ລິ້ງ ສຳຫລັບເຂົ້າຫາ

ຊາວໄທ ທີ່ຄັດຄ້ານ ການສ້າງເຂື່ອນ ໃສ່ນໍ້າຂອງ ຍື່ນຟ້ອງ ຕໍ່ສານ

  • ໄພສານ ວໍຣະຈັກ

ພວກນັກທ່ອງທ່ຽວ ແລະພວກຫຼິ້ນການພະນັນ ພາກັນລົງເຮືອ ທີ່ທ່າເຮືອແຫ່ງນຶ່ງໃກ້ໆເມືອງຊຽງແສນຂອງໄທ ໃນ ເຂດສາມຫຼ່ຽມຄຳ ບ່ອນທີ່ຊາຍແດນ ລາວ ໄທ ແລະມຽນມາ ພົບກັນນັ້ນ. (14 ມັງກອນ 2012)

ຊາວໄທທີ່ຄັດຄ້ານຕໍ່ໂຄງການສ້າງເຂື່ອນໄຟຟ້າພະລັງນໍ້າ ໃສ່ແມ່ນໍ້າຂອງ ຢູ່ແຂວງໄຊຍະບູລີ ໃນປະເທດລາວນັ້ນ ໄດ້ຍື່ນຟ້ອງເລື່ອງດັ່ງກ່າວນີ້ຕໍ່ສານ ແຕ່ບໍ່ແມ່ນຢູ່ທີ່ ສປປ ລາວ ຊຶ່ງເປັນ ປະເທດຄອມມູນິສ. ໃນຄວາມພະຍາຍາມ ເພື່ອຍຸຕິ ໂຄງການສ້າງເຂື່ອນ ໃນອະນາຄົດນັ້ນ ພວກເຂົາເຈົ້າໄດ້ຍື່ນສຳນວນຟ້ອງຕໍ່ເຈົ້າໜ້າທີ່ພະລັງງານຂອງໄທເພື່ອໃຫ້ຍົກເລີກຂໍ້ຕົກລົງ ຊື້ໄຟຟ້າສ່ວນໃຫຍ່ຈາກໂຄງການສ້າງເຂື່ອນດັ່ງກ່າວ. Daniel Schearf ຜູ້ສື່ຂ່າວວີໂອເອ ມີລາຍງານກ່ຽວກັບເລື່ອງນີ້ຈາກບາງກອກ

ພວກ​ຊາວບ້ານ​ໄທ​ທີ່​ອາ​ໄສຢູ່​ເລາະ​ລຽບ​ຕາມ​ລຳ​ແມ່​ນໍ້າຂອງ ​ໄດ້​ພາກັນ​ຍື່ນ​ສຳນວນ​ຟ້ອງຮ້ອງ
ທ້າ​ທາຍ​ທາງ​ດ້ານ​ກົດໝາຍຕໍ່​ສານ​ແຫ່ງ​ນຶ່ງ​ໃນ​ເຂດ​ບາງກອກເມື່ອ​ວັນ​ອັງຄານ​ວານ​ນີ້ ​ເພື່ອພະ
ຍາ​ຍາມຍຸຕິ​ໂຄງການ​ສ້າງ​ເຂື່ອນ​ໄຊ​ຍະ​ບູລີ ຢູ່​ໃນ​ພາກເໜືອ​ຂອງ​ລາວ.

ການ​ຟ້ອງ​ຮ້ອງທີ່​ວ່າ​ນີ້​ແມ່ນ​ເພື່ອ​ຊອກ​ຫາ​ຊ່ອງ​ທາງ​ໃຫ້​ມີ​ການ​ຍົກ​ເລີກຂໍ້​ຕົກລົງໂດຍ​ພວກ​ເຈົ້າ
ໜ້າ​ທີ່​ພະລັງງານ​ຂອງ​ໄທ ທີ່​ຈະ​ຊື້ກະ​ແສ​ໄຟຟ້າ 95% ​ທີ່​ຜະລິດ​ຈາກ​ເຂື່ອນ​ດັ່ງກ່າວ.

ສຳນວນ​ຟ້ອງກ່າວໂຕ້​ແຍ້​ງວ່າ ຂໍ້​ຕົກລົງ​ທີ່​ວ່າ​ນີ້ແມ່ນ​ຂັດ​ກັບ​ລັດຖະທຳ​ມະນູນ​ແລະ​ຜິດກົດໝາຍ
ຍ້ອນ​ບໍ່ໄດ້ມີ​ການ​ປຶກສາ​ຫາລື​ຫຼືໃຫ້​ພວກ​ຊາວບ້ານ​ຕ່າງໆ​ທີ່ຢູ່​ອາ​ໄສ​ໃນ​ເຂດໃຕ້​ເຂື່ອນປະກອບ
​ຄວາມ​ເຫັນ​ເຂົ້າໃນ​ໂຄງການ​ສ້າງ​ເຂື່ອນ.

