ທໍາອິດນັ້ນ ໄທຖືກຈັດເຂົ້າໃນລະດັບສອງ ຫລື Tier ສອງ ຢູ່ໃນບັນຊີ ປີ 2010 ສໍາລັບ
ພວກປະເທດທີ່ມີການລັກລອບຄ້າມະນຸດ ທີ່ບໍ່ປະຕິບັດຕາມ ມາດຕະຖານຕໍ່າສຸດທີ່ໄດ້
ລະບຸໄວ້ ເພື່ອແກ້ໄຂການລັກລອບຄ້າມະນຸດນັ້ນ. ຖ້າຫາກວ່າປະເທດໃດບໍ່ໄດ້ສະແດງ
ໃຫ້ເຫັນຮ່ອງຮອຍໃດໆວ່າໄດ້ມີການປັບປຸງໃຫ້ດີຂຶ້ນ ຫລັງຈາກຢູ່ໃນລະດັບນັ້ນມາໄດ້
ສອງປີແລ້ວນັ້ນ ກໍຈະຖືກລົດໄປສູ່ລະດັບຕໍ່າສຸດ ຫລື ເທຍສາມ ໂດຍອັດຕະໂນມັດແລະ
ຢູ່ໃນລະດັບດຽວກັນກັບ ເກົາຫລີເໜືອ ຄິວບາ ແລະມຽນມາ.
ຈາກສະຖານະພາບນີ້ ປະເທດດັ່ງກ່າວກໍອາດຖືກລົງໂທດໃນດ້ານທີ່ບໍ່ກ່ຽວກັບມະນຸດສະທໍາໄດ້.
ພວກກຸ່ມຕ່າງໆເຊັ່ນກຸ່ມສິ້ງຊອມສິດທິມະນຸດ Human Rights Watch ແລະມູນນິທິ
ກະຈົກ ຫລື Mirror Foundation ກ່າວວ່າ ໄທໄດ້ປະສົບກັບການລັກລອບຄ້າມະນຸດ
ເພີ່ມຂຶ້ນ ໂດຍສະເພາະໃນພວກເດັກສາວ ເມື່ອບໍ່ເທົ່າໃດປີຜ່ານມານີ້ ທີ່ເຮັດໃຫ້ປະເທດໄທ
ຕົກຢູ່ໃນອັນຕະລາຍທີ່ຈະຖືກຈັດວ່າ ເປັນປະເທດຝ່າຝືນສິດທິມະນຸດຂັ້ນຮ້າຍແຮງທີ່ສຸດ
ຂອງໂລກ ຮ່ວມກັບອີກສາມປະເທດທີ່ກ່າວຊື່ມານັ້ນ.
ທ່ານ Phil Robertson ຮອງຜູ້ອໍານວຍການປະຈໍາຫ້ອງການເອເຊຍຂອງກຸ່ມສິ້ງຊອມ
ສິດທິມະນຸດ Human Rights Watch ກ່າວຕໍ່ຄະນະກໍາມະການສົນທະນາຫາລືກັນ
ຄະນະນຶ່ງ ຢູ່ສະໂມສອນພວກນັກຂ່າວຕ່າງປະເທດແຫ່ງປະເທດໄທວ່າ ທາງການໄທໄດ້
ຮັບຜ່ານກົດໝາຍຫລາຍສະບັບ ທີ່ໜ້າຈະພຽງພໍເພື່ອກໍາຈັດຄື້ນຟອງການລັກລອບຄ້າ
ມະນຸດນັ້ນ ຫາກແຕ່ວ່າໄດ້ມີຄວາມລັງເລບໍ່ເອົາຈິງເອົາຈັງ ໃນການປ້ອງກັນສິດທິຂອງ
ຜູ້ຕົກເປັນເຫຍື່ອ.
ທ່ານໂຣເບີດສັນກ່າວວ່າ “ເຮົາຕ້ອງເຂົ້າໃຈ ກ່ຽວກັບບັນຫາການລັກລອບ
ຄ້າມະນຸດນີ້ວ່າ ມັນເກີດຂຶ້ນຢູ່ນໍາການເຂົ້າເມືອງມາຂອງພວກຄົນງານ
ຕ່າງດ້າວ ຈາກລາວ ກໍາປູເຈຍ ແລະມຽນມາ ຫລາຍເຖິງສອງຫາສາມ
ລ້ານຄົນ ທີ່ມາຢູ່ໃນປະເທດໄທ ຊຶ່ງຫລາຍໆຄົນບໍ່ມີໜັງສືເຂົ້າເມືອງຢ່າງ
ຖືກຕ້ອງຕາມກົດໝາຍ ແລະບໍ່ສາມາດເຂົາເຖິງລະບົບການໃດໆທີ່
ສາມາດຊ່ວຍເຫລືອພວກເຂົາເຈົ້າໄດ້.”
