ມີຜູ້ເສຍຊີວິດ 1 ຄົນ ໃນ ເຫດລະເບີດທີ່ບາງກອກ

ພວກເຈົ້າໜ້າທີ່ສຸກເສີນໃນປະເທດໄທກ່າວວ່າ ລະເບີດ ລູກນຶ່ງທີ່ແຕກຂື້ນ​ໃນ​ວັນ​ອາທິດ​ວານ​ນີ້ ​ໄດ້​ເຮັດໃຫ້ມີຜູ້ ເສຍຊີວິດຄົນນຶ່ງແລະບາດ ເຈັບອີກຢ່າງໜ້ອຍ 10 ຄົນ ທີ່​ບາງກອກ ຫລື​ກຸງ​ເທບ ເມືອງຫລວງຂອງໄທ.

ທາງການໄທກ່າວວ່າ ຜູ້​ຕາຍ​ເປັນຊາຍ ອາຍຸ 51 ປີທີ່ໄດ້​ໄປເສຍຊີວິດຢູ່ໂຮງໝໍ ຍ້ອນບາດ​ແຜ​ທີ່ໄດ້ຮັບຈາກເຫດ ລະເບີດຢູ່ປ້າຍຈອດລົດເມ ກົງຂ້າມກັບ ສູນການຄ້າແຫ່ງ​ນຶ່ງໃນໃຈກາງເມືອງຫລວງ ຊຶ່ງ​ເປັນເຂດດຽວກັນກັບ ພວກທີ່ ເອີ້ນວ່າ ກຸ່ມເສື້ອແດງ ຫລື ນປຊ ຫລາຍພັນຄົນໄດ້​ເຂົ້າຄອບ ​ຄອງ​ເພື່ອ​ ທຳການປະທ້ວງຕໍ່ຕ້ານລັດຖະບານເມື່ອຕົ້ນປີນີ້.

ເຫດລະເບີດເກີດຂື້ນບໍ່ດົນ ຫລັງຈາກການປ່ອນບັດເລືອກຕັ້ງເອົາສະມາຊິກສະພາ​ແຫ່ງ​ຊາດຄັ້ງພິເສດ ໄດ້ປິດລົງ ທີ່ຖືວ່າເປັນການເລືອກຕັ້ງເພື່ອທົດສອບ ຄະ​ແນນນິຍົມຂອງ ລັດຖະບານ. ການປ່ອນບັດເລືອກຕັ້ງຄັ້ງນີ້ ເປັນ​ການ​ແຂ່ງຂັນ​ກັນລະຫວ່າງຜູ້ສະໝັກ ເລືອກຕັ້ງຈາກພັກປະຊາທິປັດຂອງນາຍົກລັດຖະມົນຕີອະພິສິດ ​ເວດ​ຊາ​ຊີວະ ກັບນາຍ ກໍ່ແກ້ວ ພິກຸນທອງ ຜູ້ສະໝັກເລືອກຕັ້ງຈາກພັກເພື່ອໄທທີ່​ເປັນ​ແກນນຳກຸ່ມເສື້ອແດງ ທີ່ຍັງຖືກຈຳຄຸກ ມາຕະຫລອດ​ໄລຍະເວລາໂຄສະນາຫາສຽງ.

ທາງການຕຳຫລວດໄທບໍ່ໄດ້ເວົ້າວ່າ ເຫດລະເບີດທີ່ປ້າຍຈອດລົດເມດັ່ງກ່າວນັ້ນ ​ແມ່ນ ກ່ຽວພັນກັບການ ກໍ່ຄວາມບໍ່ສະຫງົບດ້ານການເມືອງໃນໄທ ຫລືບໍ່.

ການຕໍ່ສູ້ກັນລະຫວ່າງກຳລັງຮັກສາຄວາມປອດໄພຂອງໄທ ແລະພວກ ກຸ່ມ ນປຊ ຍັງຜົນ ໃຫ້ມີຜູ້ເສຍຊີວິດ 90 ຄົນແລະບາດເຈັບອີກປະມານ 1,900 ຄົນ ໃນລະຫວ່າງການຍືດຄອງ ເຂດ​ໃຈກາງເມືອງບາງກອກ ເປັນເວລາ 10 ອາທິດຂອງພວກປະທ້ວງນັ້ນ. ກຳລັງທະຫານໄດ້​ເຂົ້າທັບ​ມ້າງຄ້າຍປະທ້ວງ ຂອງພວກກຸ່ມ ເສື້ອແດງ ເມື່ອວັນ ທີ່ 19 ເດືອນພຶດສະພາຜ່ານມາ.