ພວກ​ຊາວບ້ານ​ໄທ​ຫວັງ​ວ່າ ຖ້າ​ປາສະ​ຈາກ​ຂໍ້​ຕົກລົງ​ຊື້ໄຟຟ້າ​ແລ້ວ ​ໂຄງການ​ສ້າງເຂື່ອນ ​ມູນ​ຄ່າ
3 ພັນ 600 ​ລ້ານໂດ​ລາ​ດັ່ງກ່າວ​ ກໍ​ຈະ​ບໍ່​ສາມາດ​ດຳ​ເນີນ​ການ​ຕໍ່​ໄປ​ໄດ້.

ທ່ານ​ນາງ​ພຽນ​ພອນ ດີ​ຖີ ຫົວໜ້າ​ປຸກລະດົມ​ ຂອງ​ອົງການ​ແມ່ນໍ້າ​ສາກົນ​ ໃນ​ປະ​ເທດ​ໄທ ຊຶ່ງ
​ເປັນກຸ່ມ​ປົກ​ປ້ອງ​ສິ່ງ​ແວດ​ລ້ອມທີ່​ພົວພັນ​ໃນ​ການ​ຟ້ອງ​ຮ້ອງ​ໃນ​ຄັ້ງນີ້. ທ່ານ​ນາງ​ເວົ້າວ່າ ພວກ​
ຊາວບ້ານ​ໄດ້​ພາກັນ​ຈົ່ມທຸກຢູ່​ແລ້ວ ກ່ຽວ​ກັບ​ຜົນ​ກະທົບ​ໃນທາງ​ລົບ ​ຈາກ​ການ​ສ້າງ​ເຂື່ອນ​ໃສ່​
ແມ່​ນໍ້າຂອງ​ຕອນ​ເທິງ ​ທີ່ຢູ່​ໃນ​ປະ​ເທດ​ຈີນ ​ແລະ​ມີ​ຄວາມ​ວິຕົກກັງວົນກ່ຽວ​ກັບ​ຜົນ​ກະທົບ​ເພີ່ມ
​ຕື່ມ​ ຖ້າ​ຫາກ​ມີ​ການ​ສ້າງ​ເຂື່ອນ​ໃສ່​ເຂດ​ລຸ່ມ​ແມ່​ນໍ້າຂອງອີກ.

“ພວກຊາວບ້ານ ໄດ້ປະສົບກັບຜົນກະທົບໃນທາງບໍ່ດີຫລາຍຢ່າງ ເຊັ່ນ ການປ່ຽນແປງຂອງ
ລະບົບນິເວດ, ການຍື່ງຂຶ້ນແລະບົກລົງຂອງນໍ້າແບບຜິດປົກກະຕິ, ໄພນໍ້າຖ້ວມ ຫລືໄພແຫ້ງ
ແລ້ງເກີດຂຶ້ນ ແບບກະທັນຫັນ ຊຶ່ງວ່າ ບໍ່ເປັນທໍາມະຊາດ ອີກຕໍ່ໄປແລ້ວ. ແລະສະພາບການ
ແບບນີ້ແມ່ນສົ່ງ ຜົນກະທົບດ້ານລົບຕໍ່ລະບົບແບບແຜນການໄຫລຫລືເຄື່ອນຍ້າຍຂອງປາ.”

ອ່າງ​ແມ່​ນໍ້າຂອງ ​ເປັນ​ແຫຼ່ງປະມົງ​ນໍ້າຈືດ​ ທີ່​ໃຫຍ່​ທີ່​ສຸດ​ໃນ​ໂລກ. ມີປະຊາ​ຊົນ​ປະມານ 60 ລ້ານ
​ຄົນ ​ກາງ​ຕໍ່​ອາ​ໄສ​ແມ່ນໍ້າ​ສາຍ​ນີ້ ​ເພື່ອການ​ດຳລົງ​ຊີວິດ.

ສອງປະ​ເທດ ກຳປູ​ເຈຍ​ແລະຫວຽດນາມ​ທີ່​ຢູ່ໃຕ້​ເຂື່ອນ​ລົ​ງມາ​ກໍ​ພາກັນ​ຄັດຄ້ານ​ຕໍ່​ໂຄງການສ້າງ
​ເຂື່ອນ​ດັ່ງກ່າວ​ນີ້ຄື​ກັນ ຍ້ອນ​ມີ​ຄວາມເປັນ​ຫ່ວງ​ກັງວົນ​ນໍາ​ຜົນ​ກະທົບ​ຕໍ່​ການ​ຫາ​ປາ.

​ແຕ່​ລາວ ຊຶ່ງ​ເປັນ​ປະ​ເທດ​ທີ່​ທຸກ​ຍາກ​ນັ້ນ ຕ້ອງການ​ຢາກ​ສ້າງ​ເຂື່ອນ​ໄຊ​ຍະ​ບູລີ​ແລະ​ອີກຫຼາຍໆ
ເຂື່ອນ​ ​ອັນເປັນ​ພາກສ່ວນ​ນຶ່ງ​ຂອງ​ແຜນ​ການ ​ທີ່​ຈະ​ເຮັດ​ໃຫ້​ລາວ ກາຍ​ເປັນ​ໝໍ້​ໄຟ​ຂອງ​ເຂດ​ເອ
ເຊຍ​ຕາ​ເວັນ​ອອກສຽງ​ໃຕ້.

