ເຈົ້າໜ້າທີ່ໄທ ໄດ້ຕໍ່ອາຍຸ ການຫ້າມ ອອກນອກເຮືອນ ໃນຍາມກາງຄືນ ຢູ່ທີ່ບາງກອກ ແລະ 23 ຈັງຫວັດ ຕື່ມອີກ 3 ມື້ ຂະນະທີ່ ນະຄອນຫຼວງ ຂອງໄທ ເລີ້ມຟື້ນໂຕຄືນ ຈາກການກໍ່ກະບົດ ແລະການໂຈມຕີ ດ້ວຍການຈູດເຜົາ ໃນມື້ວັນພຸດ ວານນີ້.
ໂຄສົກຄົນນຶ່ງ ຂອງກອງທັບໄທ ກ່າວວ່າ ການຫ້າມ ອອກນອກເຮືອນ ຈະມີຜົນບັງຄັບ ແຕ່ 9 ໂມງແລງ ຫາ 5 ໂມງເຊົ້າ ຕາມເວລາທ້ອງຖິ່ນ ໄປຈົນຮອດ ມື້ວັນເສົາຈະມາ.
ພວກປະທ້ວງ ໄດ້ຈູດໄຟເຜົາ ຢ່າງນ້ອຍ 31 ບ່ອນ ໃນເຂດບາງກອກ ຫລັງຈາກ ໄດ້ມີການປາບປາມ ພວກປະທ້ວງ ຕໍ່ຕ້ານລັດຖະບານ ທີ່ເຂົ້າຢຶດ ເຂດຍ່ານການຄ້າ ທີ່ສຳຄັນໃນບາງກອກ ມາໄດ້ຫຼາຍອາທິດ ແລ້ວນັ້ນ. ມີ 7 ຄົນ ເສຍຊີວິດ ເວລາທະຫານ ບຸກຜ່ານ ເຄື່ອງກີດຂວາງ ເຂົ້າໄປໃນຄ້າຍ ຂອງພວກປະທ້ວງ ແລະລະດົມຍິງປືນໃສ່.
ໃນວັນພະຫັດມື້ນີ້ ກຳລັງຮັກສາ ຄວາມສະຫງົບ ຂອງໄທ ໄດ້ເຂົ້າໄປ ໃນວັດແຫ່ງນຶ່ງ ທີ່ຢູ່ໃນເຂດ ຂອງພວກປະທ້ວງ ບ່ອນທີ່ ພວກເສື້ອແດງ ຈຳນວນຫຼາຍຮ້ອຍຄົນ ໄດ້ພາກັນ ເຂົ້າໄປຫລົບລີ້ ການບຸກໂຈມຕີ ຂອງພວກທະຫານ. ພວກນັກຂ່າວ ຕ່າງປະເທດ ກ່າວວ່າ ມີການພົບເຫັນ ສົບຄົນຕາຍ 6 ສົບ ທີ່ວັດດັ່ງກ່າວ.
ໃນມື້ວານນີ້ ໄດ້ມີການຈູດໄຟເຜົາ ຕະຫລາດຮຸ້ນ ຂອງໄທ ແລະໃນວັນພະຫັດມື້ນີ້ ແລະວັນສຸກມື້ອື່ນ ຕລາດຮຸ້ນຂອງໄທ ປິດກິດຈະການ. ຮ້ານສັບພະສິນຄ້າ CENTRAL ຊຶ່ງເປັນນຶ່ງ ໃນຮ້ານສັບພະສິນຄ້າ ທີ່ໃຫຍ່ທີ່ສຸດ ໃນເຂດເອເຊຍ ຕາເວັນອອກສຽງໃຕ້ ກໍຖືກໂຈມຕີ ດ້ວຍການເອົາໄຟເຜົາ ແລະຖືກປຸ້ນ ເອົາເຄື່ອງນຳດ້ວຍ.
