ຜູ້ນໍາທີ່ໂດດເດັ່ນຄົນນຶ່ງ ໃນຂະບວນການປະທ້ວງຂອງກຸ່ມເສື້ອແດງຂອງໄທ ໄດ້ເຂົ້າມອບ
ໂຕຕໍ່ເຈົ້າໜ້າທີ່ ໃນນະຄອນຫລວງບາງກອກ ເພື່ອຕໍ່ສູ້ຄະດີໃນຂໍ້ຫາກໍ່ການຮ້າຍ ທີ່ກ່ຽວ
ຂ້ອງກັບການເດີນຂະບວນປະທ້ວງຕໍ່ຕ້ານລັດຖະບານ ທີ່ນອງເລືອດໃນປີກາຍນີ້.
ທ່ານ ອາຣິສມັນ ພົງເຣືອງຣອງ ຖືກກ່າວຫາວ່າໄດ້ນໍາພາພວກປະທ້ວງຕໍ່ຕ້ານລັດຖະບານ
ໄປຖະຫລົ່ມຕຶກອາຄານລັດຖະສະພາໄທ ແລະສະຖານີອອກອາກາດທາງດາວທຽມ ໃນເວ
ລາທີ່ມີການປະທ້ວງເປັນເວລາຫລາຍໆອາທິດເພື່ອຕໍ່ຕ້ານນາຍົກລັດຖະມົນຕີ ອະພິຊິດ ເວດ
ຊາຊີວະ ໃນຕອນນັ້ນ.
ຜູ້ນໍາປະທ້ວງ, ທີ່ຜູ້ຄົນຄິດກັນວ່າ ໄດ້ໂຕນໜີໄປຢູ່ກໍາປູເຈຍ ປະເທດເພື່ອນບ້ານຂອງໄທ
ແລ້ວນັ້ນ ເວົ້າວ່າ ຜູ້ກ່ຽວໄດ້ກັບຕ່າວຄືນມາ ກໍເພາະທ່ານຄິດວ່າ ຄວາມຍຸດຕິທໍາຈະໄດ້ຮັບ
ການຄຸ້ມຄອງໂດຍລັດຖະບານຊຸດປັດຈຸບັນ.
ຜູ້ນໍາເສື້ອແດງ ທ່ານ ອາຣິສມັນ ພົງເຣືອງຣອງ ເວົ້າວ່າ: “ຂ້າພະເຈົ້າຈະທໍາການ
ຮ້ອງຂໍຕໍ່ສານລັດຖະທໍາມະນູນໃຫ້ພິຈາລະນາເບິ່ງວ່າ ການກ່າວຫານັ້ນ ບໍ່
ຮຸນແຮງເກີນໄປບໍ່. ຂ້າພະເຈົ້າກັບຄືນມາ ເພາະວ່າຂ້າພະເຈົ້າມີຄວາມໝັ້ນໃຈ
ໃນລະບົບຍຸດຕິທໍາຂອງຊາດ ແລະກໍມີຄວາມເຊື່ອໝັ້ນໃນຄວາມປອດໄພຂອງຕົນ.”
ທ່ານ ອາຣິສມັນ ແມ່ນນຶ່ງໃນພວກຜູ້ນໍາເສື້ອແດງທີ່ມີຫລາຍສິບຄົນ ທີ່ຖືກກ່າວຫາວ່າ ທໍາການປຸກລະດົມໃຫ້ມີການກໍ່ຄວາມຮຸນແຮງ, ຂູ່ເຂັນພວກເຈົ້າໜ້າທີ່ລັດຖະບານ ແລະທໍາການກໍ່ການຮ້າຍ ໃນລະຫວ່າງທີ່ມີການປະທ້ວງເປັນເວລາ 10 ອາທິດ ທີ່ເກີດຂຶ້ນໃນເດືອນເມສາ ປີ 2010 ຢູ່ທີ່ບາງກອກ.
ຜູ້ກ່ຽວຈະໄປປະກົດໂຕໃນວັນພຸດມື້ອື່ນ ຢູ່ຕໍ່ໜ້າສານອາຍາຂອງໄທ ຊຶ່ງຜູ້ ກ່ຽວຄາດວ່າ ຈະຖືກປ່ອຍໂດຍໄດ້ຮັບການປະກັນໂຕ.
