ພັກຝ່າຍຄ້ານໄທ ຈະລວມຫົວຕໍ່ຕ້ານ ການເລືອກຕັ້ງ ​ໃນ​ປີໜ້າ (ວີດີໂອ)

ພັກ​ປະຊາທິປັດ ຊຶ່ງ​ເປັນ​ພັກ​ຝ່າ​ຍຄ້ານ​ໃຫຍ່​ຂອງ​ໄທ ປະກາດ​ວ່າ ​ພວກ​ຕົນ ຈະ​ລວມຫົວ​ຕໍ່ຕ້ານ ຄື​ຂວໍ້ງບາດ ການ​ເລືອກ​ຕັ້ງ​ທົ່ວ​ປະ​ເທດ ທີ່​ມີ​ກໍາໜົດ​ຈະ​ຈັດ​ຂຶ້ນ ​ໃນ​ເດືອນ​ກຸມພາ​ປີໜ້າ​ນີ້.

​ທ່ານ​ ອະພິສິດ ​ເວດ​ຊາ​ຊີວະ ຜູ້​ນໍາ​ພັກ​ປະຊາທິປັດ ​ແລະ​ອະດີດ​ນາຍົກ ລັດຖະມົນຕີ ​ໄດ້​ທໍາ​ການປະກາດ​ດັ່ງກ່າວ ເມື່ອ​ວັນ​ເສົາ​ວານ​ນີ້ ຫຼັງຈາກກອງ​ປະຊຸມ​ ລະດັບ​ຄະນະ​ບໍລິ ຫານ​ຂອງ​ພັກ. ທ່ານ​ອະ​ພິສິດ ​ເວົ້າ​ວ່າ ​ໄດ້​ມີ ການຕັດສິນ​ໃຈ​ດັ່ງກ່າວ ເພື່ອ​ພະຍາຍາມ​ຮັບປະກັນວ່າ ການ​ປະຕິ​ຮູບທາງ​ການ​ເມືອງ ຈະ​ຖືກ​ຈັດ​ຕັ້ງ​ປະຕິບັດ.

ພວກ​ປະ​ທ້ວງ​ຢູ່​ຕາມ​ຖະໜົນ​ຫົນທາງໄດ້​ທວງ​ໃຫ້​ ນາຍົກລັດຖະມົນຕີຮັກສາການ​ຊົ່ວຄາວ
ທ່ານ​ນາງ​ຢິ່ງລັກ ຊິນນະ​ວັດ ລາ​ອອກ ກ່ອນ​ການ​ເລືອກ​ຕັ້ງ​ເມື່ອ​ວັນ​ທີ 2 ກຸມພາ​ປີ ໜ້າ​ນີ້ ​ແລະໃຫ້ໂອນ​ລັດຖະບານ​ໃຫ້​ແກ່​ສະພາ​ປະຊາຊົນ ​ທີ່ແຕ່ງ​ຕັ້ງ​ເອົາ​ນັ້ນ.

ທ່ານ​ນາງ ຢິ່ງລັກ ຊິນນະ​ວັດ ​ໄດ້​ຍຸບສະພາ ​ເມື່ອ​ວັນ​ທີ 9 ທັນວາຜ່ານ​ມາ ​ແລະ​ຮຽກຮ້ອງ​ໃຫ້​ມີ​ການ​ເລືອກ​ຕັ້​ງ​ໃນ​ທັນທີ ​ເພື່ອ​ຜ່ອນເບົາ​ຄວາມ​ເຄັ່ງ​ຕຶງ​ລົງ ​ແຕ່ການ​ປະ​ທ້ວງ​ຕໍ່ຕ້ານ​ທ່ານ​ນາງ​ ກໍຍັງ​ຄົງບໍ່​ລົດ​ລະ​ ​ໂດຍ​ໄດ້​ຮື້​ຟື້ນ​ຄືນອີກ​ໃນ​ວັນ​ສຸກ​ແລະ​ວັນ​ເສົາ​ວານ​ນີ້ ແລະ ພວກ​ປະ​ທ້ວງ​ກໍ​ານົດຈະ​ໂຮມ​ຊຸມນຸມ​ກັນ​ຄັ້ງ​ໃຫຍ່​ອີກ ຢູ່​ໃນ​ເມືອງຫຼວງບາງກອກ ​ໃນ​ວັນ​ອາທິດ​ມື້​ນີ້.