ລັດຖະມົນຕີໄທ ສະເໜີແຜນການຮ່ວມມືກັບທາງການລາວ
ໃນການລົນນະລົງ ແລະການປະຊາສຳພັນ ເພື່ອການສົ່ງເສີມ
ແລະຂະຫຍາຍຕະຫລາດການທ່ອງທ່ຽວ ໃນຕ່າງປະເທດ
ຮ່ວມກັນໃຫ້ກວ້າງຂວາງ ຫຼາຍຂຶ້ນ.
ທ່ານນາງກອບການ ວັດທະນະວະລາງກູນ ລັດຖະມົນຕີວາການ
ກະຊວງທ່ອງທ່ຽວ ແລະກິລາ ໄດ້ໃຫ້ການຢືນຢັນວ່າ ໄດ້ຮ່າງແຜນຄວາມຮ່ວມມື ດ້ານການ
ທ່ອງທ່ຽວກັບປະເທດເພື່ອນບ້ານ ໃນລຸ່ມແມ່ນ້ຳຂອງດ້ວຍກັນ ສຳເລັດສົມບູນແລ້ວ ແລະ
ປັດຈຸບັນກໍກຳລັງຢູ່ໃນລະຫວ່າງການຕຽມສະເໜີ ແຜນຄວາມຮ່ວມມືດັ່ງກ່າວ ຕໍ່ລັດຖະບານ
ຂອງປະເທດເພື່ອນບ້ານ ຢ່າງເປັນທາງການ ພາຍໃນເດືອນມັງກອນ 2015 ຕໍ່ໄປ.
ໂດຍແຜນການດັ່ງກ່າວນີ້ ໃຫ້ຄວາມສຳຄັນເປັນພິເສດໃນການລົນນະລົງ ແລະການປະຊາ
ສຳພັນ ເພື່ອການສົ່ງເສີມ ແລະຂະຫຍາຍຕະຫລາດ ການທ່ອງທ່ຽວ ໃນຕ່າງປະເທດ ຮ່ວມກັບປະເທດເພື່ອນບ້ານ ໃນເຂດລຸ່ມແມ່ນ້ຳຂອງດ້ວຍກັນ ໃຫ້ກວ້າງຂວາງຫຼາຍຂຶ້ນ ລວມເຖິງການນຳໃຊ້ລະບົບ Single Visa ຫຼື ວີຊາດຽວ ແລະຈັດກິດຈະກຳການທ່ອງທ່ຽວຮ່ວມກັນ
ດ້ວຍ ທັງນີ້ ໂດຍ ສປປ ລາວຈະເປັນປະເທດທຳອິດ ທີ່ທາງການໄທຈະນຳສະເໜີ ແຜນການ ຮ່ວມມືດັ່ງກ່າວນີ້ ດັ່ງທີ່ທ່ານນາງກອບການ ໄດ້ໃຫ້ການຢືນຢັນວ່າ:
“ການເຊື່ອມຕໍ່ການທ່ອງທ່ຽວລະຫວ່າງ 2-3 ປະເທດ ຕິດຕໍ່ກັນນີ້ ອັນທີໜຶ່ງກໍຄື
ເລື້ອງ ວີຊາດຽວ ອັນດັບຕໍ່ໄປກໍຄືວ່າ ໃນແງ່ຂອງການທຳການຕະຫລາດຮ່ວມກັນ
ຄິດວ່າທາງນະຄອນພະນົມນີ້ ກໍຈະເປັນສາຍໜຶ່ງ ທີ່ໜ້າສົນໃຈ ທີ່ເຊື່ອມຕໍ່ໄປຈົນ
ເຖິງຫວຽດນາມໄດ້ດ້ວຍອີກ ສ່ວນໜຶ່ງທີ່ໄດ້ມີການເວົ້າລົມກັນ ກໍຄືທີ່ເອີ້ນວ່າ Tour
De Khong ກໍຈະເປັນອີກອັນໜຶ່ງ ທີ່ວ່າຈະເຊື່ອມຕໍ່ຫຼາຍຈັງຫວັດ ໃນປະເທດໄທ
ກັບລາວ ແລ້ວກໍອາດຈະໄປປະເທດອື່ນໆໄດ້ ໃນອະນາຄົດເຊັ່ນກັນ.”
