ໄທແລະກໍາປູເຈຍໄດ້ຕົກລົງກັນ ທີ່ຈະຮຽກກອງປະຊຸມຄະນະກໍາມະການນຶ່ງຂຶ້ນເພື່ອ
ໂອ້ລົມສົນທະນາກັນເລື້ອງບັນຫາຊາຍແດນ ທີ່ໄດ້ສ້າງຄວາມບາດໝາງລະຫວ່າງສອງ
ປະເທດນັ້ນ ຊຶ່ງມີທ່າທາງວ່າກອງປະຊຸມທີ່ວ່ານີ້ ຈະມີຂຶ້ນກ່ອນທ້າຍເດືອນນີ້ກໍເປັນໄດ້.
ລັດຖະມົນຕີກະຊວງປ້ອງກັນປະເທດໄທ ທ່ານຢຸດທະສັກ ສະສິປຣະພາ ກ່າວໃນວັນ
ພະຫັດມື້ນີ້ວ່າ ຄູ່ຕໍາແໜ່ງຂອງທ່ານຈາກກໍາປູເຈຍໄດ້ໂທລະສັບມາຫາທ່ານກ່ອນໜ້ານີ້
ຂໍຮ້ອງໃຫ້ຮຽກກອງປະຊຸມຂອງຄະ ນະກໍາມະການຊາຍແດນທົ່ວໄປຂຶ້ນ ຊຶ່ງທ່ານກ່າວ
ວ່າ ການພົບປະກັນນີ້ສາມາດມີຂຶ້ນໄດ້ ໃນທັນທີທີ່ລັດຖະບານໃໝ່ຂອງໄທໄດ້ນໍາສະເໜີ
ຖະແຫລງການດ້ານນະໂຍບາຍຂອງຕົນຕໍ່ສະພາແຫ່ງຊາດ ຊຶ່ງກໍານົດຈະມີຂຶ້ນພາຍໃນ
15 ມື້ຕໍ່ໜ້ານີ້.
ທີ່ນະຄອນຫລວງພະນົມເປັນ ນາຍົກລັດຖະມົນຕີຮຸນແຊນ ກ່າວວ່າ ພວກໄກ່ເກ່ຍຈາກ
ອິນໂດເນເຊຍ ຈະຕ້ອງມີໜ້າໃນການເຈລະຈາກ່ຽວກັບເຂດຊາຍແດນ 17 ຫລັກກິໂລ
ແມັດມົນທົນ ທີ່ເປັນບັນຫາໂຕ້ແຍ້ງກັນໃນເຂດອ້ອມແອ້ມເຂົາພຣະວິຫານນັ້ນ ແຕ່ວ່າທັງ
ສອງປະເທດສາມາດທໍາການໂອ້ລົມກັນເລື້ອງບັນຫາອື່ນໆໃນລະຫວ່າງກັນເອງໄດ້.
ບັນດານັກການທູດໄດ້ກ່າວເຊ່ນກັນ ເຖິງຊ່ອງທາງໃນການພົບປະສຸດຍອດກັນໃນເວລາ
ອັນໄວໆນີ້ ລະຫວ່າງທ່ານຮຸນແຊນກັບທ່ານນາງຢິ່ງລັກ ຊິນນະວັດ ນາຍົກລັດຖະມົນຕີ
ໃໝ່ຂອງໄທນັ້ນ.
