ໄທ ປະທ້ວງເຮືອລົບ ມຽນມາ ຍິງເຮືອປະມົງໄທ

ອົງການຂ່າວຣອຍເຕີ້ລາຍງານກໍລະນີທາງການໄທ ປະທ້ວງເຫດການເຮືອລົບຂອງກອງທັບ ເຮືອ ມຽນມາ ຍິງເຮືອນປະມົງຂອງໄທ ເປັນເຫດໃຫ້ມີຜູ້ເສັຍຊີວິດ 1 ຄົນ ບາດເຈັບອີກ 2 ຄົນ ແລະ ຈຸເຮືອອີກຫຼາຍສິບຄົນຖືກຄວບຄຸມໂຕໄວ້

ທ່ານ ນາງ ແພທອງທານ ຊິນນະວັດ ນາຍົກລັດຖະມົນຕີໄທ ລະບຸໃນວັນອາທິດຕາມ ເວລາທ້ອງຖີ່ນວ່າໄດ້ຮັບຊາບເລື່ອງເຮືອລົບປະເທດມຽນມາ ຍິງເຮືອປະມົງໄທ ໂດຍອ້າງວ່າ ການບຸກລຸກໜ້ານໍ້າມຽນມາ ເຊິ່ງເຮັດໃຫ້ມີຜູ້ເສັຍຊີວິດແລະບາດເຈັບເມື່ອວັນເສົາຜ່ານມາ ໂດຍກ່າວວ່າບໍ່ ສະໜັບສະໜູນຄວາມຮຸນແຮງໃນທຸກຮູບແບບ ແຕ່ໄດ້ຕັ້ງຄໍາຖາມໃນປະ ເດັນ ທີ່ກອງທັບມຽນມາ ກ່າວອ້າງວ່າເຮືອປະມົງໄທ ບຸກລຸກໜ້ານໍ້າມຽນມາ ແລະວ່າທາງ ການໄທ ຍັງຄົງລໍຖ້າລາຍລະອຽດກ່ຽວກັບເຫດການນີ້ລວມທັງຮຽກຮ້ອງໃຫ້ມີການປ່ອຍໂຕ ຊາວປະມົງ 4 ຄົນຈາກ 31 ຄົນທີ່ຖືກທາງການມຽນມ້າຄວບຄຸມໂຕຢູ່ຫຼືບໍ່.

ດ້ານກະຊວງປ້ອງກັນປະເທດຂອງໄທລະບຸກ່ອນໜ້ານີ້ວ່າມີຊາວປະມົງ 2 ຄົນ ຈາກ 15 ຄົນຖືກຍິງລະຫວ່າງທີ່ເຮືອປະມົງຢູ່ບໍລິເວນ 4-5.7 ໄມລທະເລ ໃນໜ້ານໍ້າຂອງມຽນມາ ເຊິ່ງຢູ່ໄກ້ກັບແຂວງລະນອງ ທາງພາກໃຕ້ຂອງໄທໂດຍກະຊວງປ້ອງກັນປະເທດໄດ້ຍື່ນຈົດ ໝາຍປະທ້ວງການໃຊ້ກຳລັງທາງມຽນມາແລະຮຽກຮ້ອງໃຫ້ເປີດເຜີຍລາຍລະອຽດຂອງເຫດ ການທີ່ເກີດຂື້ນລວມທັງຮຽກຮ້ອງໃຫ້ສົ່ງໂຕຊາວປະມົງແລະຈຸເຮືອທັງໝົດກັບໂດຍໄວ

ສ່ວນລັດຖະມົນຕີກະຊວງການຕ່າງປະເທດຂອງໄທ ທ່ານ ມາຣິດ ສະຫງ່ຽມພົງ ໄດ້ອອກ ໜັງສືຕໍ່ລັດຖະບານມຽນມາ ສະແດງຄວາມກັງວົນກ່ຽວກັບເຫດການນີ້ແລະມີກຳນົດການ ຮຽກໂຕທູດ ມຽນມາ ເຂົ້າມາພົບຫາລືທີ່ກະຊວງໃນວັນຈັນເພື່ອຂໍໃຫ້ມີການກວດສອບເລື່ອງ ດັ່ງກ່າວແລະປ່ອຍໂຕຄົນໄທ 4 ຄົນທີ່ຖືກຄວບຄຸມໂຕ

ທາງດ້ານລັດຖະບານມຽນມາບໍ່ໄດ້ຕອບກັບການຕິດຕໍ່ຂໍຄວາມເຫັນຂອງອົງການຣອຍເຕີ້ ທາງໂທລະສັບໃນຊ່ວງເວລາທີ່ລາຍງານຂ່າວນີ້.

ທັງນີ້ ມຽນມາ ໄດ້ປະເຊີນກັບວິກິດພາຍໃນປະເທດມາຕັ້ງແຕ່ປີ 2021 ພາຍຫຼັງທີ່ກອງທັບ ມຽນມາ ລັດຖະປະຫານຢຶດອຳນາດຈາກລັດຖະບານພົນລະເຮືອນ ແລະການລຸກຮື້ຂຶ້ນ ຂອງກຸ່ມຕໍ່ຕ້ານແລະກຸ່ມຕິດອາວຸດຊົນເຜົ່າທີ່ປະທະກັບກອງທັບມຽນມາຢ່າງໜັກໃນຊ່ວງທີ່ຜ່ານມາ.