ທ່ານນາງກອບການ ຍັງໄດ້ສະແດງຄວາມເຊື່ອໝັ້ນດ້ວຍວ່າ
ການຮ່ວມມືດັ່ງກ່າວ ຈະເຮັດໃຫ້ນັກທ່ອງທ່ຽວຊາວຕ່າງຊາດ
ພາກັນເດີນທາງມາທ່ອງທ່ຽວໃນເຂດລຸ່ມແມ່ນ້ຳຂອງຫຼາຍຂຶ້ນ
ຢ່າງຕໍ່ເນື່ອງ ເພາະເຫັນວ່າການເດີນທາງມາທ່ອງທ່ຽວໃນເຂດ
ລຸ່ມແມ່ນ້ຳຂອງມີຄວາມຫລາກຫຼາຍທັງທາງດ້ານວັດທະນະທຳ
ປະເພນີ ປະວັດສາດ ແລະທຳມະຊາດທີ່ສວຍງາມອີກດ້ວຍ.
ທາງດ້ານກະຊວງຖະແຫລງຂ່າວ ວັດທະນະທຳ ແລະທ່ອງທ່ຽວ
ຂອງລາວ ກໍໄດ້ຄາດໝາຍວ່າ ໃນຕະຫລອດປີ 2014 ຈະມີນັກ
ທ່ອງທ່ຽວຊາວຕ່າງຊາດ ເດີນທາງເຂົ້າມາໃນລາວ ບໍ່ນ້ອຍກວ່າ
3 ລ້ານ 9 ແສນຄົນ ຊຶ່ງກໍຈະເຮັດໃຫ້ພາກບໍລິການໃນລາວ ມີ
ລາຍຮັບຫຼາຍກວ່າ 650 ລ້ານດອນລາ ເພີ້ມຂຶ້ນເກີນກວ່າ 10 ເປີເຊັນ ທຽບກັບປີ 2013 ແລະຖ້າຫາກວ່າສະພາບການ ຍັງສາມາດຈະຮັກສາ ລະດັບການເຕີບໂຕດັ່ງກ່າວນີ້ ໄດ້
ຢ່າງຕໍ່ເນື່ອງ ກໍຍັງເຮັດໃຫ້ຄາດໝາຍວ່າ ຈະມີນັກທ່ອງທ່ຽວເດີນທາງເຂົ້າມາໃນລາວ ເພີ້ມ
ຂຶ້ນເປັນ 10 ລ້ານກວ່າຄົນໃນປີ 2020 ຊຶ່ງຈະເຮັດໃຫ້ພາກບໍລິການໃນລາວ ມີລາຍຮັບເພີ້ມ
ຂຶ້ນເປັນຫຼາຍກວ່າ 1,600 ລ້ານດອນລາອີກດ້ວຍ.
ສຳຫລັບສາເຫດສຳຄັນ ທີ່ເຮັດໃຫ້ນັກທ່ອງທ່ຽວຊາວຕ່າງຊາດ ເດີນທາງເຂົ້າມາໃນລາວ
ເພີ້ມຂຶ້ນ ກໍໄດ້ຮັບການຊີ້ແຈງຈາກ ທ່ານບໍ່ແສງຄຳ ວົງດາລາ ລັດຖະມົນຕີກະຊວງທະແຫລງ ຂ່າວ ວັດທະນະທຳ ແລະທ່ອງທ່ຽວ ວ່າ ເປັນຍ້ອນການພັດທະນາພາກບໍລິການ ແລະ ທ່ອງທ່ຽວໃນລາວ ທີ່ກ້າວໄປສູ່ລະດັບມາດຕະຖານສາກົນ ຫຼາຍຂຶ້ນເລື້ອຍໆ ໂດຍຈະເຫັນໄດ້ຈາກການທີ່ລາວໄດ້ຮັບລາງວັນ ລະດັບໂລກໃນຖານະປະເທດ ທີ່ເປັນຈຸດໝາຍປາຍທາງ ຍອດນິຍົມ ຂອງບັນດານັກທ່ອງທ່ຽວ ຈາກທົ່ວໂລກມາຢ່າງຕໍ່ເນື່ອງ.
