ໃນວັນເສົາວານນີ້ ຕຳຫລວດ ໄທ ໄດ້ຈັບກຸມຜູ້ຕ້ອງສົງໄສທີ່ເຊື່ອມໂຍງກັບການກໍ່ເຫດລະເບີດໃນຕົ້ນເດືອນນີ້ ທີ່ໄດ້ເຮັດໃຫ້ມີຄົນເສຍຊີວິດ 20 ຄົນນັ້ນ.
ເຈົ້າໜ້າທີ່ໄດ້ບອກພວກນັກຂ່າວວ່າ ຜູ້ຊາຍດັ່ງກ່າວ, ຖືກບົ່ງວ່າ ເປັນຊາວຕ່າງຊາດ, ໄດ້ຖືກກ່າວຫາວ່າ ມີລະລະເບີດຢູ່ໃນຄອບຄອງ ແລະໄດ້ຖືກ ທະຫານຄຸມໂຕໄວ້.
ນອກນັ້ນ ຕຳຫລວດ ແລະ ທະຫານໄດ້ກ່າວວ່າ ຜູ້ຕ້ອງສົງໃສໄດ້
ຖືກພົບເຫັນພ້ອມດ້ວຍລູກປືນ, ຂະນວນລະເບີດ, ທໍ່ນໍ້າ ແລະ ວັດຖຸລະເບີດອື່ນໆນຳ, ພ້ອມດ້ວຍໜັງສືເດີນທາງຂອງປະເທດ ເທີກີຈຳນວນນຶ່ງ.
ໂທລະພາບ ໄທ ໝົດທຸກຊ່ອງໄດ້ອອກອາກາດເປັນເວລາສັ້ນໆໂດຍລັດຖະບານທະຫານ ໄທ ໃນເວລາ 18 ໂມງຂອງວັນເສົາວານນີ້ກ່ຽວກັບການປະກາດການຈັບກຸມດັ່ງກ່າວ.
ມັນເປັນຄວາມກ້າວໜ້າອັນຍິ່ງໃຫຍ່ຄັ້ງທຳອິດຕັ້ງແຕ່ການລະເບີດໃນວັນທີ 17 ທີ່ຜ່ານມາ ທີ່ສານເຈົ້າເອລະວັນທີ່ມີຊື່ສຽງໃນໃຈກາງ ບາງກອກ ທີ່ເຮັດໃຫ້ມີ 20 ຄົນເສຍຊີວິດເຊິ່ງລວມມີຄົນ ໄທ, ຈີນ, ມາເລເຊຍ, ສິງກະໂປ ຄົນໜຶ່ງ ແລະ ອິນໂດເນເຊຍ ຄົນໜຶ່ງ ແລະ ເຮັດໃຫ້ຊາວຕ່າງຊາດຫລາຍກວ່າ 100 ຄົນໄດ້ຮັບບາດເຈັບເປັນຕົ້ນມາ.
ເຫດການລະເບີດດັ່ງກ່າວເປັນການໂຈມຕີຄັ້ງດຽວທີ່ເຮັດໃຫ້ມີຄວາມເສຍຫາຍຢ່າງກວ້າງ ຂວາງທີ່ຮ້າຍແຮງທີ່ສຸດໃນປະເທດ ໄທ.