ກອງທັບໄທ້ລົບລ້າງແຜນການຫ້ານຜູ້ຄົນສັນຈອນໄປມາໃນຍາມກາງຄືນໃນພາກສ່ວນຕ່າງໆໃນບາງກອກ ບ່ອນທ່ີພວກທະຫານຍັງປະເຊີນ
ໜ້າກັນຢ່າງເຄັ່ງຂຶມກັນກັບພວກຊຸມນຸມປະທ້ວງລັດຖະບານ. ບັນດານາຍທະຫານກ່າວຕໍ່ບັນດານັກຂ່າວໃນວັນອາທິດມື້ນີ້ວ່າ ທາງລັດຖະບານ ບໍ່ເຫັນວ່າມີຄວາມຈຳເປັນອີກແລ້ວທ່ີຈະໃຊ້ມາດຕະການຫ້າມຄົນສັນຈອນໄປມາໃນຍາມກາງຄືນນັ້ນ. ກ່ອນໜ້ານີ້ ທາງກອງທັບກ່າວວ່າ ຕົນຈະ ຫ້າມຜູ້ຄົນສັນຈອນໄປມາຍາມກາງຄືນໃນແລງວັນອາທິດມື້ນີ້ເປັນຕົ້ນໄປ ແຕ່ທາງກອງທັບບໍ່ໄດ້ໃຫ້ຄຳຊີ້ແຈງໃດໆກ່ຽວກັບການຕ່າວປີ້ນ ແຜນການດັ່ງກ່າວນີ້.
ໃນຂະນະດຽວກັນ ບັນດາເຈົ້າໜ້າທ່ີປະກາດໃຫ້ຮູ້ໃນວັນອາທິດມື້ນີ້ວ່າພວກໂຮງຮຽນແຫ່ງຕ່າງໆໃນບາງກອກຈະບໍ່ໄຂຄືນໃນວັນຈັນມື້ອື່ນ ຫລັງຈາກພັກລະດູຮ້ອນ ຍ້ອນການປະທະກັນຕ່າງໆທີອັນຕະລາຍເຖິງຕາຍ ຊຶ່ງໄດ້ເຮັດໃຫ້ຜູ້ຄົນເສຍຊີວິດໄປຢ່າງນ້ອຍ 25 ຄົນແລ້ວນັ້ນ. ທາງການກ່າວວ່າ ພວກໂຮງຮຽນເຫລົ່ານີ້ຈະເປີດຮຽນຄືນ ໃນວັນທີ 24 ພຶດສະພານີ້.
ນາຍົກລັດຖະມຸນຕີ ອະພິສິດ ເວດຊາຊີວະ ກ່າວຖ້ອຍຖະແຫລງທາງໂທລະພາບຕໍ່ປະເທດຊາດໃນຄືນວັນເສົາຜ່ານມານີ້ວ່າ ລັດຖະບານຂອງທ່ານຈະບໍ່ຢຸດເຊົາທຳການປະເຊີນໜ້າກັນກັບພວກຊຸມນຸມປະທ້ວງເສື້ອແດງຕໍ່ຕ້ານລັດຖະບານ ແລະທ່ານກ່າວຕື່ມວ່າ ແຜນການຂອງລັດຖະບານແມ່ນການກັບຄືນໄປສູ່ສະພາບປົກກະຕິ ໃນອັນທ່ີເອີ້ນວ່າ ມີການສ້າງຄວາມເສຍຫາຍນ້ອຍທ່ີສຸດ ແລະໃນເວລາອັນໄວ ເທົ່າທ່ີຈະເປັນໄປໄດ້.
