ລິ້ງ ສຳຫລັບເຂົ້າຫາ

ສະພາແຫ່ງຊາດຂອງໄທ ໄຂປະຊຸມໃນວັນຈັນມື້ນີ້

  • VOA news

ຜູ້ນໍາພັກເພື່ອໄທ ທານນາງຢງລັກ ຊີນນະວັດ ທີ່ຈະໄດ້ເປັນນາຍົກ ລັດຖະມົນຕີແມ່ຍິງຄົນທໍາອິດຂອງໄທ ເດີນທາງໄປຮອດສະພາ ເພື່ອເຂົ້າຮ່ວມກອງປະຊຸມນັດທໍາອິດຂອງສະພາແຫ່ງຊາດຊຸດໃໝ່ ຂອງໄທ, ວັນຈັນ ທີ 1 ສິງຫາ 2011. (REUTERS/Chaiwat Subprasom)

ສະພາ​ແຫ່ງ​ຊາດ​ຂອງ​ໄທ ​ໄຂ​ກອງ​ປະຊຸມ​ນັດ​ທໍາ​ອິດ​ຂຶ້ນ​ໃນ​ວັນ​ຈັນ​ມື້​ນີ້ ທ່າມກາງ​ຄວາ​ມຫວັງ​ທີ່​ວ່າ​ ທ່ານ​ນາງ​ຢິ່ງລັກ ຜູ້​ທີ່​ຄາດ​ກັນ​ວ່າ​ຈະ​ໄດ້​ເປັນ​ນາຍົກລັດຖະມົນຕີນັ້ນ ຈະ​ສາມາດກູ້​ເອົາ​ສະຖຽນ​ລະ​ພາບ​ກັບ​ຄືນ​ມາສູ່​ປະ​ເທດ​ຊາດ ຫລັງ​ຈາກ​ໄດ້​ປະ​ເຊີນ​ກັບ​ຄວາມ​ປັ່ນ​ປ່ວນ​ທາງ​ການ​ເມື​ອງ ມາ​ເປັນ​ເວລາ 5 ປີ.

ອົງ​ມົງກຸດ​ລາດຊະ​ກຸມມານ ມະຫາ ວະ​ຊີີ​ລາ​ລົງ​ກອນ ຊົງ​ມີ​ກໍານົດ​ຈະ​ສະ​ເດັດໄປ​ເປັນ​ປະທານ ​ໃນ​ພິທີ​ໄຂ​ກອງ​ປະຊຸມ​ໃນ​ຕອນ​ແລງ​ວັນ​ຈັນ​ມື້​ນີ້ ​ແລະ​ຄາດ​ວ່າ​ສະພາຊຸດ​ໃໝ່​ທີ່​ມີ​ສະມາຊິກ 500 ຄົນ​ນັ້ນ ຈະ​ເລືອກ​ເອົາ​ປະທານ​ສະພາໃນ​ວັນ​ອັງຄານ​ມື້​ອື່ນຢ່າງ​ໄວ​ທີ່​ສຸດ. ສ່ວນ​ການ​ຄັດເລືອກ ​ເອົາ​ນາຍົກລັ​ດຖະມົນຕີ​ນັ້ນ ອາດ​ສາມາດ​ມີ​ຂຶ້ນ​ໄດ້​ພາຍ​ໃນ​ທ້າຍ​ອາທິດ​.

ເກືອບ​ເປັນ​ທີ່​ແນ່ນອນ​ແລ້ວ​ວ່າ ທ່ານ​ນາງ​ຢິ່ງລັກ​ຈະ​ໄດ້​ຄອງ​ຕໍາ​ແໜ່​ງ​ດັ່ງ ກ່າວ ຫລັງ​ຈາກ​ທີ່​ທ່ານ​ນາງ​ໄດ້ດຶງ​ເອົາ​ພັກ​ນ້ອຍໆ​ເຂົ້າ​ມາ​ຮ່ວມ​ນໍາ ຊຶ່ງ ເວລາ​ນີ້​ແມ່ນ​ຄອບ​ຄອງ​ບ່ອນ​ນັ່ງລວມກັນ​ເຖິງ 60% ຂອງ​ສະພາ​ແຫ່ງ​ຊາດ. ​ໄຊຊະນະ​ທີ່​ພັກ​ເພື່ອ​ໄທ​ຂອງ​ທ່ານ​ນາງ​ໄດ້​ຮັບ​ຢ່າງ​ຖ້ວມ​ລົ້ນ ​ໃນ​ການ​ເລືອກ​ຕັ້ງ​ເມື່ອ​ວັນ​ທີ 3 ຕົ້ນ​ເດືອນ​ນີ້ ​ໄດ້​ພາ​ໃຫ້​ມີ​ຄວາມ​ຫວັງ​ກັນ​ວ່າ ທ່ານ​ນາງ​ຈະໄດ້​ຮັບການ​ສະ​ໜັບ​ສະໜູນຈາກ​ປະຊາຊົນ ​ຢ່າງ​ຫລວງ ຫລາຍ ສໍາລັບ​ນະ​ໂຍບາຍ​ຕ່າງໆ​ຂອງ​ທ່າ​ນນາງ.

XS
SM
MD
LG