ແຜນການຂຶ້ນລາຄາເຂົ້າໃໝ່ນັ້ນເປັນຄໍາໝັ້ນສັນຍາອັນສໍາຄັນດ້ານນະໂຍບາຍ ທີ່ພັກເພື່ອໄທ
ຂອງນາຍົກລັດຖະມົນຕີ ຍິ່ງລັກ ຊິນນະວັດ ໄດ້ໃຫ້ໄວ້ເພື່ອຮັບປະກັນໃຫ້ໄດ້ຮັບການສະໜັບ
ສະໜຸນພວກຊາວນາຈໍານວນແປດລ້ານຄົນຂອງປະເທດໄທ ໃນການເລືອກຕັ້ງທົ່ວປະເທດ
ເມື່ອເດືອນກໍລະກົດຜ່ານມາ.
ອີງຕາມແຜນການດັ່ງກ່າວແລ້ວ ລັດຖະບານຈະຈ່າຍຄ່າເຂົ້າຈ້າວທໍາມະດາ ໃຫ້ແກ່ພວກ
ຊາວນາ ໃນລາຄາເກືອບຮອດ 500 ໂດລາຕໍ່ເຂົ້ານຶ່ງຕັນແລະ 650 ໂດລາ ສໍາຫລັບເຂົ້າ
ຈ້າວຫອມມະລິຄຸນນະພາບພິເສດ ຊຶ່ງເມື່ອຄິດໄລ່ແລ້ວ ກໍເປັນການຂຶ້ນລາຄາປະມານ 50
ເປີເຊັນຈາກນະໂຍບາຍຂອງລັດຖະບານຊຸດກ່ອນ ທີ່ຮັບປະກັນລາຄາເຂົ້າໃຫ້ພວກຊາວນາ
ແຕ່ພຽງ 330 ໂດລາຕໍ່ເຂົ້ານຶ່ງຕັນນັ້ນ. ບັນດາເຈົ້າໜ້າທີ່ກະເສດກ່າວວ່າ ມີພວກຊາວນາ
ສີ່ລ້ານຄົນແລ້ວ ທີ່ໄດ້ຈົດທະບຽນຮັບເອົາແຜນຕັ້ງລາຄາເຂົ້າໃໝ່ນີ້.
ທ່ານ David Dawe ຈາກອົງການອາຫານແລະການກະເສດຂອງສະຫະປະຊາຊາດ ຫລື
FAO ກ່າວວ່າ ໃນຂະນະທີ່ລາຄາເຂົ້າທີ່ສູງຂຶ້ນກວ່າເກົ່ານີ້ ອາດຈະພາໃຫ້ມີການຜະລິດເຂົ້າ
ຫລາຍຂຶ້ນໃນໄລຍະຍາວ ແຕ່ກໍຍັງມີຄວາມບໍ່ແນ່ນອນ ກ່ຽວກັບຜົນກະທົບໂດຍເຕັມຂອງ
ໂຄງການດັ່ງກ່າວ. ທ່ານ David Dawe ກ່າວວ່າ:
“ມີຄວາມບໍ່ແນ່ນອນຫລາຍສິ່ງຫລາຍປະການ ກ່ຽວກັບວ່າແຜນການທີ່ວ່ານີ້ ແທ້ໆແລ້ວ
ຈະໃຊ້ໄດ້ຜົນຢ່າງໃດ ຊຶ່ງນີ້ພາໃຫ້ມີຜົນກະທົບທີ່ສັບສົນຕໍ່ລາຄາເຂົ້າໂລກ. ຂ້າພະເຈົ້າ
ໝາຍເຖິງວ່າ ລັດຖະບານບໍ່ມີຄວາມສາມາດ ຄືຂ້າພະເຈົ້າຄິດວ່າ ລັດຖະບານບໍ່ມີຄວາມ
ສາມາດ ທີ່ຈະຊື້ເຂົ້າທັງໝົດດ້ວຍຕົນເອງໄດ້ ຄືລັດຖະບານຈະຕ້ອງໄດ້ປະຕິບັດການໂດຍ
ຜ່ານພາກສ່ວນເອກະຊົນ ຊຶ່ງກໍຈະເປັນຄໍາຖາມທີ່ໜ້າສົນໃຈຢູ່ ເພາະວ່າພວກເອກະຊົນ
ແມ່ນຈະບໍ່ຕ້ອງການທີ່ຈະຊື້ໃນລາຄານັ້ນ ຖ້າຫາກວ່າ ພວກເຂົາເຈົ້າຈະຕ້ອງໄດ້ຂາຍຫລຸດ
ລາຄາ ໃນຕະຫລາດສົ່ງອອກ.”
