ພວກປະທ້ວງເສື້ອເຫລືອງຈໍານວນຫລາຍຮ້ອຍຄົນໄດ້ນໍາ ພາການໂຮມຊຸມນຸມຢ່າງສັນຕິໃນວັນເສົາວານນີ້ ໃນນະ ຄອນຫລວງຂອງໄທ ເພື່ອປະທ້ວງນະໂຍບາຍຂອງລັດຖະ ບານກ່ຽວກັບບັນຫາຂັດແຍ່ງເລື້ອງທີ່ດິນກັບປະເທດເພື່ອນບ້ານ ກໍາປູເຈຍ ນັ້ນ.
ກຸ່ມເຄືອຂ່າຍຜູ້ຮັກຊາດໄທ ໄດ້ພາກັນໄປໂຮມຊຸມນຸມປະທ້ວງຢູ່ທາງນອກບໍລິເວນທໍານຽບລັດຖະບານໃນບາງກອກ ໂດຍທ້າທາຍຕໍ່ຂໍ້ຫ້າມໂຮມຊຸມນຸມຂອງລັດຖະບານ ທີ່ໄດ້ວາງໄວ້ເພື່ອຮື້ຟື້ນຄວາມເປັນລະບຽບຮຽບຮ້ອຍຄືນມາໃນເມືອງຫລວງ ທີ່ໄດ້ຕົກຢູ່ໃນສະພາວະເປັນເປ້ຍລ່ອຍເປັນເວລາຫລາຍສັບປະດາ ຍ້ອນການປະທ້ວງຕໍ່ຕ້ານລັດຖະ ບານຢ່າງຂະໜານໃຫຍ່ ເມື່ອຫລາຍເດືອນຜ່ານມານັ້ນ.
ແຕ່ພວກໂຣມຊຸມນຸມໃນວັນເສົາວານນີ້ ໄດ້ຕົກລົງຍ້າຍການປະທ້ວງຂອງພວກເຂົາເຈົ້າ ໄປ ຍັງສະໜາມກິລາຕາມຄໍາຮຽກຮ້ອງຂອງນາຍົກລັດຖະມຸນຕີ ອະພິສິດ ເວດຊາຊີວະ. ພວກປະທ້ວງເສື້ອເຫລືອງໄດ້ມີສ່ວນຊ່ອຍນໍາເອົານາຍົກລັດຖະມຸນຕີອະພິສິດ ຂຶ້ນມາກໍາອໍານາດ ແຕ່ເຂົາເຈົ້າກ່າວວ່າ ລັດຖະບານຂອງທ່ານໄດ້ເອົາທ່າທີອ່ອນແອໂພດໃນການຮັບມືກັບການກ່າວອ້າງເອົາກໍາມະສິດດິນແດນຂອງກໍາປູເຈຍນັ້ນ.
ດິນແດນທີ່ເປັນບັນຫາຂັດແຍ້ງກັນຢູ່ນີ້ ແມ່ນດິນທີ່ຕັ້ງຢູ່ຂ້າງວັດເຂົາພະວິຫານຂອງສາສະ ໜາຮີນດູໃນສະໄໝສັດຕະວັດທີ 11 ທີ່ຕັ້ງຢູ່ໃນເຂດ ຊາຍແດນໄທກັບກໍາປູເຈຍນັ້ນ. ອົງ ການ UNESCO ໄດ້ປະກາດໃຫ້ພຣະວິຫານແຫ່ງນີ້ເປັນມູນມໍລະດົກໂລກ ພາຍໃຕ້ການຄວບຄຸມຂອງກໍາປູເຈຍໃນປີ 2008 ແຕ່ທາງເຂົ້າໄປຫາບໍລິເວນພຣະວິຫານດັ່ງກ່າວ ແມ່ນຢູ່ທາງຊາຍແດນໄທ.