ບັນດາເຈົ້າໜ້າທີ່ໄທກ່າວວ່າ ຈໍານວນຜູ້ເສຍຊີວິດຈາກໄພນໍ້າຖ້ວມຄັ້ງຮ້າຍແຮງທີ່ສຸດ
ໃນຮອບ 50 ປິຜ່ານມາ ໄດ້ເພີ່ມຂຶ້ນ ເປັນຫລາຍກວ່າ 500 ຄົນແລ້ວ.
ທາງການໄທກ່າວວ່າ ນໍ້າຖ້ວມກໍາລັງຄຸກຄາມທີ່ຈະໄຫລເຂົ້າໄປເຂດການຄ້າກາງແຈ້ງ
ໃຫຍ່ທີ່ສຸດໃນບາງກອກ ກໍຄື ຕະຫຼາດຈະຕຸຈັກທີ່ມີຊື່ສຽງນັ້ນ.
ອົງການຂ່າວ AP ລາຍງານໃຫ້ຊາບວ່າ ນໍ້າໄດ້ຖ້ວມຖະໜົນສາຍນຶ່ງທີ່ມີ 2 ເລນ ຢູ່
ກ້ອງສະຖານນີລົດໄຟລອຍຟ້າ ໝໍຊິດ ໃນບາງກອກຊຶ່ງເປັນນຶ່ງໃນບັນດາຊານສາລາ
ຂຶ້ນລົງລົດໄຟທີ່ສູງໃນບາງກອກ.
ນາຍົກລັດຖະມົນຕີໄທໄດ້ກ່າວໃຫ້ຄວາມໝັ້ນໃຈຕໍ່ປະຊາຊົນໃນບາງກອກໃນວັນເສົາ
ວານນີ້ວ່າ ນໍ້າຖ້ວມໃນໃຈກາງນະຄອນຫລວງບາງກອກນັ້ນຈະບໍ່ຮ້າຍແຮງແລະຈະເປັນ
ເວລາສັ້ນໆ.
ໃນການກ່າວປາໄສທາງວິທະຍຸປະຈໍາສັບປະດາຂອງທ່ານນາງ ນາຍົກລັດຖະມົນຕີ
ຍິ່ງລັກ ຊິນນະວັດ ກ່າວວ່າ ຄູກັນນ້ຳທີ່ໃຊ້ຖົງຂີ້ຊາຍກອງກັນຂຶ້ນຢ່າງໃຫຍ່ນັ້ນໄດ້ສໍາເລັດ
ໄປແລ້ວ ແລະລະບົບຊົນລະປະທານຈະຮັກສາສູນກາງເສດຖະກິດແລະການເມືອງຂອງ
ບາງກອກນັ້ນ ສ່ວນຫລາຍໃນຂ້ອນຂ້າງແຫ້ງ.
ນໍ້າຖ້ວມໃນໄທໄດ້ສົ່ງຜົນກະທົບຕໍ່ປະຊາຊົນຈໍານວນຫລາຍກວ່າ 3 ລ້ານຄອບຄົວ
ເຮືອນໃນທົ່ວ 3 ສ່ວນ 4 ຂອງຈໍານວນຈັງຫວັດທັງໝົດຂອງໄທ. ຄວາມເສັຍຫາຍດ້ານ
ການເງິນກະປະມານກັນແລ້ວວ່າ ເປັນມູນຄ່າເປັນຫລາຍຕື້ໂດລາ. ມາຮອດປັດຈຸບັນນີ້
ນໍ້າໄດ້ຖ້ວມພວກໂຮງຈັກໂຮງງານຈໍານວນເກືອບ 10 ພັນແຫ່ງແລ້ວ ທີ່ຍັງຜົນໃຫ້ເສຍ
ໜ້າວຽກໄປ 660 ພັນໜ້າວຽກ.
ເຖິງແມ່ນມີຄວາມເສຍຫາຍເຊ່ນນີ້ກໍຕາມ ທ່ານ ປຣະສານ Trulratvorakul ຜູ້ອໍານວຍ
ການທະນາຄານແຫ່ງຊາດໄທກ່າວວ່າ ການຮື້ຟື້ນເສດຖະກິດເປັນໄປໄດ້ຖ້າຫາກນໍ້າລົດ
ລົງພາຍໃນຕົ້ນເດືອນທັນວາໜ້ານີ້ແລະການໃຊ້ຈ່າຍພາຍໃນປະເທດຟື້ນໂຕຄືນ.