ທ່ານໂຣເບີດສັນກ່າວຕໍ່ໄປວ່າ ແມ່ນແຕ່ພວກທີ່ຖືກມອບໝາຍໜ້າທີ່ໃຫ້ທໍາການທັບມ້າງ
ກຸ່ມລັກລອບຄ້າມະນຸດນັ້ນ ກໍຍັງພາກັນສົມຮູ້ຮ່ວມຄິດໃນການຂູດຮີດເອົາຮັດເອົາປຽບ
ພວກຄົນງານທີ່ເຂົ້າເມືອງຜິດກົດໝາຍນັ້ນຢູ່.
ທ່ານໂຣເບີດສັນເວົ້າວ່າ “ເວົ້າກົງໆ ພວກຕໍາຫລວດເອງນັ້ນແຫລະເປັນ
ຕົວການບຽດບຽນຫລອກຕົ້ມ ຄືພວກຕໍາຫລວດເຫັນພວກຄົນງານ
ຕ່າງດ້າວເປັນໂອກາດ ທີ່ພວກຕົນສາມາດຂູດຮີດ ຂູ່ເຂັນເອົາເງິນ
ແລະພວກເຮົາກໍມີເລຶ່ອງລາວ ທີ່ພວກຕໍາຫລວດພົວພັນນໍາບັນຫາ
ການລັກລອບຄ້າມະນຸດ.”
ຄໍາຕໍາໜິຕິຕຽນແມ່ນໜັກໜ່ວງເປັນພິເສດ ຫລັງຈາກມີການເຜີຍແຜ່ລາຍງານຂັ້ນຕົ້ນ
ໂດຍຜູ້ຂຽນລາຍງານພິເສດຂອງອົງການສະຫະປະຊາຊາດສໍາລັບການລັກລອບຄ້າມະ
ນຸດ. ລາຍງານໂຈມຕີປະເທດໄທວ່າ ມີໂຄງຮ່າງດ້ານກົດໝາຍທີ່ອ່ອນແອແລະແຕກຫັກ
ສໍາລັບປາຍປາມການລັກລອບຄ້າມະນຸດນັ້ນ ມີການຄໍຣັບຊັ່ນຫລືສໍ້ລາດບັງຫລວງຢ່າງ
ຝັງຮາກເລິກ ຢູ່ໃນວົງການເຈົ້າໜ້າທີ່ບັງຄັບກົດໝາຍ ແລະມີລະບົບທີ່ບໍ່ດີໃນການບົ່ງຊີ້
ໂຕພວກເຄາະຮ້າຍ.
ຊາວປະມົງຂະເໝນ ຈໍານວນນຶ່ງ ທີ່ຖືກຊ່ວຍອອກມາຈາກການຖືກບັງຄັບ
ໃຫ້ເຮັດວຽກໜັກຢູ່ໃນເຮືອປະມົງຂອງໄທ ເດີນທາງມາຮອດສະໝາມບິນ
ພະນົມເປັນ, ວັນທີ 12 ເດືອນທັນວາ 2012.
ລາຍງານດັ່ງກ່າວໄດ້ຮັບການສະໜັບສະໜຸນໂດຍ ທ່ານເອກກະລັກ ລູມຊົມແຄ ຈາກມູນນິທິ
Mirror Foundation ທີ່ກ່າວຕໍ່ຄະນະກໍາມະການຜ່ານນາຍພາສາວ່າ ໄດ້ມີການເພີ່ມທະວີ
ຂຶ້ນ ໃນຈໍານວນພວກເດັກສາວ ອາຍຸລະຫວ່າງ 11 ຫາ 15 ປີ ທີ່ຖືກລັກລອບໄປຂາຍເປັນ
ໂສເພນີ. ເນຶ່ອງຈາກວ່າພວກເຄາະຮ້າຍທີ່ກ່າວນີ້ ມີອາຍຸຍັງບໍ່ເຖິງກະສຽນ ພວກເຂົາເຈົ້າຈຶ່ງ
ບໍ່ຖືກບັງຄັບ ໃຫ້ເຮັດວຽກຢູ່ຕາມຊ່ອງໂສເພນີ ຫລືຕາມບາຄາຣາໂອເກະ ແລະກົງກັນຂ້າມ
ພວກເຂົາເຈົ້າຖືກຈັດສົ່ງໄປໃຫ້ພວກລູກຄ້າຢູ່ບ້ານໂດຍກົງ ຊຶ່ງທ່ານເອກກະລັກກ່າວວ່າ ມັນ
ເຮັດໃຫ້ເປັນການລໍາບາກ ທີ່ຈະສາມາດຮູ້ເຖິງຂອບເຂດຄວາມຮ້າຍແຮງທີ່ແທ້ຈິງຂອງບັນຫາ
ນີ້ໄດ້.