ປີນີ້ ປະລິມານຜົນຜະລິດເຂົ້າຂອງໄທ ຄາດວ່າຈະໄດ້ເກີນ 20 ລ້ານຕັນ ຊຶ່ງປະມານເຄິ່ງ
ນຶ່ງຂອງຈໍານວນນັ້ນ ແມ່ນສໍາລັບສົ່ງອອກ. ໃນເບື້ອງຕົ້ນ ໄດ້ມີການທໍານາຍໄວ້ວ່າ ການ
ສົ່ງອອກເຂົ້າຂອງໄທສໍາລັບປີ 2012 ຈະມີຈໍານວນເທົ່າໆກັບປີນີ້ ຄືປະມານ 10 ລ້ານຕັນ
ແຕ່ມາບັດນີ້ ກະຊວງກະເສດສະຫະລັດທໍານາຍວ່າ ປະລິມານສົ່ງອອກເຂົ້າຂອງໄທ ໃນປີ
ໜ້າ ຈະຫລຸດລົງມາເປັນພຽງ ເຈັດລ້ານຕັນ ພາຍໃຕ້ແຜນການຕັ້ງລາຄາໃໝ່.
ໄທໄດ້ເປັນປະເທດສົ່ງອອກເຂົ້າຫລາຍທີ່ສຸດຂອງໂລກ ມາຕັ້ງແຕ່ປີ 1981 ແລ້ວ. ຄູ່ແຂ່ງ
ທີ່ສໍາຄັນຂອງໄທ ແມ່ນໄດ້ແກ່ອິນເດຍແລະຫວຽດນາມ. ອິນເດຍເປັນປະເທດຜະລິດເຂົ້າ
ລາຍໃຫຍ່ອັນດັບສອງຂອງໂລກ ແລະເມື່ອບໍ່ນານມານີ້ ອິນເດຍໄດ້ຫວນຄືນສູ່ຕະຫລາດສົ່ງ
ອອກເຂົ້າຂອງໂລກ ໂດຍໄດ້ລົບລ້າງກົດໝາຍ ປີ 2008 ທີ່ຫ້າມການສົ່ງອອກເຂົ້າເກຣດ
ທໍາມະດາ. ປະເທດສົ່ງອອກເຂົ້າລາຍໃຫຍ່ອື່ນໆ ກໍມີ ບຣາຊິລ ແລະປາກິສຖານ ຊຶ່ງຄາດ
ກັນວ່າ ທັງສອງປະເທດຈະເພີ່ມການສົ່ງເຂົ້າອອກຂາຍສູ່ຕະຫລາດໂລກ ເຊ່ນກັນ.
ທ່ານ ຊາມາເຣນດູ ໂມຮັນຕີ (Samarendu Mohanty) ນັກເສດຖະສາດປະຈໍາສະຖາ
ບັນຄົ້ນຄວ້າເຂົ້ານາໆຊາດ IRRI ທີ່ຕັ້ງຢູ່ຟິລິບປິນ ກ່າວວ່າ ລັດຖະບານໄທຈະຕ້ອງໄດ້
ເກື້ອກຸນລາຄາເຂົ້າສົ່ງອອກ ແກ່ພວກຊາວນາ ເພື່ອໃຫ້ແຂ່ງຂັນກັບປະເທດອື່ນໆໃນຕະ
ຫລາດໂລກໄດ້ ຊຶ່ງທ່ານກ່າວວ່າ ມັນຈະສົ່ງຜົນກະທົບຕໍ່ຊາວໄທຜູ້ເສຍພາສີທັງຫລາຍ.
ທ່ານ ໂມຮັນຕີ ກ່າວວ່າ:
“ຈະມີການເກື້ອກຸນການສົ່ງອອກ. ດັ່ງນັ້ນ ໂຄງການທີ່ຈະນໍາມາປະຕິບັດ ກໍແມ່ນໃຫ້
ລັດຖະບານໄທຂາຍເຂົ້າຂອງຕົນອອກ ໃນລະຫວ່າງລັດຖະບານກັບລັດຖະບານ ຫລື
ອອກໜັງສືອະນຸຍາດໃຫ້ສົ່ງອອກ ຊຶ່ງຂ້າພະເຈົ້າຄາດໝາຍວ່າຈະພາໃຫ້ລາຄາເຂົ້າໂລກ
ຕົກຕໍ່າລົງ. ນັ້ນແຫລະ ຈະແມ່ນຜົນກະທົບທີ່ເສຍຫາຍຢ່າງຮ້າຍແຮງຂອງໂຄງການນີ້
ຂອງໄທ ຕໍ່ຕະຫລາດໂລກ. ຜົນກະທົບຕໍ່ຊາວໄທ ກໍຄື ມັນຈະເປັນການສິ້ນເປືອງແກ່
ປະຊາຊົນໄທຜູ້ເສຍພາສີ ຢ່າງຫລວງຫລາຍພໍສົມຄວນ ແລະເຂົ້າໄທຈະແພງຂຶ້ນກວ່າ
ເກົ່າໃນຕະຫລາດພາຍໃນປະເທດ. ໂຄງການຂອງໄທແມ່ນຈະເປັນການເກື້ອກຸນແກ່
ພວກອຸບປະໂພກບໍລິໂພກຊາດອື່ນໆຂອງໂລກ.”
