ອະດີດນາຍົກລັດຖະມົນຕີໄທ ທ່ານທັກສິນຊິນນະວັດກ່າວ
ວ່າທ່ານຢາກກັບຄືນປະເທດໄທຖ້ານ້ອງສາວຂອງທ່ານຊະ
ນະການເລືອກຕັ້ງໃນຕົ້ນເດືອນກໍລະກົດປີນີ້ແຕ່ວ່າທ່ານຍັງ
ບໍ່ທັນໄດ້ຕັດສິນໃຈເທື່ອວ່າທ່ານຈະຢູ່ໃນໄທຕໍ່ໄປຫລືບໍ.
ໃນການໃຫ້ສໍາພາດຕໍ່ວິທະຍຸອອສເຕຣເລຍ ທີ່ບ້ານພັກທີ່
ຫລູຫລາຂອງທ່ານທີ່ປະເທດ Dubai ທ່ານທັກສິນກ່າວ
ວ່າ ທ່ານບໍ່ມີຄວາມທະເຍີທະຍານໃດໆທີ່ຈະກັບຄືນໄປມີ
ອໍານາດທາງດ້ານການເມືອງ ແລະເຫັນວ່າມັນສະດວກດີ
ທີ່ຈະດໍາເນີນທຸລະກິດ ລະຫວ່າງຊາດຂອງທ່ານ ຈາກປະ
ເທດໃນເຂດອ່າວເປີເຊຍແຫ່ງນີ້.
ແຕ່ທ່ານທັກສິນກ່າວຕື່ມວ່າ ທ່ານຢາກຈະກັບຄືນໄປໄທ
ໃນທ້າຍປີນີ້ເພື່ອສະແດງຄວາມເຄົາລົບນັບຖືຕໍ່ກະສັດ
ໃນວັນຄ້າຍວັນປະສູດຄົບຮອບ 84 ພັນສາຂອງພະອົງ
ແລະກ່າວຕໍ່ໄປວ່າ ຖ້າສະພາບການຫາກອໍານວຍໃຫ້
ທ່ານຢູ່ໃນໄທຕໍ່ໄປໄດ້ ທ່ານຈະໄປໃຫ້ປາຖະກະຖາ
ຫລິ້ນກອຟ ແລະໃຫ້ຄໍາແນະນໍາແກ່ພວກລູກໆ ຂອງທ່ານ.
ທ່ານທັກສິນ ທີ່ປະເຊີນໜ້າກັບການລົງໂທດຈໍາຄຸກເປັນເວລາ 2 ປີ ໃນຂໍ້ຫາຖານທໍາການ
ສໍ້ລາດບັງຫລວງຖ້າທ່ານເດີນທາງກັບຄືນໄທນັ້ນ ຍັງກ່າວຕື່ມວ່າ ທ່ານຈະຍິນດີຮັບເອົາ
ການນິລະໂທດກໍາຈາກລັດຖະບານຊຸດຕໍ່ໄປ ແຕ່ວ່າ ສິ່ງສໍາຄັນກວ່ານັ້ນແມ່ນຟື້ນຟູຄວາມ
ສາມັກຄີພາຍໃນປະເທດຄືນໃໝ່.