ທ່ານເອກກະລັກເວົ້າວ່າ “ລູກຄ້າຂອງພວກເດັກນ້ອຍເຫລົ່ານີ້ ສ່ວນຫລາຍເປັນລັດຖະກອນ
ຫລື ພວກມີໜ້າມີຕາຢູ່ໃນເຂດທ້ອງຖິ່ນຂອງເຂົາເຈົ້າ. ດັ່ງນັ້ນ ມັນຈຶ່ງຍາກລໍາບາກຫລາຍ
ທີ່ຈະຕິດຕາມພວກເຂົາເຈົ້າ ຫລືດໍາເນີນການແນວໃດແນວນຶ່ງ ຕໍ່ພວກເຂົາເຈົ້າ.”
ທ່ານ ຊູທິນທອນ ກົງສັກ ຮອງຜູ້ອໍານວຍການໃຫຍ່ກົມອົງການຈັດຕັ້ງສາກົນຂອງກະຊວງ
ຕ່າງປະເທດໄທ ໄດ້ກ່າວປ້ອງກັນຄວາມພະຍາຍາມຕໍ່ຕ້ານການລັກລອບຄ້າມະນຸດຂອງລັດ
ຖະບານ ໃນຂະນະທີ່ປະເຊີນກັບສິ່ງທ້າທາຍນາໆປະການໃນລະດັບກວ້າງຂວາງ ໃນໄລຍະ
ບໍ່ເທົ່າໃດປີຜ່ານມານີ້.
ທ່ານກົງສັກເວົ້າວ່າ: “ພວກເຮົາເປັນປະເທດລະດັບລາຍໄດ້ສູງກວ່າປານກາງ
ອິງຕາມສະມາຊິກຄະນະກໍາມະການກ່ຽວກັບສິດທິຂອງເດັກ ແລະດ້ວຍສະຖາ
ນະພາບດັ່ງກ່າວນັ້ນ ຈຶ່ງມີຄວາມຄາດຫວັງຫລາຍຂຶ້ນຈາກພວກເຮົາ ແລະ
ພວກເຮົາກໍພົບເຫັນວ່າ ມັນບໍ່ແມ່ນເລຶ່ອງງ່າຍໆທີ່ຈະປະຕິບັດໃຫ້ໄດ້ຕາມ
ຄວາມຄາດໝາຍເຫລົ່ານັ້ນ. ແຕ່ວ່າພວກເຮົາກໍມີຄວາມເຕັມໃຈແລະຕັ້ງໃຈ
ພວກເຮົາຮູ້ດີວ່າ ພວກເຮົາມີຄວາມຮັບຜິດຊອບເຫລົ່ານັ້ນ.”
ທ່ານຊູທິນທອນ ກ່າວຕື່ມວ່າ ລັດຖະບານຂອງທ່ານຍັງໄດ້ຮັບເອົາຄໍາແນະນໍາ ຫລາຍກ່ວາ
130 ຂໍ້ ຈາກລາຍງານຂອງຜູ້ຂຽນລາຍງານພິເສດຂອງອົງການສະຫະປະຊາຊາດນັ້ນ. ແຕ່
ພວກນັກວິເຄາະກ່າວວ່າ ບາດກ້າວເຫລົ່ານັ້ນອາດຍັງບໍ່ພຽງພໍ ທີ່ຈະຫັນເຫກະຊວງຕ່າງປະ
ເທດສະຫະລັດອອກຈາກການທີ່ຈະຈັດໃຫ້ໄທ ຕົກຢູ່ໃນລະດັບສາມ ຫລື ເທຍສາມ ຢູ່ໃນ
ລາຍງານກ່ຽວກັບການຄ້າມະນຸດໃນທົ່ວໂລກ ປະຈໍາປີ 2012 ຂອງກະຊວງການຕ່າງປະ
ເທດສະຫະລັດ ຊຶ່ງຄາດວ່າຈະອອກມາໃນເດືອນມິຖຸນາຕໍ່ໜ້ານີ້.