ນາຍົກລັດຖະມົນຕີໄທ ທ່ານນາງຍິ່ງລັກ ຊິນນະວັດກ່າວວ່າ ປະເທດໄທຕ້ອງໄດ້ອົດທົນຕື່ມ
ອີກຢ່າງນ້ອຍນຶ່ງເດືອນ ກ່ອນທີ່ລະດັບນໍ້າທີ່ສູງຂຶ້ນຖ້ວມຈະບົກລົງ.
ໃນຄຳປາໄສປະຈຳສັບປະດາຂອງທ່ານນາງ ໃນວັນເສົາມື້ນີ້ ຜູ້ນຳຂອງໄທເວົ້າວ່າ ລະດັບທີ່
ຖ້ວມ ອາດຈະສູງຂຶ້ນເຖິງນຶ່ງແມັດ. ໃນມື້ວານນີ້ທ່ານນາງໄດ້ຮຽກຮ້ອງໃຫ້ປະຊາຊົນໃນເຂດ
ນະຄອນຫຼວງຂອງໄທຍ້າຍສິ່ງຂອງພວກເຂົາເຈົ້າໄປໄວ້ຢູ່ບ່ອນທີ່ມີດິນສູງ.
ໄພນໍ້າຖ້ວມທີ່ຮ້າຍແຮງສຸດ ໃນຮອບ 50 ປີຢູ່ປະເທດໄທເຮັດໃຫ້ມີຜູ້ເສຍຊີວິດແລ້ວ 356
ຄົນແລະອີກ 110,000 ຄົນຕ້ອງໄດ້ຍົກຍ້າຍໜີຈາກເຮືອນຊານຂອງພວກເຂົາເຈົ້າ.
ຢູ່ໃນບາງເຂດລະດັບນໍ້າໄດ້ສູງຂຶ້ນພຽງຫົວເຂົ່າ ຫຼັງຈາກໄດ້ລົ້ນຄູກັ້ນນໍ້າຕາມຄອງຕ່າງໆເຂົ້າ
ຖ້ວມເຂດຫຼັກ 4 ທາງກໍ້າເໜືອຂອງບາງກອກ.
ປະຊາຊົນຈຳນວນຫຼວງຫຼາຍໃນເຂດບາງກອກ ໄດ້ພາກັນຫຼັ່ງໄປຊື້ອາຫານແລະນໍ້າດື່ມຂະນະ ທີ່ພວກທີ່ຖືກນໍ້າຖ້ວມໃນເຂດກໍ້າເໜືອຂອງນະຄອນຫຼວງໄທໄດ້ພາກັນຫຼົບໜີຈາກເຮືອນຊານ ບ້ານຊ່ອງຂອງພວກເຂົາເຈົ້າ.
