ພວກເສື້ອແດງຕໍ່ຕ້ານລັດຖະບານ ໄດ້ພາກັນທ້າທາຍຕໍ່ກົດພາວະສຸກເສີນທີ່ລັດຖະບານຍັງປະກາດໃຊ້ຢູ່ໃນປັດຈຸບັນແລະໄປໂຮມຊຸມນຸມກັນທີ່ບາງກອກ ໃນວັນອາທິດມື້ນີ້ ເພື່ອເປັນຂີດໝາຍຄົບຮອບ 4 ປີນັບແຕ່ທະຫານໄດ້ກໍ່ລັດຖະປະ ຫານໂຄ່ນລົ້ມທ່ານທັກສິນ ຊິນນະວັດ ອອກຈາກຕໍາແໜ່ງ ນາຍົກລັດຖະມຸນຕີ ແລະເພື່ອລະນຶກເຖິງດວງວິນຍານຂອງ ສະມາຊິກຂອງພວກເສື້ອແດງ ຫລື ນປຊ ທີ່ໄດ້ເສຍຊີວິດ ໄປໃນການປາບປາມຂອງລັດຖະບານ ໃນເດືອນພຶດສະພາ ຜ່ານມານັ້ນ.
ທາງການໄທໄດ້ເອົາມາດຕະການຮັກສາຄວາມປອດໄພຢ່າງຮັດເຄັ່ງໃນຂະນະທີ່ພວກປະທ້ວງຫລາຍພັນຄົນ ພາກັນໄປໂຮມຊຸມນຸມຢ່າງສັນຕິ ໄປຕາມຖະໜົນຫົນທາງສາຍຕ່າງໆໃນເຂດສີ່ແຍກຣາດຊະປຣະສົງ ເຂດການຄ້າຊັ້ນສູງໃນນະຄອນຫລວງ ຊຶ່ງເປັນບ່ອນທີ່ພວກປະທ້ວງໄດ້ຍຶດຄອງເປັນເວລາຫລາຍສັບປະດາ ເມື່ອຕົ້ນປີນັ້ນ.
ພວກ ນປຊ ໄດ້ກໍານົດໄວ້ວ່າຈະຈັດການປະທ້ວງຄັ້ງໃຫຍ່ອີກບັ້ນນຶ່ງ ໃນຕອນແລງມື້ນີ້ທີ່ ນະຄອນຊຽງໃໝ່ໃນພາກເໜືອຂອງປະເທດ ຊຶ່ງເປັນບ້ານເກີດເມືອງນອນຂອງທ່ານທັກສິນ ແລະເປັນນຶ່ງໃນບັນດາທີ່ໝັ້ນດ້ານການເມືອງຂອງທ່ານ.
ເວລານີ້ ບາງກອກຍັງຢູ່ພາຍໃຕ້ພາວະສຸກເສີນຢູ່ ຊຶ່ງອໍານວຍໃຫ້ພວກທະຫານມີອໍານາດຢ່າງກວ້າງຂວາງໃນການທັບມ້າງການໂຮມຊຸມນຸມຕ່າງໆແລະຈັບກຸມຜູ້ຄົນໄດ້.
