ກຸ່ມປົກປ້ອງສິ່ງແວດລ້ອມກຸ່ມນຶ່ງກ່າວວ່າ ບໍລິສັດນຶ່ງຂອງໄທກໍາລັງດໍາເນີນການຕໍ່ໄປໃນການກໍ່ສ້າງເຂື່ອນໄຟຟ້າພະລັງນໍ້າ ທີ່ເປັນບັນຫາໂຕ້ແຍ້ງກັນໃນເຂດລຸ່ມແມ່ນໍ້າຂອງ ເຖິງແມ່ນມີຂໍ້ຕົກລົງກັນໃຫ້ເລື່ອນການຕັດສິນໃຈຂັ້ນຊີ້ຂາດກ່ຽວກັບໂຄງການດັ່ງກ່າວນີ້ໄວ້ກ່ອນກໍຕາມ.
ອົງການແມ່ນໍ້າສາກົນທີ່ມີຫ້ອງການຕັ້ງຢູ່ໃນສະຫະລັດກ່າວວ່າ ຕົນໄດ້ພົບເຫັນວ່າການກໍ່ສ້າງຂັ້ນຕົ້ນໄດ້ດໍາເນີນຢູ່ຕໍ່ມາກ່ຽວກັບໂຄງການສ້າງເຂື່ອນໄຊຍະບູລີ ທີ່ມີມູນຄ່າ 3500 ລ້ານໂດລາໃນລາວ ຮວມທັງສ້າງທາງເຂົ້າແລະທາງອອກ ຫາສະຖານທີ່ກໍ່ສ້າງເຂື່ອນແຫ່ງນັ້ນ.
ຄະນະກໍາມາທິການແມ່ນໍ້າຂອງສາກົນ ປະຈໍາພາກພື້ນ ຊຶ່ງປະກອບດ້ວຍໄທ ກໍາປູເຈຍ ລາວແລະຫວຽດນາມນັ້ນໄດ້ຕົກລົງກັນໃນເດືອນທັນວາປີແລ້ວນີ້ວ່າ ຈະຕ້ອງໄດ້ມີການສຶກສາຄົ້ນຄວ້າເພີ່ມຕື່ມເພື່ອປະ ເມິນເບິ່ງຜົນກະທົບຕໍ່ສິ່ງແວດລ້ອມຂອງເຂື່ອນດັ່ງກ່າວ ແຕ່ເຖິງຢ່າງ ໃດກໍດີ ການຕັດສິນໃຈຫລືຂໍ້ຕົກລົງກັນສະບັບນີ້ບໍ່ມີຜົນບັງຄັບໃຊ້ທາງກົດໝາຍ.
ທ່ານນາງພຽນພອນ ດີຖີຜູ້ປະສານງານໃນການປຸກລະດົມຂອງອົງການ
ແມ່ນໍ້າສາກົນ ທີ່ປະເທດໄທກ່າວຕໍ່ວີໂອເອວ່າ ເຂື່ອນດັ່ງກ່າວສາມາດມີຜົນກະທົບແບບໃດແບບນຶ່ງທີ່ຄາດການບໍ່ໄດ້ຕໍ່ສິ່ງແວດລ້ອມ ຊຶ່ງຈະມີຕໍ່ພົນລະເມືອງ 60 ລ້ານຄົນທີ່ອາໄສຢູ່ເລາະຕາມແຄມແມ່ນໍ້າຂອງ ແລະອາໄສການຫາຢູ່ຫາກິນນໍາການປະມົງໃນແມ່ນໍ້າຂອງນີ້ ຊຶ່ງທ່ານນາງກ່າວວ່າ….
Pianporn act:….
ຜົນກະທົບນີ້ບໍ່ພຽງແຕ່ຈະເກີດຂຶ້ນຢູ່ເລາະຕາມແຄມເຂື່ອນ ຫລືໃນໄທ ເທົ່ານັ້ນ ແຕ່ມັນຈະສົ່ງຜົນກະທົບຕໍ່ກໍາປູເຈຍ ແລະເຂດສາມຫລ່ຽມ ປາກແມ່ນໍ້າຂອງທີ່ຫວຽດນາມ ຊຶ່ງເປັນອູ່ເຂົ້າອູ່ນໍ້າ ຂອງຫວຽດນາມ ນັ້ນເຊ່ນກັນ.
ທ່ານນາງພຽນພອນ ກ່າວຕື່ມວ່າ ໄທບໍ່ຕ້ອງການກະແສໄຟຟ້າທີ່ຜະລິດຈາກເຂື່ອນໄຊຍະບູລີນີ້.
ລາວ ຊຶ່ງເປັນນຶ່ງໃນບັນດາປະເທດທີ່ທຸກຍາກທີ່ສຸດໃນໂລກ ຄາດວ່າ ຈະໄດ້ຮັບຜົນປະໂຫຍດຢ່າງມະຫາສານທາງດ້ານເສດຖະກິດຈາກການ ຂາຍກະແສໄຟຟ້າ ທີ່ເຂື່ອນດັ່ງກ່າວຜະລິດສ່ວນໃຫຍ່ ໃນປະລິມານ 1200 ກິໂລວັດໃຫ້ໄທນັ້ນ.
