ພວກນັກເຄື່ອນໄຫວຕໍ່ຕ້ານລັດຖະບານໄທ ຫລາຍພັນຄົນ
ໄດ້ພາກັນລົງສູ່ຖະໜົນຫົນທາງ ເດີນຂະບວນໃນກຸງເທບ
ໃນວັນອາທິດວານນີ້ ເພື່ອເປັນຂີດໝາຍລະນຶກເຖິງການ
ປະທ້ວງ ທີ່ເຮັດໃຫ້ບາງກອກຕົກຢູ່ໃນສະພາບເປັນເປ້ຍ
ລ່ອຍ ແລະການປະທະກັນກັບກໍາລັງຮັກສາຄວາມປອດໄພ
ຂອງລັດຖະບານ ທີ່ຮ້າຍແຮງເຖິງຕາຍໃນຕົ້ນປີນີ້.
ພວກຕໍ່ຕ້ານລັດຖະບານ ທີ່ເອີ້ນວ່າພວກເສື້ອແດງ ຫລື
ນປຊ ຈໍານວນ 6,000 ຄົນ ພາກັນເດີນຂະບວນໄປຍັງ
ອະນຸສາວະລີປະຊາທິປະໄຕ ຊຶ່ງເປັນຈຸດໃຫຍ່ ບ່ອນເກີດ
ເຫດປະທ້ວງຢ່າງຮ້າຍແຮງເມື່ອຫົກເດືອນກ່ອນນີ້. ພວກ
ນັກປະທ້ວງທີ່ໃສ່ເສື້ອສັນຍາລັກສີແດງຂອງເຂົາເຈົ້າ ພາກັນ
ເອົາດອກກຸຫລາບແລະດອກໄມ້ອື່ນໆໄປວາງໄວ້ ຮວມທັງ
ຮູບພາບຂອງພວກທີ່ເສຍຊີວິດໄປໃນການປະທ້ວງເປັນ
ເວລາ 6 ອາທິດ ຊຶ່ງເລີ່ມຕົ້ນໃນວັນທີ່ 10 ເດືອນເມສາ ຈົນຮອດກາງເດືອນພຶດສະພາ.
