ພວກເຈົ້າໜ້າທີ່ໄທກ່າວວ່າ ຊາວອິຣ່ານສາມຄົນທີ່ຖືກຈັບກຸມໃນຂໍ້ຫາມີສ່ວນພົວພົນກັບ
ເຫດລະເບີດ ທີ່ນະຄອນຫຼວງບາງກອກໃນຕົ້ນອາທິດນີ້ ເປັນສ່ວນນຶ່ງຂອງແຜນການ
ລອບສັງຫານທີ່ແນໃສ່ພວກນັກການທູດອີສຣາແອລ.
ຜູ້ຕ້ອງສົງໄສຄົນທີ່ສາມໄດ້ຖືກຈັບກຸມເມື່ອວັນພຸດວານນີ້ ທີ່ສະໜາມບິນ ນານາຊາດກົວ
ລາລໍາເປີ ປະເທດມາເລເຊຍ. ຊາຍຊາວອິຣ່ານອີກສອງຄົນຖືກຈັບກຸມໃນທັນທີ ຫຼັງຈາກ
ລະເບີດແຕກຂຶ້ນຫລາຍບັ້ນ ຂອງວັນອັງຄານຜ່ານມາໃນນະຄອນຫຼວງບາງກອກຂອງໄທ
ທີ່ຍັງຜົນໃຫ້ພົນລະເຮືອນບາດເຈັບສີ່ຄົນ.
ຜູ້ບັນຊາການຕໍາຫຼວດໄທ ທ່ານ ປຣີວພັນ ທະມະພົນ ກ່າວໃນລະຫວ່າງໃຫ້ສໍາພາດ
ທາງໂທລະພາບເມື່ອວັນພຸດວານນີ້ກ່ຽວກັບດິນລະເບີດທີ່ໃຊ້ໃນການໂຈມຕີຢູ່ບາງກອກ
ນັ້ນ ແມ່ນຄ້າຍຄືກັບພວກດິນລະເບີດທີ່ໃຊ້ໃນການໂຈມຕີດ້ວຍລົດລະເບີດ ທີ່ແນເປົ້າ
ໝາຍໃສ່ພວກນັກການທູດໃນອິນເດຍ ແລະໃນປະເທດ Georgia.
ຜູ້ບັນຊາການຕໍາຫຼວດ ປຣີວພັນ ກ່າວໃນຕອນນຶ່ງວ່າ “ດັ່ງທີ່ຂ້າພະເຈົ້າໄດ້ເວົ້າກ່ອນນັ້ນ
ວ່າເປົ້າໝາຍຂອງເຂົາເຈົ້າກໍຄືແນໃສ່ນັກການທູດອິສຣາແອລ ຊຶ່ງບໍ່ໄດ້ແນໃສ່ ຫລືກ່ຽວກັບ
ພວກຄົນໄທແຕ່ຢ່າງໃດ”
ສີ່ຄົນໄດ້ຮັບບາດເຈັບໃນການໂຈມຕີທີ່ນະຄອນຫຼວງນີວເດລີຂອງອິນເດຍ ໃນຂະນະທີ່
ລົດບັນທຸກລະເບີດທີ່ນະຄອນຫຼວງ Tbilisi ປະເທດຈໍເຈຍຖືກປົດຂະນວນໄວ້ໄດ້.
