ທ່ານນາງ ຍິ່ງລັກ ຊິນນະວັດ ທໍາການຢ້ຽມຢາມມຽນມາເປັນເວລານຶ່ງມື້ ທີ່ແນໃສ່ເພື່ອຍົກລະດັບສາຍພົວພັນທາງການທູດແລະເສດຖະກິດ.
ທ່ານນາງຍິ່ງລັກ ເດີນທາງໄປຮອດນະຄອນຫລວງດ້ານການປົກຄອງເນປີຕໍ ໃນວັນພຸດມື້ນີ້ເພື່ອສົນທະນາຫາລືກັບພວກຜູ້ນໍາຂັ້ນສູງຂອງມຽນມາ. ໜັງສືພິມພາສາອັງກິດ The Nation ຂອງໄທ ເວົ້າວ່າ ປະທານາທິບໍດີມຽນມາ ທ່ານ Thein Sein ໄດ້ຈັດງານລ້ຽງອາຫານຄໍ່າຮັບຮອງນາຍົກລັດຖະມົນຕີໄທ ກ່ອນທ່ານນາງເດີນທາງກັບຄືນປະເທດ.
ນີ້ແມ່ນເປັນການຢ້ຽມຢາມມຽນມາຢ່າງເປັນທາງການຄັ້ງທໍາອິດຂອງທ່ານນາງຍິ່ງລັກ ນັບຕັ້ງແຕ່ເຂົ້າຮັບຕໍາແໜ່ງເມື່ອສອງເດືອນຜ່ານມາ.
ໃນເດືອນແລ້ວນີ້ ທ່ານນາງກໍໄດ້ໄປຢ້ຽມຢາມແບບດຽວກັນນີ້ ທີ່ກໍາປູເຈຍແລະ ສປປ ລາວ ຊຶ່ງຢູ່ທີ່ກໍາປູເຈຍນັ້ນ ທ່ານນາງໄດ້ເລີ່ມຕົ້ນດໍາເນີນຂັ້ນຕອນໃນການປັບປຸງສາຍພົວພັນສອງຝ່າຍທີ່ບາດໝາງລົງຍ້ອນການປະທະກັນໃນເຂດຊາຍແດນຫລາຍບັ້ນລະຫວ່າງທະຫານຂອງສອງປະເທດ ທີ່ເກີດຂຶ້ນກ່ອນທ່ານນາງຍິ່ງລັກ ເຂົ້າຮັບຕໍາແໜ່ງໃນເດືອນສິງຫານັ້ນ.
