ຕໍາຫລວດເກັບກູ້ລະເບີດ 2 ຄົນເສຍຊີວິດທີ່ໄທໃນວັນເສົາ
ວານນີ້ ເວລາວັດຖຸລະເບີດລູກນຶ່ງທີ່ພວກເຂົາເຈົ້າພະຍາ
ຍາມປົດກະນວນ ລະເບີດຂຶ້ນໂດຍຄົນຮ້າຍທີ່ໃຊ້ໂທລະສັບ ມືຖື.
ທາງການໄທກ່າວວ່າ ມີປະຊາຊົນຢ່າງນ້ອຍ 8 ຄົນ ທີ່ຮວມທັງຕໍາຫລວດອີກ 4 ຄົນໄດ້ຮັບບາດເຈັບ ໃນເຫດ ລະເບີດດັ່ງກ່າວທີ່ຕະຫລາດກາງແຈ້ງແຫ່ງນຶ່ງໃນຈັງຫວັດ ນາຣາທິວາດ ທາງພາກໃຕ້ຂອງໄທ ທີ່ໄດ້ປະສົບກັບ ຄວາມຮຸນແຮງນັ້ນ.
ຕໍາຫລວດກ່າວວ່າເຈົ້າຂອງແຜງລອຍຂາຍຜັກແຫ່ງນຶ່ງໄດ້ແຈ້ງໃຫ້ເຈົ້າໜ້າທີ່ ຊາບກ່ຽວກັບລົດຈັກຄັນນຶ່ງທີ່ໜ້າສົງໄສ ທີ່ເດັກໄວລຸ່ນ 2 ຄົນຈອດໄວ້ ໃກ້ໆກັບແຜງລອຍຂອງລາວ. ຕໍາຫລວດໄດ້ບອກພວກຜູ້ຄົນສ່ວນໃຫຍ່ ໃຫ້ອອກຈາກບໍລິເວນດັ່ງກ່າວ ແຕ່ລະເບີດລູກນຶ່ງທີ່ເຊື່ອງໄວ້ນໍາລົດຈັກຄັນນັ້ນ ໄດ້ແຕກຂຶ້ນໃນຂະນະທີ່ ຕໍາຫລວດພະຍາຍາມປົດກະນວນລະເບີດຢູ່.
ບັນດາເຈົ້າໜ້າທີ່ກ່າວວ່າ ພວກກະບົດມຸສລິມໄດ້ຂົ່ມຂູ່ມາກ່ອນ ວ່າຈະກໍ່ຄວາມຮຸນແຮງຂຶ້ນໃນວັນປີໃໝ່ ໃນຖານະເປັນພາກສ່ວນນຶ່ງໃນການປຸກລະດົມຕໍ່ຕ້ານທາງການໄທ ມາເປັນເວລາຫລາຍປີຂອງພວກເຂົານັ້ນ.
ເຂດພາກໃຕ້ຂອງໄທຊຶ່ງປະຊາຊົນສ່ວນໃຫຍ່ເປັນຊາວມຸສລິມ ໄດ້ເປັນເຂດທີ່ ປະສົບກັບຄວາມວຸ້ນວາຍມາໂດຍຕະຫລອດນັບແຕ່ຕົ້ນປີ 2004 ມາ ເວລາພວກຊາວມຸສລິມຫົວຮຸນແຮງໄດ້ບຸກເຂົ້າໄປໃນສາງເກັບອາວຸດແຫ່ງນຶ່ງ ແລະຂະໂມຍ ເອົາປືນເລັກຍາວໄປ 300 ກະບອກ. ປະຊາຊົນ ຫລາຍກວ່າ 4 ພັນຄົນໄດ້ເສຍຊີວິດໄປນັບແຕ່ເວລານັ້ນມາ ທີ່ມີຮວມທັງຊາວມຸສລິມແລະຊາວພຸດ.
