ລິ້ງ ສຳຫລັບເຂົ້າຫາ

ຄວາມເປັນລະບຽບ ກັບຄືນ ສູ່ປະເທດໄທ

  • ໄພສານ ວໍຣະຈັກ

ນາຍົກລັດຖະມົນຕີໄທ ທ່ານອະພິຊິດ ເວດຊາຊີວະ ກ່າວວ່າ ຄວາມເປັນລະບຽບຮຽບຮ້ອຍ ໄດ້ກັບຄືນມາສູ່ ບາງກອກແລ້ວ ຫຼັງຈາກ ໄດ້ມີການປາບປາມ ພວກປະທ້ວງ ຕໍ່ຕ້ານລັດຖະບານ ແບບນອງເລືອດ ແລະການກໍ່ຈະລາຈົນ ທີ່ຕິດຕາມມາ ໃນທົ່ວ ນະຄອນຫຼວງ ຂອງໄທ.

ທ່ານອະພິຊິດ ໄດ້ປະກາດ ກ່ຽວກັບເລື່ອງນີ້ ໃນລະຫວ່າງ ການກ່າວຄຳປາໄສ ທາງໂທລະພາບ ຕໍ່ປະເທດຊາດ ໃນວັນສຸກມື້ນີ້ ສອງມື້ ຫຼັງຈາກ ກຳລັງຮັກສາ ຄວາມສະຫງົບ ຂອງໄທ ໄດ້ບຸກເຂົ້າທຳລາຍ ຄ້າຍຂອງພວກປະທ້ວງ ເສື້ອແດງ ແລະບັງຄັບໃຫ້ ການປະທ້ວງ ທີ່ດຳເນີນມາ ເປັນເວລາສອງເດືອນ ສິ້ນສຸດລົງ.

ນາຍົກລັດຖະມົນຕີໄທ ປະກາດວ່າ ຈະສືບຕໍ່ ດຳເນີນຄວາມພະຍາຍາມ ໃນການສ້າງ ຄວາມປອງດອງຊາດ ກັບພວກເສື້ອແດງ ໂດຍກ່າວຕໍ່ ປະຊາຊົນຊາວໄທວ່າ ພວກເຂົາເຈົ້າ ຢູ່ໃນເຮືອນຫລັງດຽວກັນ. ກ່ອນເກີດຄວາມຮຸນແຮງ ໃນສັບປະດານີ້ ທ່ານອະພິຊິດ ໄດ້ສະເໜີແຜນການ ສ້າງຄວາມປອງດອງຊາດ 5 ຂໍ້ ຮວມທັງການປະຕິຮູບ ທາງດ້ານເສດຖະກິດ ແລະການເມືອງ.

ນອກນັ້ນແລ້ວ ທ່ານອະພິຊິດ ຍັງໄດ້ສະເໜີ ທີ່ຈະຍຸບສະພາ ແລະຈັດໃຫ້ມີ ການເລືອກຕັ້ງໃໝ່ ໃນວັນທີ 14 ພະຈິກປີນີ້ ຊຶ່ງເປັນຂໍ້ຮຽກຮ້ອງ ທີ່ສຳຄັນ ຂອງພວກປະທ້ວງ ເສື້ອແດງ.

ແຕ່ທ່ານອະພິຊິດ ໄດ້ຖອນຂໍ້ສະເໜີດັ່ງກ່າວ ຫລັງຈາກ ພວກເສື້ອແດງ ທຳການຮຽກຮ້ອງໃໝ່ເພີ້ມ ແລະປະຕິເສດ ທີ່ຈະຢຸດເຊົາ ການຢຶດເອົາ ຍ່ານການຄ້າ ທີ່ສຳຄັນ ໃນບາງກອກ ເປັນຄ້າຍຂອງ ພວກເຂົານັ້ນ.

ໃນເລື່ອງດຽວກັນ ລັດຖະມົນຕີ ກະຊວງການເງິນ ຂອງໄທ ທ່ານ KORN CHATIKAVANIJ ກ່າວຕໍ່ກອງປະຊຸມ ເສດຖະກິດ ທີ່ກຸງໂຕກຽວ ໃນວັນສຸກ ມື້ນີ້ວ່າ ການເລືອກຕັ້ງ ອາດຈະບໍ່ມີຂຶ້ນ ໃນເດືອນພະຈິກ ຈະມາ ຍ້ອນຄວາມບໍ່ແນ່ນອນ ກ່ຽວກັບ ສະຖານະການ ດ້ານຄວາມໝັ້ນຄົງ ຂອງໄທ.

XS
SM
MD
LG