ລິ້ງ ສຳຫລັບເຂົ້າຫາ

logo-print

ໄທ ຈົດທະບຽນ ຜູ້ສະໝັກ ລົງແຂ່ງຂັນ ໃນການເລືອກຕັ້ງ (ສະໄລດ໌/ວີດີໂອ)


ທ່ານນາງ Poowanida Kunpalin ຈາກພັກເພື່ອໄທ ຊຶ່ງເປັນພັກລັດຖະບານ ພວມຖືກກວດເບິ່ງເອກກະສານ ໃນລະຫວ່າງທີ່ທ່ານນາງ ຈົດທະບຽນລົງສະໝັກແຂ່ງຂັນ ໃນການ ເລືອກຕັ້ງ (28 ທັນວາ 2013)
ປະເທດໄທ ໄດ້ເອົາອີກບາດກ້າວນຶ່ງ ໄປສູ່ການເລືອກຕັ້ງທົ່ວໄປ
ໃນວັນທີ 2 ກຸມພາໂດຍທີ່ບັນດາຜູ້ສະໝັກສ່ວນໃຫຍ່ສາມາດໄປ
ຈົດທະບຽນໃນມື້ວັນເສົາ ແລະວັນອາທິດຜ່ານມາ ຢູ່ໃນຈັງຫວັດ
ຕ່າງໆທົ່ວປະເທດ. ພວກປະທ້ວງຕໍ່ຕ້ານລັດຖະບານໄດ້ລົບກວນ
ການຈົດທະບຽນຢູ່ໃນ 7 ຫົວເມືອງຊຶ່ງສ່ວນໃຫຍ່ແລ້ວ ແມ່ນຢູ່ໃນ
ພາກໃຕ້ຂອງປະເທດ. Ron Corben ຜູ້ສື່ຂ່າວວີໂອເອລາຍງານ
ມາຈາກບາງກອກວ່າຄວາມເຄັ່ງຕຶງກ່ອນໜ້າການເລືອກຕັ້ງແມ່ນ
ຍັງສູງຢູ່ຫຼັງຈາກຍາມຄົນນຶ່ງຢູ່ບ່ອນປະທ້ວງແຫ່ງນຶ່ງໃນບາງກອກ
ຖືກຍິງຕາຍໂດຍຄົນທີ່ຂີ່ລົດແລ່ນກາຍໄປ ດັ່ງໄພສານຈະນຳເອົາ
ລະອຽດ ມາສະເໜີທ່ານ ໃນອັນດັບຕໍ່ໄປ.


ຄະນະກຳມາທິການເລືອກຕັ້ງຂອງໄທກ່າວວ່າ ການຈົດທະບຽນ
ຂອງບັນດາຜູ້ສະໝັກລົງເລືອກຕັ້ງ ໂດຍສ່ວນໃຫຍ່ແລ້ວ ແມ່ນດຳເນີນໄປ ດ້ວຍຄວາມສະ
ຫງົບ.

ຄະນະກຳມາທິການເວົ້າວ່າ ພວກປະທ້ວງໄດ້ຂັດຂວາງບໍ່ໃຫ້ຜູ້ສະໝັກເຂົ້າແຂ່ງຂັນເລືອກ ຕັ້ງໄປຈົດທະບຽນຢູ່ໃນ 7 ຈັງຫວັດ ສ່ວນໃຫຍ່ແລ້ວແມ່ນຢູ່ໃນເຂດພາກໃຕ້ ຊຶ່ງເປັນທີ່ໝັ້ນ ອັນເຂັ້ມແຂງ ຂອງພັກປະຊາທິປັດ ອັນເປັນພັກຝ່າຍຄ້ານຂອງໄທ ທີ່ບໍ່ຍອມເຂົ້າຮ່ວມ ຫລື ບອຍຄອດການປ່ອນບັດດັ່ງກ່າວນີ້.

ທີ່ບາງກອກ ບ່ອນທີ່ການປະທະກັນລະຫວ່າງຕຳຫຼວດແລະພວກປະທ້ວງໃນມື້ວັນພະຫັດ ແລ້ວເຮັດໃຫ້ 2 ຄົນເສຍຊີວິດແລະ 160 ກວ່າຄົນບາດເຈັບນັ້ນ ໄດ້ມີການຍິງປືນສາດໃສ່ ຄ້າຍຂອງພວກປະທ້ວງຕໍ່ຕ້ານລັດຖະບານແຫ່ງນຶ່ງ ຈາກລົດທີ່ແລ່ນຜ່ານໄປ ໃນມື້ວັນເສົາ ຜ່ານມາ ເຮັດໃຫ້ຄົນນຶ່ງເສຍຊີວິດ ແລະຫຼາຍໆຄົນໄດ້ຮັບບາດເຈັບ.

ທ່ານນິຕິທອນ ລຳເຮື້ອ ທີ່ປຶກສາຕາໜ່າງປະທ້ວງຕໍ່ການປ່ອນບັດທີ່ນຳພາໂດຍພວກນັກ ສຶກສານັ້ນ ກ່າວວ່າ ຜູ້ຊາຍອາຍຸ 26 ປີ ທີ່ຖືກຍິງຕາຍ ແມ່ນຍາມອາສາສະໝັກ ຢູ່ທີ່ຄ້າຍ ດັ່ງກ່າວ.

