ກະສັດພູມີພົລ ອະດຸນຍະເດດ ທີ່ມີພະຊົນມາຍຸ 88 ປີ ຂອງປະເທດໄທ ໄດ້ຮັບການປິ່ນປົວຍ້ອນເລືອດຕິດເຊື້ອ ອີງຕາມລາຍງານຫຼ້າສຸດກ່ຽວກັບສຸຂະພາບຂອງກະສັດ ທີ່ຄອງຣາດດົນນານທີ່ສຸດໃນໂລກ.
ໃນຖະແຫຼງການສະບັບນຶ່ງ ທີ່ນຳອອກເຜີຍແຜ່ໃນວັນສຸກວານນີ້ ສຳນັກພະຣາຊະວັງກ່າວວ່າ ກະສັດພູມີພົລ ຊົງມີພະອາການດີຂຶ້ນເປັນລຳດັບ ຫລັງຈາກສືບຕໍ່ ໄດ້ຮັບການບຳບັດຮັກສາກ່ຽວກັບໝາກໄຂ່ຫຼັງ.
ສຳນັກພະຣາຊະວັງຂອງໄທກ່າວວ່າ ມີນ້ຳຢູ່ໃນປອດຂອງພະອົງແລະການເຮັດວຽກຂອງໝາກໄຂ່ຫຼັງບໍ່ເຕັມອັດຕາ. ຖະແຫຼງການກ່າວຕື່ມວ່າພະອົງໄດ້ຊົງ ຫາຍໃຈໄວແລະແໜ້ນໜ້າເອິກໃນມື້ວັນພຸດແລ້ວ ແລະມີການກວດພົບວ່າ ໄດ້ມີເລືອດຕິດເຊື້ອ.
ການກົດດັນຕ່ຳຂອງເລືອດແລະອາການໄຂ້ຂອງພະອົງໄດ້ດີຂຶ້ນເປັນລຳດັບ ອີງຕາມຖະແຫຼງການຂອງພະຣາຊະວັງ.
ກະສັດໄທຊົງໄດ້ຮັບການປິ່ນປົວກ່ຽວກັບການເຈັບປ່ວຍຫຼາຍໆຢ່າງ ໃນຮອບປີທີ່ຜ່ານມາຢູ່ໂຮງພະຍາບານສິຣິຣາດ ໃນບາງກອກ. ພະອົງໄດ້ຊົງປາກົດຕົວໃນທີ່ສາທາລະນະເປັນເທື່ອສຸດທ້າຍເມື່ອວັນທີ 11 ມັງກອນເວລາພະອົງໄດ້ໃຊ້ເວລາຫຼາຍໆຊົ່ວໂມງຢູ່ພະຣາຊະວັງຫຼວງ ທີ່ນະຄອນຫຼວງຂອງໄທ.
ກະສັດພູມີພົລຊົງເປັນທີ່ເຄົາລົບຮັກ ຂອງປະຊາຊົນຊາວໄທ ແລະລາຍງານຂ່າວກ່ຽວກັບສຸຂະພາບຂອງພະອົງ ແມ່ນໄດ້ມີການຕິດຕາມກັນຢ່າງໃກ້ຊິດ.
