີ່ວ່າກັບຫັ້ນນະ ກໍແມ່ນເນື່ອງຈາກວ່າເປັນຜູ້ທີ່ມີ ຄວາມຈໍາເປັນແທ້ໆ. ສ່ວນບາງຈໍານວນທີ່ບໍ່ໄດ້ກັບກໍຖືວ່າດໍາເນີນການ​ເຮັດວຽກຕາມປົກກະຕິ.”


ຕາມ​ການ​ສັງ​ເກດ​ຂອງ​ປະ​ຊາ​ຊົນ​ທ່ານ​ນຶ່ງ​ທີ່​ອາ​ໄສ​ຢູ່ເຂດ​ໃກ້​ກັບ​ບ່ອນ​ສ້າງ​ທາງ​ລົດໄຟ​ຢູ່
​ໃນ​ເມືອງ​ນາ​ຊາຍ​ທອງ​ກໍໃຫ້​ຄຳເຫັນ​ກົງກັນ​ວ່າ:
“ກະເຫັນຢູ່ຄົນຈີນເຂົາເຮັດວຽກຕາມເສັ້ນທາງລົດໄຟຊ່ວງອາທິດແລ້ວນີ້ ໄດ້ຍິນເຂົາວ່າ ພະຍາດໂຄໂລນອກ ໂຄໂລນານີ້ນະ ດຽວນີ້ຄົນລາວຄົນຈີນ ກໍ່ເຮັດວຽກເປັນປົກ ກະຕິຢູ່ ກະບໍ່ມີຫຍັງເກີດຂຶ້ນ.”

ໂຄງ​ການ​ທາງ​ລົດໄຟ​ທີ່​ມີ​ມູນ​ຄ່າ​ການ​ລົງ​ທຶນ 5.8 ຕື້​ໂດ​ລາ ​ຊຶ່ງ​ກວາມ​ເອົາປະ​ມານ 32.00 ເປີ​ເຊັນຂອງ​ລວມຍອດ​ຜະ​ລິດ​ຕະ​ພັນ​ພາຍ​ໃນ​ຂອງ​ລາວນັ້ນ ​ຈີນມີ​ຫຸ້ນ​ສ່ວນຢູ່ 70 ເປີ​ເຊັນ ແລະ ລາວແມ່ນ 30 ເປີ​ເຊັນ ​ຂອງ​ການ​ລົງ​ທຶນທັງ​ໝົດ. ​ໂຄງ​ການ​ດັ່ງ​ກ່າວ​ສະ​ໜອງວຽກ​ເຮັດ​ງານ​ທຳ​ໃຫ້​ກຳ​ມະ​ກອນ​ລາວ​ປະ​ມານ 1,200 ຄົນ ໃນ​ຂະ​ນະ​ທີ່ຈ້າງ​ກຳ​ມະ​ກອນ ແລະນັກ​ວິ​ຊາ​ການຈີນ ຫລາຍກວ່າ 32 ພັນຄົນ.

ເມື່ອຖາມເຖິງຄວາມກ້າວໜ້າໃນການສ້າງທາງລົດໄຟທີ່​ມີ​ຄວາມ​ຍາວ​ 414 ກິ​ໂລ​ແມັດ​ ປາຍນີ້ ​ວ່າ​ມັນ​ຈະ​ສຳ​ເລັດ​ຕາມ​ແຜນ​ການກໍ​ຄື​ໃນ​ເດືອນ​ທັນ​ວາ​ປີ​ໜ້າ​ນີ້ ຫລືບໍ່ນັ້ນເຈົ້າ​ໜ້າ​ທີ່​ຂັ້ນ​ສູງ​ຂອງ​ບໍ​ລິ​ສັດລົດ​ໄຟ​ລາວ-ຈີນ​ທ່ານ​ນັ້ນກໍ​ຕອບ​ວ່າ:
“ກະຄົງຈະບໍ່ມີບັນຫາຫຍັງດອກ ເພາະດຽວນີ້ກໍ່ສໍາເລັດໄດ້ປະມານ 73% ແລ້ວໄດ໋ ກະຍັງເຫຼືອອີກເກືອບສອງປີ ກະຍັງພຽງແຕ່ 27% ເທົ່ານັ້ນ ຄົງຈະ ບໍ່ມີບັນຫາຫຍັງ
ດອກຄິດວ່າ ຖ້າບໍ່ມີອັນອື່ນນອກເໜືອໄປກວ່ານີ້.”

ສະຫຼຸບແລ້ວ ເຖິງ​ແມ່ນ​ວ່າການ​ລະ​ບາດຂອງ​ເຊື້ອ​ໄວ​ຣັ​ສ​ໂຄ​ໂຣ​ນາ ຫລື ໂຄວິດ 19 ຈະ​ມີ​ຜົນ​ກະ​ທົບ​ເຮັດ​ໃຫ້​ກຳ​ມະ​ກອນ​ຈີນບາງ​ຈຳ​ນວນບໍ່​ສາ​ມາດ​ກັບ​ມາ​ເຮັດ​ວຽກ​ໄດ້​ຕາມ​ກຳ​ນົດ​ກໍ​ຕາມ ​ເຈົ້າ​ໜ້າ​ທີ່​ລາວເວົ້າ​ວ່າ ແຕ່ມັນ​ເຮັດ​ໃຫ້​ການ​ສ້າງ​ທາງ​ລົດ​ໄຟ​ຄວາມ​ໄວ​ສູງ​ດັ່ງ​ກ່າວ​ຊັກ​ຊ້າ​ໄປ​ພຽງ​ເລັກໜ້ອຍ ແລະ​ກໍ​ໝັ້ນ​ໃຈ​ວ່າ​ໂຄງ​ການດັ່ງ​ກ່າວຍັງ​ຈະ​ສຳ​ເລັດ​ຕາມ​ກຳ​ນົດເວ​ລາ​ທີ່​ວາງ​ໄວ້ຢູ່​.

ທ່ານອາດຈະມັກເລື້ອງນີ້ຄືກັນ

XS
SM
MD
LG