ທ່ານນິຕິທອນເວົ້າວ່າ "ເຫດການ ທີ່ເກີດຂຶ້ນນີ້ ເກີດຂຶ້ນ ປະມານ 3 ໂມງເຊົ້າ ຊຶ່ງ
ຍົງຍຸດກໍເຮັດໜ້າທີ່ໃນການດູແລເວນຍາມຕາມປົກກະຕິກໍມີລົດແລ່ນມາ 2 ຄັນ ພໍມາເຖິງ ກໍຍິງປືນສາດໃສ່ ໂດຍບໍ່ໄດ້ເລັງ ແຕ່ເປັນການຍິງສາດ ຍົງຍຸດກໍເປັນ ບຸກຄົນນຶ່ງທີ່ຖືກລູກປືນຢູ່ບ່ອນນັ້ນ ລາວໄດ້ເສຍຊີວິດໃນເວລາຕໍ່ມາຢູ່ທີ່ໂຮງໝໍ."


ໃນການໂຈມຕີອີກຄັ້ງນຶ່ງ ໃນຕອນບ່າຍ ຂອງມື້ວັນອາທິດນັ້ນ ກໍໄດ້ມີການແກວ່ງລະເບີດ ນ້ອຍລູກນຶ່ງ ເຂົ້າໃສ່ພວກປະທ້ວງ ເຮັດໃຫ້ 5 ຄົນໄດ້ຮັບບາດເຈັບ.

Thailand
please wait
Embed

No media source currently available

0:00 0:00:40 0:00


ຕາໜ່າງພວກນັກສຶກສາ ແລະປະຊາຊົນເພື່ອການປະຕິຮູບ ແຫ່ງປະເທດໄທ ແມ່ນໄດ້ມີ ສ່ວນພົວພັນນໍາການປະທະກັນກັບຕຳຫຼວດ ຢູ່ບ່ອນຈົດທະບຽນແຫ່ງນຶ່ງ ໃນເຂດໃຈກາງ ບາງກອກເມື່ອວັນພະຫັດອາທິດແລ້ວຊຶ່ງເປັນຄວາມຮຸນແຮງທາງດ້ານການເມືອງທີ່ຮ້າຍ ແຮງສຸດ ນັບແຕ່ປີ 2010 ເປັນຕົ້ນມາ.

ຫລັງຈາກເກີດຄວາມຮຸນແຮງໃນວັນພະຫັດແລ້ວ ຄະນະກຳມາທິການເລືອກຕັ້ງຂອງໄທ
ກໍໄດ້ຮຽກຮ້ອງ ໃຫ້ນາຍົກລັດຖະມົນຕີ ຍິ່ງລັກ ຊິນນະວັດ ເລື່ອນເວລາໃນການປ່ອນບັດ ອອກໄປ. ທ່ານນາງຍິ່ງລັກ ເວົ້າວ່າ ການປ່ອນບັດໃນເດືອນກຸມພາ ແມ່ນຊ່ອງທາງ ທີ່ປະ ເທດຊາດ ຈະເຄື່ອນໄຫວໄປໜ້າ ຈາກວິກິດການດ້ານການເມືອງ. ແລະໃນມື້ວັນອາທິດ ຜ່ານມານີ້ ສະມາຄົມລັດຖະກອນພົນລະເຮືອນຂອງໄທ ກ່າວວ່າ ຕົນສະໜັບສະໜຸນຄໍາ ຮຽກຮ້ອງໃຫ້ເລື່ອນເວລາໃນການເລືອກຕັ້ງແລະໃຫ້ມີການຈັດຕັ້ງປະຕິບັດການປະຕິຮູບ ເສຍກ່ອນ ກ່ອນການປ່ອນບັດຄັ້ງໃໝ່.

ທ່ານນິຕິທອນ ທີ່ປຶກສາຂອງພວກນັກສຶກສາ ກ່າວວ່າ ຂະບວນການຂອງພວກປະທ້ວງມີ
ຄວາມຢ້ານກົວວ່າຈະມີການຂັດແຍ້ງກັນເພີ້ມຕື່ມ ຖ້າການເລືອກຕັ້ງຫາກຍັງດຳເນີນຕໍ່ໄປ.

