ລິ້ງ ສຳຫລັບເຂົ້າຫາ

ສະຫະລັດໄດ້ປະນາມເຫດການຮຸນແຮງ ເທື່ອລ່າສຸດຢູ່
ປະເທດໄທ ແລະຮຽກຮ້ອງໃຫ້ທັງພວກປະທ້ວງແລະລັດຖະ
ບານ ໃຊ້ຄວາມຢັບຢັ້ງ. ໂຄສົກກະຊວງການຕ່າງປະເທດ
ສະຫະລັດທ່ານ GORDON DUGUID ກ່າວໃນມື້ວັນພຸດ
ວານນີ້ວ່າ ສະຫະລັດມີຄວາມເສຍໃຈເປັນທີ່ສຸດຕໍ່ເຫດການ
ຮຸນແຮງແລະການສູນເສຍຊີວິດໃນການປະທະກັນລະຫວ່າງ
ກຳລັງຮັກສາຄວາມ ສະຫງົບແລະພວກປະທ້ວງຕໍ່ຕ້ານ
ລັດຖະບານ.

ທ່ານ DUGUID ກ່າວວ່າສະຫະລັດຮູ້ສຶກມີກຳລັງໃຈ
ທີ່ພວກຜູ້ນຳປະທ້ວງເສື້ອແດງພາກັນຍອມຈຳນົນແຕ່ທ່ານໄດ້ສະແດງຄວາມວິຕົກ
ກັງວົນກ່ຽວກັບການຈູດເຜົາທີ່ກະທຳໂດຍພວກປະທ້ວງເສື້ອແດງແລະຮຽກຮ້ອງ
ໃຫ້ພວກຜູ້ນຳຝ່າຍຄ້ານຂໍຮ້ອງໃຫ້ພວກປະທ້ວງຢຸດເຊົາການກະທຳດັ່ງກ່າວ.


ທ່ານເວົ້າວ່າ ສະຫະລັດຢາກເຫັນທັງສອງຝ່າຍດຳເນີນງານເພື່ອແກ້ໄຂບັນຫາຂັດແຍ້ງ
ໂດຍຜ່ານສະຖາບັນປະຊາທິປະໄຕຂອງໄທ.

ສ່ວນພວກຜູ້ນຳຂອງສະຫະພາບຢູໂຣບ ກໍໄດ້ໃຫ້ຄວາມເຫັນກ່ຽວກັບວິກິດ ການໃນໄທ
ດັ່ງອົງການຂ່າວຝຣັ່ງໄດ້ອ້າງຄຳເວົ້າຂອງປະທານສະພາຢູໂຣບ ທ່ານ JERZY BUZEK
ກ່າວວ່າ ເວລານີ້ປະເທດໄທພວມກ້າວເຂົ້າສູ່ສະໄໝທີ່ການ ສ້າງຄວາມຖືກຕ້ອງປອງດອງ
ຊາດ​ເປັນ​ທີ່​ສຳຄັນ​ທີ່​ສຸດ ທ່ານເວົ້າວ່າມີການສູນເສຍເລືອດເນື້ອຊີວິດຫລາຍພໍແລ້ວ.

XS
SM
MD
LG