ກໍາປູເຈຍກ່າວວ່າ ຕົນຈະພາທູດທະຫານຕ່າງປະເທດກຸ່ມ
ນຶ່ງ ໄປເບິ່ງເຂດທີ່ເປັນຈຸດຂັດແຍ້ງກັນກັບປະເທດໄທ ຢູ່
ອ້ອມແອ້ມວັດເຂົາພະວິຫານນັ້ນ ຊຶ່ງການກະທໍາດັ່ງກ່າວ
ນີ້ ຈະເປັນການສ່ຽງຕໍ່ການສ້າງຄວາມຂັດແຍ່ງກັນຂຶ້ນອີກ ເທື່ອໃໝ່ ກັບຝ່າຍໄທນັ້ນ.
ໂຄສົກທ່ານນຶ່ງຂອງກະຊວງປ້ອງກັນຊາດຂອງກໍາປູເຈຍ
ກ່າວໃນວັນພຸດມື້ນີ້ວ່າ ເຈົ້າໜ້າທີ່ກໍາປູເຈຍ ຈະພາຄະນະ
ທູດທະຫານຈາກ 10 ປະເທດ ໄປເບິ່ງຄວາມເສຍຫາຍທີ່
ເກີດຈາກການຕໍ່ສູ້ກັນເມື່ອບໍ່ນານມານີ້ ຢູ່ໃກ້ໆກັບວັດຮິນ
ດູ ອາຍຸ 900 ປີດັ່ງກ່າວ ໃນວັນພະຫັດມື້ອື່ນນີ້.
ຢ່າງໃດກໍຕາມ ເຈົ້າໜ້າທີ່ໄທທ່ານນຶ່ງໄດ້ບອກກັບໜັງສືພິມ
Bangkok Post ວ່າ ໄທຂັດຄ້ານຕໍ່ການຢ້ຽມຢາມດັ່ງ
ກ່າວ ແລະກໍໄດ້ສັ່ງໃຫ້ທະຫານຂອງຕົນ ທີ່ປະຈໍາການຢູ່
ໃນບໍລິເວນນັ້ນ ຢູ່ໃນທ່າກຽມພ້ອມແລະມີສະຕິລະວັງໂຕ
ສູງ. ເຈົ້າໜ້າທີ່ທ່ານນີ້ ຊຶ່ງໜັງສືພິມບໍ່ໄດ້ບອກຊື່ນັ້ນ ເວົ້າວ່າ ລັດຖະບານໄທບໍ່ຂັດຂ້ອງທີ່
ພວກທູດທະຫານຈະໄປເບິ່ງວັດເຂົາພະວິຫານ ແຕ່ບໍ່ຢາກໃຫ້ພວກເຂົາເຈົ້າເຂົ້າໄປໃນເຂດ
ທີ່ຢູ່ຕິດກັນ ເນື້ອທີ່ກວ້າງ 4.6 ຕາລາງກິໂລແມັດ ທີ່ໄທອ້າງວ່າເປັນດິນຂອງຕົນນັ້ນ.
ໃນເດືອນແລ້ວນີ້ ໄທກໍໄດ້ພາທູດທະຫານກຸ່ມນຶ່ງຈາກ 14 ປະເທດ ໄປເບິ່ງບໍລິເວນທີ່ໄດ້
ຮັບຜົນກະທົບຈາກການສູ້ລົບກັນນັ້ນ ແຕ່ບໍ່ໄດ້ພາເຂົາເຈົ້າເຂົ້າໄປໃນເຂດທີ່ເປັນຫົວຂໍ້ຜິດ
ຖຽງກັນ ຕາມທີ່ເຈົ້າໜ້າທີ່ທະຫານໄທຄົນດັ່ງກ່າວໄດ້ບອກກັບໜັງສືພິມ Bangkok
Post.
ທັງສອງປະເທດໄດ້ຕົກລົງໃຫ້ນັກສັງເກດການທະຫານຈາກອິນໂດເນເຊຍ 30 ຄົນໄປ
ປະຈໍາການຢູ່ໃນເຂດນັ້ນເພື່ອຊ່ວຍປ້ອງກັນບໍ່ໃຫ້ເກີດການຕໍ່ສູ້ກັນຄັ້ງໃໝ່ ແຕ່ພວກນັກ
ສັງເກດການຍັງບໍ່ໄດ້ເດີນທາງໄປຮອດເທື່ອ.
