ນາຍົກ ລມຕ ໄທ ທ່ານອະພິສິດ ເວດຊາຊີວະ ກ່າວວ່າ ທາງການຈະ ເຂົ້າຍຶດເອົາບໍລິເວນທີ່ພວກປະທ້ວງຕໍ່ຕ້ານລັດຖະບານ ໃຊ້ເປັນຊຸມນຸມປະທ້ວງຂອງພວກເຂົາ ໃນໃຈກາງນະຄອນຫລວງບາງກອກນັ້ນຄືນ ແຕ່ທ່ານບໍ່ໄດ້ບອກໃຫ້ຮູ້ວ່າ ເວລາໃດ.
ໃນຄຳປາໃສທາງໂທລະພາບ ວັນອາທິດມື້ນີ້ ໂດຍມີຜູ້ບັນຊາການກອງທັບ ນາຍພົນອານຸພົງ ເຜົ່າຈິນດາ ຢູ່ຄຽງຂ້າງທ່ານນັ້ນ ທ່ານອະພິສິດເວົ້າເນ້ນວ່າ ການຂັບໄລ່ພວກປະທ້ວງເສື້ອແດງໃຫ້ແຕກຜ່າຍສະລາຍໂຕ ແມ່ນພຽງສ່ວນນຶ່ງເທົ່ານັ້ນຂອງແຜນການແກ້ໄຂວິກິດການການເມືອງສຳລັບໝົດທັງປະເທດ.
ສ່ວນນາຍພົນອານຸພົງນັ້ນເວົ້າວ່າ ການເຄື່ອນໄຫວດັ່ງກ່າວຈະເປັນໄປ ຕາມວິທີທາງກົດໝາຍ. ພ້ອມດຽວກັນ ທ່ານປະຕິເສດວ່າ ບໍ່ໄດ້ມີການ ແຕກແຍກກັນຢູ່ໃນກອງທັບ. ມີການເຊື່ອກັນວ່າ ມີພວກສະໜັບສະໜູນຝ່າຍເສື້ອແດງແຊກຊຶມຢູ່ພາຍໃນກຳລັງຮັກສາຄວາມປອດໄພຂອງໄທ.
ຂະນະທີ່ກຳລັງອອກອາກາດຢູ່ນັ້ນ ປາກົດວ່າໂທລະພາບໄດ້ມອດໄປເປັນເວລາສັ້ນ ຊຶ່ງທ່ານອະພິສິດໄດ້ກ່າວໃນເວລາຕໍ່ມາວ່າ ມີຄົນຈຳ ນວນນຶ່ງໄດ້ໄປລົບກວນສັນຍານດາວທຽມ.
ການກ່າວຄຳປາໃສຂອງນາຍົກ ລມຕ ໄທໃນມື້ນີ້ ມີຂຶ້ນຫລັງຈາກທີ່ທ່ານອະພິສິດໄດ້ປະຕິເສດຂໍ້ສະເນີຂອງພວກປະທ້ວງ ທີ່ວ່າພວກເຂົາຈະຢຸດເຊົາການຍຶດເອົາໃຈກາງນະຄອນຫລວງບາງກອກ ຖ້າຫາກທ່ານ ຍອມຍຸບສະພາ ພາຍໃນເວລາ 30 ມື້. ທ່ານອະພິສິດກ່າວໃນມື້ວານນີ້ ວ່າ ທ່ານຈະບໍ່ເຈລະຈາກັບພວກປະທ້ວງເສື້ອແດງ ເພາະວ່າພວກເຂົາໃຊ້ຄວາມຮຸນແຮງແລະການນາບຂູ່ໃຫ້ປະຊາຊົນຢ້ານກົວ.
