ພວກຕໍ່ຕ້ານ ລັດຖະບານ ສືບຕໍ່ ການປະທ້ວງ ທີ່ບາງກອກ (ສະໄລດ໌/ວີດີໂອ)

ໄທ ເພີ້ມການຮັກສາຄວາມປອດໄພ ຢູ່ໃນເຂດບາງກອກໃນວັນ
ເສົາມື້ນີ້ ຂະນະທີ່ພວກປະທ້ວງຕໍ່ຕ້ານລັດຖະບານ ເຂົ້າຢຶດເອົາ
ຫ້ອງການ ຂອງບໍລິສັດລັດວິສາຫະກິດໂທລະຄົມມະນາຄົມ ໃນ ການເຄື່ອນໄຫວຫຼ້າສຸດເພື່ອພະຍາຍາມຫາທາງໂຄ່ນລົ້ມລັດຖະ
ບານ.

ຕຳຫຼວດ ໃນເຂດນະຄອນຫຼວງຂອງໄທກ່າວວ່າ ນອກນັ້ນແລ້ວ
ພວກປະທ້ວງ ຍັງມີແຜນການ ທີ່ຈະປິດລ້ອມ ກອງບັນຊາການ
ໃຫຍ່ຕຳຫຼວດແຫ່ງຊາດແລະຕຳຫຼວດນະຄອນຫຼວງພ້ອມທັງທຳ
ນຽບລັດຖະບານ ແລະແມ່ນກະທັງສວນສັດນຳດ້ວຍ.



ໃນວັນສຸກວານນີ້ພວກປະທ້ວງຫຼາຍກວ່າ 1,000 ຄົນ ໄດ້ບຸກເຂົ້າໄປ ໃນກອງບັນຊາການ ກອງທັບບົກ ໃນຄວາມພະຍາຍາມເພື່ອຊັກຊວນໃຫ້ພວກທະຫານເຂົ້າຮ່ວມການດຳເນີນ ຄວາມພະຍາຍາມ ເພື່ອໂຄ່ນລົ້ມ ລັດຖະບານຂອງນາຍົກລັດຖະມົນຕີ ຍິ່ງລັກ ຊິນນະວັດ. ພວກປະທ້ວງໄດ້ອອກຈາກກອງບັນຊາການທະຫານຫລັງຈາກໄດ້ຢູ່ທີ່ນັ້ນປະມານ 2 ຊົ່ວ ໂມງ.

ຜູ້ບັນຊາການກອງທັບບົກ ນາຍພົນປຣະຢຸດ ຈັນໂອຊາ ໃນເວລາຕໍ່ມາໄດ້ຂໍຮ້ອງໃຫ້ພວກ ປະທ້ວງ ຢ່າໄດ້ບັງຄັບໃຫ້ທາງກອງທັບ ຕ້ອງເຂົ້າຂ້າງຝ່າຍໃດຝ່າຍນຶ່ງ.



ບັນດາຜູ້ນຳຂອງພວກຝ່າຍຄ້ານເວົ້າວ່າ ວັນອາທິດນີ້ຈະເປັນວັນໄຊຊະນະຂອງພວກເຂົາ ເຈົ້າ ແລະໄດ້ຮຽກຮ້ອງໃຫ້ພວກສະໜັບສະໜຸນ ປິດລ້ອມ ສຳນັກງານນາຍົກລັດຖະມົນຕີ. ເຂົາເຈົ້າປະກາດວ່າ ຈະເຂົ້າຍຶດເອົາທຸກໆກະຊວງຂອງລັດຖະບານ ຈົນກວ່າທ່ານນາງຍິ່ງ ລັກຈະລາອອກຈາກຕຳແໜ່ງ.

ທ່ານນາງຍິ່ງລັກໄດ້ລອດພົ້ນຈາກການລົງມະຕິບໍ່ໄວ້ວາງໃຈຢູ່ໃນສະພາແຫ່ງຊາດ. ນາຍົກ ລັດຖະມົນຕີຍິ່ງລັກ ໄດ້ປະຕິເສດທີ່ຈະລາອອກ ແລະຮຽກຮ້ອງໃຫ້ເປີດການໂອ້ລົມສົນທະ ນາເພື່ອຫາທາງແກ້ໄຂສະຖານະການ. ທ່ານນາງໃຫ້ຄຳໝັ້ນສັນຍາວ່າຈະບໍ່ໃຊ້ກຳລັງເພື່ອ ຍຸຕິການປະທ້ວງ.