ໂດຍເລີ້ມຈາກປີ 2008 ທີ່ New York Times ຈັດໃຫ້ລາວເປັນ 1 ໃນ 53 ປະເທດໜ້າ
ທ່ອງທ່ຽວທີ່ສຸດໃນໂລກ ຕາມດ້ວຍການທ່ອງທ່ຽວທຳມະຊາດ ທີ່ປະຊາຊົນມີສ່ວນຮ່ວມ
ຢູ່ເຂດປ່າສະຫງວນນ້ຳຫ້າ ໃນແຂວງຫລວງນ້ຳທາ ໄດ້ຮັບລາງວັນດີເດັ່ນຈາກອົງການ
ສະຫະປະຊາຊາດ ເພື່ອການພັດທະນາ ສ່ວນເມືອງມໍລະດົກໂລກຫລວງພະບາງ ກໍໄດ້
ຫຼຽນຄຳໃນຖານະເມືອງທ່ອງທ່ຽວອັນດັບ 1 ໃນໂລກຈາກວາລະສານ Wanderlust ຂອງ
ອັງກິດເຖິງ 6 ປີຕໍ່ກັນ ແລະປີ 2013 ສະພາການທ່ອງທ່ຽວ ແລະການຄ້າສະຫະພາບຢູໂຣບ
ກໍຍົກຍ້ອງໃຫ້ລາວເປັນປະເທດ ທີ່ໜ້າທ່ອງທ່ຽວທີ່ສຸດໃນໂລກ ດັ່ງທີ່ທ່ານບໍ່ແສງຄຳ ໄດ້ໃຫ້
ການຢືນຢັນວ່າ:
“ໃນລະຍະເວລາທີ່ຜ່ານມາ ຍ້ອນຄວາມພະຍາຍາມ ເອົາໃຈໃສ່ຢ່າງຕັ້ງໜ້າ ແລະໄດ້ມີຜົນສຳເລັດຢ່າງຕໍ່ເນື່ອງຂອງຂະແໜງການທ່ອງທ່ຽວ ຈຶ່ງໄດ້ເຮັດໃຫ້ ສປປ ລາວ ຂອງພວກເຮົາໄດ້ຮັບການຍ້ອງຍໍສັນລະເສີນ ແລະໄດ້ຮັບລາງວັນທີ່ເປັນກຽດຫຼາຍຄັ້ງ ແລະຫລ້າສຸດ ດັ່ງທີ່ພວກເຮົາໄດ້ຮັບຊາບນຳກັນແລ້ວວ່າ ໃນຕົ້ນປີ 2013 ປະເທດລາວເຮົາກໍໄດ້ຮັບລາງວັນອັນດັບ 1 ຈາກສະພາການທ່ອງທ່ຽວ ແລະການຄ້າຢູໂຣບ ເປັນປະເທດທີ່ໜ້າທ່ຽວທີ່ສຸດໃນໂລກ.”
ສຳຫລັບໃນປີ 2013 ກໍມີຊາວຕ່າງຊາດເດີນທາງມາທ່ອງທ່ຽວໃນລາວເກືອບ 3 ລ້ານ 8 ແສນຄົນ ຊຶ່ງເພີ້ມຂຶ້ນ ຈາກ 3 ລ້ານ 3 ແສນກວ່າຄົນ ໃນປີ 2012 ທັງກໍຍັງຖືເປັນຈຳນວນນັກທ່ອງທ່ຽວທີ່ເດີນທາງເຂົ້າມາໃນລາວເກີນກວ່າລະດັບຄາດໝາຍໃນແຜນການປີ 2015 ທີ່ວາງໄວ້ ທີ່ຈຳນວນ 3 ລ້ານ 7 ແສນ 5 ໝື່ນກວ່າຄົນອີກດ້ວຍ.
