ຄະນະລັດຖະບານທີ່ນຳພາໂດຍທະຫານຂອງໄທ ອາດຈະຕົກລົງກັນຢ່າງເປັນທາງການໂດຍໄວເທົ່າທີ່ຈະໄວໄດ້ໃນສັບປະດາໜ້ານີ້ ກ່ຽວກັບການເຂົ້າເປັນສະມາຊິກກຸ່ມການຄ້າພາຄີຂ້າມມະຫາສະມຸດປາຊິຟິກ ຫຼັງຈາກທີ່ໄດ້ຮັບສັນຍານຢ່າງຈະແຈ້ງ ຈາກສະມາຊິກ ໃນຄະນະລັດຖະບານ ໃນການໃຫ້ການສະໜັບສະໜຸນ ຕໍ່ການເຂົ້າຮ່ວມກຸ່ມການຄ້າທີ່ໃຫຍ່ທີ່ສຸດໃນປະຫວັດສາດ.
ຮອງນາຍົກລັດຖະມົນຕີຂອງໄທ ທ່ານ ສົມຄິດ ຈະຕຸສຣີພິທັກ ໄດ້ກ່າວກັບຜູ້ນຳ ທຸລະກິດຊາວຍີ່ປຸ່ນໃນນະຄອນໂຕກ່ຽວວ່າ ໄທຈະຮ້ອງຂໍໃຫ້ຍີ່ປຸ່ນສະໜັບສະໜຸນ ຕໍ່ການເຂົ້າຮ່ວມກຸ່ມການຄ້າທີ່ນຳພາໂດຍສະຫະລັດ ໃນເວລາທີ່ມີການພິຈາລະນາຮັບເອົາສະມາຊິກເພີ່ມຕື່ມ ໃນປີ 2018.
ລັດຖະມົນຕີກະຊວງພານິດ ທ່ານນາງ Apiradi Tantraporn ຜູ້ນຳພາຄະນະກຳມະການກະກຽມການເຂົ້າຮ່ວມພາຄີຂ້າມມະຫາສຸມຸດປາຊິຟິກ ໄດ້ກ່າວເພີ່ມໃນວັນອັງຄານຜ່ານມານີ້ວ່າ ຣາດຊະນາຈັກ ຈຳເປັນທີ່ຈະປັບປຸງການແຂ່ງຂັນໃດໆ ເພື່ອຕຽມພ້ອມ ໃນການເຂົ້າຮ່ວມກຸ່ມການຄ້າທີ່ວ່ານີ້. ຫຼັງຈາກທີ່ໄດ້ຢ້ຽມຢາມນະຄອນຫຼວງວໍຊີງຕັນ ໃນເດືອນເມສາຜ່ານມານີ້ ທ່ານນາງ Apiradi ໄດ້ກ່າວວ່າ ລັດຖະບານສະຫະລັດ ໄດ້ສົ່ງເສີມໃຫ້ໄທ ດັດແກ້ ກົດໝາຍແລະລະບຽບການຕ່າງໆ ໃນຫຼາຍໆພາກສ່ວນ ຖ້າຫາກໄທຕ້ອງການຢາກເຂົ້າຮ່ວມໃນກຸ່ມການຄ້ານີ້.
ນັກການທູດໄທ ທ່ານ Jesda Tivayanond ປະຈຳສຳນັກງານນາຍົກລັດຖະມົນຕີ ໄດ້ກ່າວຕໍ່ VOA ໃນວັນພຸດວານນີ້ວ່າ ນາຍົກລັດຖະມົນຕີ Prayuth Chan-ocha ຈະພົບປະໃນສັບປະດາໜ້າ ກັບຄະນະທີ່ປຶກສາເສດຖະກິດນາໆຊາດຂອງທ່ານ ເພື່ອສົນທະນາຫາລືກ່ຽວກັບການຍື່ນໃບສະໝັກເຂົ້າເປັນສະມາ ຊິກໃນກຸ່ມການຄ້າພາຄີຂ້າມມະຫາສຸມຸດປາຊິຟິກ.
ການຕັດສິນໃຈຢ່າງເປັນທາງການໂດຍຄະນະລັດຖະບານກ່ຽວກັບການເຂົ້າເປັນ ສະມາ ຊິກໃນກຸ່ມການຄ້າພາຄີຂ້າມມະຫາສະມຸດປາຊີຟິກ ຈະມີຂຶ້ນໃນການປະ ຊຸມໃນວັນທີ 8 ມິຖຸນາ ອີງຕາມເຈົ້າໜ້າທີ່ລັດຖະບານ.