ທ່ານ ອໍາມາ ສະຍາມວັລລາ(Ammar Siamwalla) ປະທານອົງການຄົ້ນຄ້ວາພາກ
ສ່ວນເອກະຊົນທີ່ຊື່ວ່າ ສະຖານະບັນຄົ້ນຄວ້າດ້ານການພັດທະນາໄທ ຫລື TDRI
ກ່າວວ່າ ພວກທີ່ຈະໄດ້ຮັບຜົນປະໂຫຍດຫລາຍກ່ວາໝູ່ນັ້ນ ຈະແມ່ນພວກຜະລິດເຂົ້າ
ລາຍໃຫຍ່ໆ. ທ່ານຢ້ານກົວວ່າ ໂຄງການດັ່ງກ່າວອາດຈະສົ່ງຜົນໃຫ້ເກີດມີບໍລິສັດ
ເຂົ້າແຫ່ງຊາດ ທີ່ດໍາເນີນການໂດຍລັດຖະບານ ຊຶ່ງຈະສ້າງຄວາມເດືອດຮ້ອນໃຫ້ແກ່
ພາກສ່ວນສົ່ງອອກເຂົ້າເອກະຊົນຂອງໄທນັ້ນ. ທ່ານ ສະຍາມວັລລາ ກ່າວວ່າ:
“ຜົນກະທົບໃຫຍ່ໆນັ້ນກໍແມ່ນວ່າ ມັນຈະທໍາລາຍວົງການອຸດສາຫະກໍາເຂົ້າເອກະຊົນ
ຂອງພວກເຮົາ ໂດຍສະເພາະແລ້ວ ກໍແມ່ນນັບຕັ້ງແຕ່ພວກໂຮງສີເຂົ້າລາຍນ້ອຍໆຂຶ້ນ
ມາ ຄືວ່າພວກເຮົາມີລາຄາເຂົ້າທີ່ສູງກວ່າຕະຫລາດທົ່ວໄປ ເຖິງ 50 ເປີເຊັນ ແມ່ນບໍ່?
ແລ້ວພວກເຮົາຈະຂາຍເຂົ້າໄດ້ຢ່າງໃດ? ແລະຄໍາຕອບຕໍ່ຄໍາຖາມຂອງທ່ານ ກໍແມ່ນ
ນອນຢູ່ໃນຫັ້ນແຫລະ ກໍຄືວ່າ ລັດຖະບານຈະເຂົ້າມາດໍາເນີນກິດຈະການຂາຍເຂົ້າ
ແທນ ຫລືແນວໃດ?”
ທ່ານ ອໍາມາ ສະຍາມວັລລາ ກ່າວວ່າ ນອກນີ້ແລ້ວ ໂຄງການດັ່ງກ່າວຂອງລັດຖະບານ
ກໍອາດຈະກໍ່ໃຫ້ເກີດມີການສໍ້ລາດບັງຫລວງໄດ້ງ່າຍ ແລະການຂາດເຂີນງົບປະມານ.
ໂຄງການທໍານອງດຽວກັນນີ້ໃນປີ 2008 ບໍ່ໄດ້ປະສົບຜົນສໍາເລັດຍ້ອນມີການຂາດເຂີນ
ງົບປະມານ ຫລາຍກວ່າ 1,400 ລ້ານໂດລາ. ທາງກະຊວງກະເສດສະຫະລັດໄດ້ເຕືອນ
ວ່າ ຖ້າຫາກລັດຖະບານໄທໃຊ້ເງິນສົງເຄາະຂອງລັດຖະບານ ເພື່ອເກື້ອກຸນການສົ່ງອອກ
ເຂົ້າໃນລາຄາທີ່ຕໍ່າກວ່າທີ່ຕົນຈ່າຍໃຫ້ພວກຊາວນາໄທແລ້ວ ມັນກໍອາດຈະເປັນການຝ່າຝືນ
ຕໍ່ກົດລະບຽບຂອງອົງການຄ້າໂລກ.
