ນາຍົກລັດຖະມົນຕີໄທທ່ານອະພິຊິດ ເວດຊາຊີວະກ່າວວ່າ ພວກຜູ້ນຳຂອງມຽນມາ
ໄດ້ປະຕິເສດຕໍ່ການສະເໜີທີ່ຈະໃຫ້ຄວາມຊ່ອຍເຫຼືອຂອງທ່ານ ກ່ຽວກັບການເລືອກຕັ້ງ
ຂອງມຽນມາໃນ ວັນທີ 7 ພະຈິກ ເດືອນໜ້ານີ້.
ທ່ານອະພິຊິດ ກ່າວຕໍ່ພວກນັກຂ່າວທີ່ບາງກອກ ໃນວັນອັງຄານມື້ນີ້ວ່າ ທ່ານໄດ້ສະເໜີໃນ ລະຫວ່າງການເດີນທາງໄປຢ້ຽມຢາມມຽນມາເປັນເວລານຶ່ງມື້ ໃນວັນຈັນວານນີ້. ທ່ານເວົ້າວ່າ ທາງມຽນມາໄດ້ແຈ້ງໃຫ້ທ່ານຊາບວ່າ ພວກເຂົາເຈົ້າຮູ້ດີ ເຖິງຄວາມວິຕົກກັງວົນຂອງນາໆ ຊາດກ່ຽວກັບການເລືອກຕັ້ງ ໃນຄັ້ງນີ້ ແຕ່ບໍ່ຕ້ອງການການຊ່ອຍເຫຼືອໃດໆ ຈາກພາຍນອກ.
ທ່ານອະພິຊິດ ທີ່ໄດ້ພົບປະກັບນາຍພົນອະວຸໂສ Than Shwe ແລະນາຍົກລັດຖະມົນຕີ Thein Sein ໃນມື້ວານນີ້ ກ່າວວ່າ ທ່ານໄດ້ບັນລຸຂໍ້ຕົກລົງ ໃຫ້ປະເທດທັງສອງທຳການ ພັດທະນາຮ່ວມກັນທ່າເຮືອນໍ້າເລິກ Dawei ທີ່ຕັ້ງຢູ່ແຄມຝັ່ງທະເລອັນດາມັນນັ້ນ. ທ່ານເວົ້າ ວ່າ ການສົນທະນາຫາລືຍັງໄດ້ກວມເຖິງເລື່ອງການພັດທະນາໃນເຂດຊາຍແດນ ເລື່ອງການ ຄ້າ ແລະການລົງທຶນສອງຝ່າຍ ຕະຫຼອດທັງຖານະຂອງພວກຄົນງານມຽນມາ ທີ່ເຮັດວຽກຢູ່ ໃນປະເທດໄທ.
