ລັດຖະບານໄທໄດ້ປະຕິເສດກ່ຽວກັບຄວາມເປັນໄປໄດ້ທີ່ຈະມີການໃຫ້ອະໄພຍະໂທດຈາກ
ກະສັດໄທເພື່ອອານຸຍາດໃຫ້ອະດີດນາຍົກລັດຖະມົນຕີທັກສິນ ຊິນນະວັດ ທີ່ພວມຫຼົບລີ້ໜີ
ກົດໝາຍຢູ່ນັ້ນ ເດີນທາງກັບຄືນປະເທດໄດ້.
ສື່ມວນຊົນຂອງໄທ ລາຍງານວ່າ ການສະເໜີເພື່ອໃຫ້ນິລະໂທດກໍາດັ່ງກ່າວ ໄດ້ຮັບຄວາມ
ເຫັນພ້ອມຕົກລົງກັນໃນກອງປະຊຸມຂອງຄະນະລັດຖະບານ ໃນອາທິດແລ້ວນີ້. ແຕ່ຢ່າງໃດ
ກໍຕາມ ລັດຖະມົນຕີກະຊວງຍຸດຕິທໍາ ທ່ານປຣະຊາ ພຣົມນອກ ກ່າວຕໍ່ພວກນັກຂ່າວ ໃນ
ວັນຈັນວານນີ້ວ່າ ຍັງບໍ່ມີການປ່ຽນແປງໃດໆເທື່ອເພື່ອຈະອະນຸຍາດໃຫ້ທ່ານທັກສິນ ສາ
ມາດກັບຄືນປະເທດໄດ້.
ການໃຫ້ອະໄພຍະໂທດຈາກກະສັດພູມີພົນ ອະດຸນຍະເດດແມ່ນມີຂຶ້ນໃນທຸກໆ ປີ ໃນລະ
ຫວ່າງວັນຄ້າຍວັນປະສູດຂອງພະອົງ ຄືວັນທີ 5 ທັນວາ.
ຕາມການລາຍງານຂອງໜັງສືພິມ ບາງກອກໂພສ ການໃຫ້ອະໄພຍະໂທດຈາກກະສັດໄທ
ໃນປີນີ້ ຈະແມ່ນສຳລັບພວກມີອາຍຸຫລາຍກວ່າ 60 ປີຂຶ້ນໄປ ແລະຖືກຕັດສິນຈໍາຄຸກເປັນ
ເວລາບໍ່ເຖິງສາມປີ.
ທ່ານທັກສິນ ຊຶ່ງເປັນອ້າຍຂອງທ່ານນາງຍິ່ງລັກ ຊິນນະວັດ ນາຍົກລັດຖະມົນຕີຄົນປັດຈຸ
ບັນຂອງໄທ ໄດ້ຖືກໂຄ່ນລົ້ມໂດຍພວກທະຫານ ໃນການກໍ່ລັດຖະປະຫານປີ 2006 ທີ່ໄດ້
ພາໃຫ້ເກີດຄວາມບໍ່ທຸ່ນທ່ຽງທາງການເມືອງໃນໄທ ມາເປັນເວລາອັນຍາວນານ.
ທ່ານທັກສິນ ໄດ້ໂຕນໜີອອກຈາກປະເທດ ໃນປີ 2008 ແລະໄດ້ຖືກຕັດສິນລັບຫຼັງ ໃຫ້
ຈໍາຄຸກສອງປີ ຍ້ອນສໍ້ລາດບັງຫລວງ.