ທ່ານນິຕິທອນເວົ້າວ່າ "ຄືເຮົາຈະຄັດຄ້ານ ຢ່າງເຕັມທີ່ ບໍ່ແມ່ນວ່າ ພວກເຮົາບໍ່ເຫັນ ພ້ອມກັບການເລືອກຕັ້ງແຕ່ເຮົາເຫັນວ່າການເລືອກຕັ້ງໃນຂະນະນີ້ຍັງບໍ່ທັນພ້ອມ ຍັງບໍ່ພ້ອມ ທີ່ຈະຈັດໃຫ້ມີ ການເລືອກຕັ້ງ ຖ້າເລືອກຕັ້ງໄປນີ້ ຄວາມຂັດແຍ້ງຂອງ
ປະຊາຊົນຈະສູງຫລາຍ ໃນະຂະນະທີ່ປະຊາຊົນທຸກຄົນໃນເວລານີ້ຕ້ອງການໃຫ້
ບ້ານເມືອງ ປ່ຽນແປງໄປ ໃນທິດທາງ ທີ່ດີຂຶ້ນ ເຊັ່ນການມີສ່ວນຮ່ວມຂອງປະຊາ ຊົນຢ່າງແທ້ຈິງ ການເລືອກຕັ້ງ ຕ້ອງສຸດຈະລິດທ່ຽງທຳ ບໍ່ມີການທຸດຈະລິດ ຄໍຣັບ
ຊັ່ນ."


ທ່ານນາງຍິ່ງລັກກ່າວວ່າ ການປະຕິຮູບທາງດ້ານການເມືອງສາມາດມີຂຶ້ນໄດ້ຫຼັງຈາກການ
ເລືອກຕັ້ງແລ້ວ ແລະປະກາດຈັດຕັ້ງຄະນະກຳມາທິການ ທີ່ຈະໃຫ້ຄຳສະເໜີແນະ ກ່ຽວກັບ
ການປ່ຽນແປງທາງດ້ານການເມືອງ ແລະເສດຖະກິດ.

ແຕ່ຜູ້ປະທ້ວງຄົນນຶ່ງທີ່ຖະໜົນຣາຊດຳເນີນ ກ່າວໃນວັນອາທິດທີ່ຜ່ານມານີ້ວ່າ ການເລືອກ
ຕັ້ງກ່ອນກຳນົດມີແຕ່ຈະໃຫ້ຜົນປະໂຫຍດແກ່ພັກເພື່ອໄທຊຶ່ງເປັນພັກລັດຖະບານ ນັ້ນ.

ຜູ້ປະທ້ວງຄົນນີ້ເວົ້າວ່າ “ລັດຖະບານແມ່ນໄດ້ພະຍາຍາມເລື່ອນທຸກສິ່ງຢ່າງ ແລະຈັດ
ການເລືອກຕັ້ງ. ການເລືອກຕັ້ງນັ້ນບໍ່ແມ່ນປອດການສໍ້ລາດບັງຫລວງ ມັນບໍ່ແມ່ນດີ
ສຳລັບໝົດທຸກໆຄົນ ໃນປະເທດ ມີແຕ່ດີ ສຳລັບພວກເຂົາເຈົ້າ ສຳລັບລັດຖະບານ ສຳລັບພັກໄທເພື່ອໄທແລະສຳລັບທ່ານທັກສິນ ຊິນນະວັດເທົ່ານັ້ນ ນັ້ນຄືສິ່ງທີ່ທ່ານ ນາງຍິ່ງລັກ ຢາກກະທຳໃນເວລານີ້."


ທ່ານທັກສິນ ແມ່ນອ້າຍຂອງນາຍົກລັດຖະມົນຕີຍິ່ງລັກ ແລະໄດ້ໄປລີ້ໄພຢູ່ຕ່າງປະເທດ ນັບ
ແຕ່ປີ 2008 ເປັນຕົ້ນມາເພື່ອຫຼີກລ່ຽງບໍ່ຢາກຖືກຄຸກເປັນເວລາ 2 ປີໃນຂໍ້ຫາສໍ້ລາດບັງຫຼວງ. ການປະທ້ວງເມື່ອໄວໆມານີ້ ເລີ້ມຂຶ້ນຫລັງຈາກລັດຖະບານ ໄດ້ຮັບຜ່ານຮ່າງກົດໝາຍ ໃຫ້ ອະໄພໂຍໂທດ ໃນເດືອນຕຸລາຜ່ານມາ ທີ່ເບິ່ງກັນວ່າ ເປັນການຊ່ອຍເຫຼືອ ທ່ານທັກສິນນັ້ນ. ຮ່າງກົດໝາຍສະບັບນີ້ ໄດ້ຖືກປະຕິເສດໃນເວລາຕໍ່ມາໂດຍສະພາສູງ ຂອງໄທ.

ພວກຜູ້ນຳການປະທ້ວງພາກັນຂົ່ມຂູ່ວ່າ ຈະເຂົ້າຢຶດເອົາບາງກອກຫຼັງຈາກວັນພັກສະຫຼອງ
ວັນຂຶນປີໃໝ່ແລ້ວເພື່ອຍັບຍັ້ງບໍ່ໃຫ້ມີການເລືອກຕັ້ງ. ພວກສະໜັບສະໜຸນລັດຖະບານກໍຂູ່ ວ່າ ຈະໂຮມຊຸມນຸມປະທ້ວງເຊັ່ນກັນ. ສ່ວນກອງທັບໄທກໍເວົ້າວ່າ ຕົນຈະເຂົ້າແຊກແຊງ ຖ້າ ຫາກເກີດການນອງເລືອດຂຶ້ນ ແບບທີ່ຕຳຫຼວດຄວບຄຸມບໍ່ໄດ້.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG