ທາງການໄທກ່າວວ່າ ເສດຖະກິດຂອງປະເທດແມ່ນໄດ້ຫົດຕົວເຂົ້າເລັກນ້ອຍໃນຊ່ວງ 3 ເດືອນທີ່ສິ້ນສຸດລົງໃນທ້າຍເດືອນກັນຍານັ້ນ ເຮັດໃຫ້ເປັນໄຕມາດທີ່ສອງລຽນຕິດ ທີ່ເສດຖະກິດຫົດຕົວເຂົ້າ.
ຜົນຕົວເລກທີ່ຫາກໍອອກມາໃນວັນຈັນມື້ນີ້ ສະແດງໃຫ້ເຫັນວ່າ GDP ຫລືຜົນຜະລິດໂຮມພາຍໃນປະເທດທັງໝົດ ໄດ້ຫລຸດລົງ 0.2% ໃນຊ່ວງ 3 ເດືອນດັ່ງ ກ່າວ ລຸນຫລັງທີ່ໄດ້ຫລຸດລົງ 0.6% ໃນຮອບ 3 ເດືອນກ່ອນນັ້ນ. ການຫົດຕົວເຂົ້າຂອງເສດຖະກິດສອງໄຕມາດລຽນຕິດ ຖືວ່າເປັນການບົ່ງບອກເຖິງສະພາວະ ເສດຖະກິດຕົກຕໍ່າ.
ການຊັກຊ້າລົງນີ້ມີຂຶ້ນ ໃນຂະນະທີ່ປະເທດອື່ນໆໃນຂົງເຂດມີການຈະເຣີນເຕີບໂຕຢ່າງແຂງແຮງ ນຳໜ້າໂດຍສິງກະໂປ ທີ່ທໍານາຍວ່າເສດຖະກິດຂອງຕົນຈະມີການ ຂະຍາຍຕົວຮອດ 15% ປີໃນປີນີ້. ທາງການໄທຖິ້ມໂທດການຫົດຖອຍຂອງເສດຖະກິດ ໃສ່ການສົ່ງອອກທີ່ອ່ອນຕົວລົງ ແລະເງິນບາດແຂງຄ່າຂຶ້ນນັ້ນ.
ແຕ່ເຖິງຢ່າງນັ້ນກໍຕາມ, ພວກນັກວິເຄາະໃຫ້ຂໍ້ສັງເກດວ່າ ເສດຖະກິດຂອງໄທຍັງແຂງ
ແຮງກວ່າປີທີ່ຜ່ານມາ. GDP ສໍາລັບຊ່ວງເດືອນກໍລະກົດເຖິງເດືອນກັນຍານັ້ນ ແມ່ນ 6.7% ສູງກວ່າຊ່ວງດຽວກັນໃນປີທີ່ແລ້ວ.
