ເຖິງແມ່ນກ່ອນທີ່ຊາວອາເມຣິກັນບາງຄົນຍັງພາກັນກິນເຂົ້າໃນວັນຂອບຄຸນພະເຈົ້າບໍ່ທັນ ແລ້ວເປັນທີ່ຮຽບຮ້ອຍເທື່ອ ແຕ່ຜູ້ຄົນກໍເລີ້ມເຂົ້າແຖວກັນ ຊຶ່ງບາງຄົນແມ່ນພາກັນໄປກາງເຕັ້ນນອນຖ້າ ຢູ່ນອກຮ້ານຂາຍເຄື່ອງແຫ່ງຕ່າງໆ ພ້ອມແລ້ວທີ່ຈະສວຍໂອກາດ ຊື້ເຄື່ອງຂອງລາຄາຖືກເປັນພິເສດ ໃນວັນສຸກຫຼັງວັນຂອບຄຸນພະເຈົ້າ ທີ່ເອີ້ນວ່າ Black Friday.
ວັນສຸກຫຼັງວັນຂອບຄຸນພະເຈົ້ານີ້ ຕາມທຳນຽມແລ້ວ ແມ່ນວັນເລີ້ມຕົ້ນ ຂອງການເລີ້ມຊື້ເຄື່ອງຊື້ຂອງສຳລັບໂອກາດວັນສະຫລອງບຸນ ຢູ່ໃນສະຫະລັດ ຊຶ່ງເປັນວັນທີ່ພວກພໍ່ຄ້າຂາຍຍ່ອຍ ສະແຫວງຫາກຳໄລຈາກການຂາດທຶນຫຼືຕິດໜີ້ ໄປສູ່ການສ້າງລາຍຮັບທີ່ສຳ ຄັນ.
ໃນໄລຍະສອງສາມປີຜ່ານມານີ້ຄວາມຕື່ນເຕັ້ນໃນການຊອບປິ້ງຫຼືຊື້ເຄື່ອງຊື້ຂອງແມ່ນໄດ້ ເພີ້ມຂຶ້ນ ຄື Black Friday ເວລານີ້ ແມ່ນເລີ້ມຊອບປິ້ງໃນວັນສຸດສັບປະດາເປັນເວລາ 4 ມື້ ທີ່ຮວມທັງທຸລະກິດຂະໜາດນ້ອຍ ໃນວັນເສົາ ແລະວັນອາທິດ ຊຶ່ງມີການຮຽກຮ້ອງໃຫ້ພວກໄປຊື້ເຄື່ອງຊື້ຂອງ ຊ່ອຍອຸດໜຸນ ທຸລະກິດ ຢູ່ໃນເຂດທ້ອງຖິ່ນ ໃນຂະນະທີ່ Cyber Monday ເປັນມື້ທີ່ມີການຊື້ເຄື່ອງ ທາງອິນເຕີແນັດທີ່ໃຫຍ່ທີ່ສຸດ ໃນຮອບປີ.
ຢູ່ທົ່ວປະເທດ ນັບແຕ່ລັດຟລໍຣິດາໄປຫາລັດໂອຮາຍໂອຕະຫຼອດທັງແຄລີຟໍເນຍນັ້ນພວກ ທີ່ໄປຊື້ເຄື່ອງແມ່ນໄດ້ພາກັນເລີ້ມເຂົ້າແຖວແລະໄປນອນຖ້າຢູ່ນອກຮ້ານຕ່າງໆທີ່ວາງແຜນຈະເປີດໃນວັນຂອບຄຸນພະເຈົ້າດ້ວຍການຂາຍຫລຸດລາຄາຢ່າງໃຫຍ່.
ໃນວັນພະຫັດວານນີ້ ຮ້ານ Kmart ເລີ້ມເປີດແຕ່ 6 ໂມງເຊົ້າ ພ້ອມກັບຮ້ານອື່ນໆຮວມທັງ JCPenney, Best Buy ແລະຮ້ານ Target ທີ່ໄດ້ພາກັນເປີດຕະຫລອດມື້.
ພວກໄປຊື້ເຄື່ອງ ຢູ່ຮ້ານສູນກາງໃຫຍ່ Macy’s ທີ່ນະຄອນນິວຢອກ ໄດ້ພາກັນໄປລໍຖ້າ ໃຫ້ປະຕິຮ້ານເປີດ ເພື່ອຂາຍຫລຸດລາຄາ ກ່ອນມື້ Black Friday ໃນຕອນບ່າຍວັນພະ ຫັດວານນີ້. ຮ້ານ Macy’s ກ່າວວ່າ ມີ 16,000 ຄົນໄດ້ໄປເຂົ້າ ແຖວກ່ອນທີ່ຮ້ານຊຶ່ງຕັ້ງ ຢູ່ທີ່ເກາະ Manhattan ເປີດໃນເວລາ 5 ໂມງແລງ.
ມີຮ້ານສັບພະສິນຄ້າຫລາຍໆແຫ່ງ ໄດ້ພາກັນເປີດ ໃນຕອນຄ່ຳວັນພະຫັດວານນີ້ຫຼືບໍ່ກໍ ຕອນເຊົ້າມືດຂອງວັນສຸກມື້ນີ້.