ສຳນວນ​ຟ້ອງ​ສະບັບ​ນີ້ ​ເຖິງ​ແມ່ນ​ໄດ້​ຮັບ​ການ​ສະໜັບສະໜຸນຈາກ 1,000 ລາຍເຊັນ​ກໍ​ຈິງ ​ແຕ່​
ກໍ​ມີ​ທ່າ​ທາງ​ວ່າ​ຈະ​ໄດ້​ຮັບ​ການ​ຄັດຄ້ານ​ຢ່າງ​ແຂງ​ຂັນຈາກ​ພວກເຈົ້າໜ້າ​ທີ່​ພະລັງງານ​ຂອງ​ໄທຕະ
ຫຼອດທັງ​ບໍລິສັດ​ຕ່າງໆ​ຂອງ​ໄທ ​ທີ່ໄດ້ທໍາການ​ລົງທຶນ​ຢ່າງ​ໜັກໃສ່ໂຄງການ​ນີ້​ໄປ​ແລ້ວ.

​ແຕ່​ແນວ​ໃດກໍ​ຕາມ ທ່ານ​ນາງ​ພຽນ​ພອນ​ເວົ້າວ່າ ​ເຂົາ​ເຈົ້າ​ມີ​ຄວາມ​ຫວັງ​ໄປ​ໃນແງ່​ດີ​ທີ່​ວ່າພວກ
​ເຂົາ​ເຈົ້າອາດ​ຈະ​ຊະນະ​ຄະດີ​ນີ້ແລະ​ຫວັງ​ວ່າຈະ​ໃຫ້​ເປັນ​ຕົວຢ່າງ​ ແບບ​ທີ່​ບໍ່​ເຄີຍ​ມີ​ມາ​ກ່ອນ​ກ່ຽວ​
ກັບ​ໂຄງການ​ສ້າງ​ເຂື່ອນ​ຂ້າມ​ຊາຍ​ແດນ​ຕ່າງໆ​ໃນອະນາຄົດ​ຂ້າງ​ໜ້ານັ້ນ.

“ມີບໍລິດສັດໄທຫລາຍບໍລິສັດພາກັນໄປລົງທຶນຢູ່ປະເທດບ້ານໃກ້ເຮືອນຄຽງ ໂດຍສະເພາະ
ກໍແມ່ນລາວ, ກໍາປູເຈຍ ແລະມຽນມາ ໂດຍປາດສະຈາກ ມາດຕະຖານໃດໆ. ພວກເຂົາເຈົ້າ ບໍ່ຕ້ອງປະຕິບັດຕາມກົດໝາຍຂອງໄທ. ພວກເຮົາຢາກເຫັນວ່າການຟ້ອງຮ້ອງຂຶ້ນສານອັນ
ນີ້ ເປັນການຕັ້ງມາດຕະຖານໃໝ່ ໃຫ້ແກ່ການລົງທຶນຂອງໄທ ຢູ່ຕ່າງປະເທດ ຊຶ່ງຢ່າງໜ້ອຍ
ພວກ ເຂົາເຈົ້າກໍຕ້ອງປະຕິບັດຕາມ ຫລືເຄົາລົບກົດໝາຍຂອງປະເທດຕົນ.”

ລາວ​ໄດ້​ໂຈະ​ໂຄງການ​ສ້າ​ງ​ເຂື່ອນ​ໄຊ​ຍະ​ບູລີ​ໄວ້​ເປັນ​ການ​ຊົ່ວຄາວລຸນ​ຫຼັງທີ່​ໄດ້​ມີ​ການ​ຄັດຄ້ານ
​ຢ່າງ​ແຂງ​ຂັນ​ ຈາກ​ກຳປູ​ເຈຍ​ແລະ​ຫວຽດນາມ.

​ແຕ່​ບັນດາ​ກຸ່ມ​ປົກ​ປ້ອງ​ສິ່ງ​ແວດ​ລ້ອມ​ ​ໄດ້ຊີ້​ໃຫ້​ເຫັນ​ວ່າ ການ​ກໍ່ສ້າງ ແລະ​ການ​ຕົກລົງ​ກັນທີ່​
ພົວພັນ​ກັບ​ໂຄງການ​ເຂື່ອນ​ໄຊ​ຍະ​ບູລີ​ນີ້ຍັງ​ດຳ​ເນີນຢູ່​ຕໍ່​ມາ ​ຊຶ່ງ​ເປັນ​ການ​ສະ​ແດງໃຫ້​ເຫັນ​ວ່າ
ທາງ​ການ​ລາວ​ມີ​ແຜນ​ທີ່​ຈະ​ດຳ​ເນີນ​ການ​ຕໍ່​ໄປ​ກ່ຽວກັບໂຄງການສ້າງ​ເຂື່ອນ​ດັ່ງກ່າວ​ ໂດຍ​ບໍ່​
ສົນ​ໃຈ​ວ່າ​ແມ່ນ​ຫຍັງ​ຈະ​ເກີດ​ຂຶ້ນກໍ​ຕາມ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG