ຕໍາຫລວດໄທກ່າວວ່າ ຜູ້ຕ້ອງສົງໄສເປັນນັກຄ້າອາວຸດຊາວຣັດເຊຍ ນາຍ Viktor Bout
ກໍາລັງເດີນທາງມາຍັງສະຫະລັດອະເມຣິກາ ເພື່ອມາຂຶ້ນສານດໍາເນີນຄະດີ ຊຶ່ງເຮັດໃຫ້ການ
ຕໍ່ສູ້ກັນລະຫວ່າງ Washington ແລະ Moscow ທີ່ຍືດເຍື້ອຍາວນານ ມາສອງປີເຄິ່ງ
ກ່ຽວກັບວ່າຄວນຈະສົ່ງໂຕຜູ້ກ່ຽວໄປໃຫ້ໃຜນັ້ນ ສິ້ນສຸດລົງ.
ຕໍາຫລວດກ່າວວ່າ ເຮືອບິນຮັບເໝົາຂອງສະຫະລັດໄດ້ເດີນທາງອອກຈາກກຸງເທບພ້ອມ
ກັບນາຍ Bout ໃນຕອນບ່າຍວັນອັງຄານມື້ນີ້ ພຽງບໍ່ເທົ່າໃດຊົ່ວໂມງຫຼັງຈາກ ນາຍົກລັດ
ຖະມົນຕີ ອະພິສິດ ເວດຊາຊິວະ ໄດ້ກ່າວຕໍ່ພວກນັກຂ່າວວ່າ ທາງລັດຖະບານຂອງທ່ານ
ໄດ້ຕັດສິນໃຈ ປ່ອຍໃຫ້ມີການສົ່ງໂຕນາຍ Boot ມາຍັງສະຫະລັດ.
ກະຊວງການຕ່າງປະເທດຂອງຣັດເຊຍທີ່ກຸງມອສກູ ກ່າວຕິຕຽນການເຄື່ອນໄຫວດັ່ງກ່າວວ່າ
ຜິດກົດໝາຍແລະມີສາເຫດທາງການເມືອງໂດຍກ່າວຫາວ່າ ບໍ່ໄດ້ມີການນໍາໃຊ້ໝົດທາງ
ເລືອກທາງກົດໝາຍ ໃນຄະດີຂອງນາຍ Bout ນັ້ນ. ສານອຸທອນໄດ້ອະນຸມັດໃຫ້ການສົ່ງ
ຜູ້ຮ້າຍຂ້າມແດນໃຫ້ສະຫະລັດ ໃນເດືອນສິງຫາ ແຕ່ວ່າການດໍາເນີນຂັ້ນຕອນນັ້ນ ແມ່ນ
ໄດ້ຊັກຊ້າລົງ ຍ້ອນໄດ້ມີການຕັ້ງຂໍ້ຫາອັນທີ່ສອງ.
ນາຍ Bout ແມ່ນໄດ້ຖືກຂໍ້ຫາໃນຖານຄ້າຂາຍອາວຸດທີ່ພາໃຫ້ມີການເຮັດສົງຄາມແລະ
ຕໍ່ສູ້ກັນໃນ Africa, ອະເມຣິກາໃຕ້ ແລະພາກຕາເວັນອອກກາງ. ສະຫະລັດຕ້ອງການ
ທີ່ຈະດໍາເນີນຄະດີນາຍ Bout ໃນຂໍ້ຫາສົມຮູ້ຮ່ວມຄິດໃນການສັງຫານຊາວອະເມຣິກັນ
ແລະສະໜັບສະໜູນອົງການກໍ່ການຮ້າຍນໍາ.
